ကိုဗစ်-၁၉ ရောဂါဖြစ်ပွားစေသည့် ဗိုင်းရပ်စ်သည် တိရစ္ဆာန်များမှ ကူးစက်ခဲ့ခြင်းထက် တရုတ်ဓါတ်ခွဲခန်းတစ်ခုမှအပြင်သို့ရောက်ရှိသွားခြင်းက ဖြစ်နိုင်ခြေပိုများသည်ဟု အမေရိကန်ဗဟိုထောက်လှမ်းရေးအေဂျင်စီ(စီအိုင်အေ) က စနေနေ့တွင် ထုတ်ဖော်ပြောဆိုကာ ကိုဗစ်မူလဇစ်မြစ်နှင့်ပတ်သက်သော ၎င်း၏ ရပ်တည်ချက်ကို ပြောင်းလဲလိုက်သည်။
ဒေါ်နယ်ထရမ့်ပ်၏ ဒုတိယသမ္မတသက်တမ်းအတွက် ဂျွန်ရက်ကလစ်ဖ်ကို စီအိုင်အေ ညွှန်ကြားရေးမှူးအဖြစ် ကြာသပတေးနေ့က အတည်ပြုခဲ့ပြီးနောက်တွင် ကိုဗစ်ဆိုင်ရာ အကဲဖြတ်ချက်အသစ်ထွက်လာခြင်းဖြစ်သည်။
ထရမ့်ပ်၏ ပထမသက်တမ်းအတွင်းက ၂၀၂၀-၂၀၂၁ အထိ အမျိုးသားထောက်လှမ်းရေး ညွှန်ကြားရေးမှူးတာဝန်ထမ်းဆောင်ခဲ့သော ရတ်ကလစ်ဖ်က တာဝန်ထမ်းဆောင်သည့် ပထမဆုံးနေ့တွင် ဦးစားပေးအကြောင်းအရာသည် ကိုဗစ်၏ မူလဇစ်မြစ်နှင့်ပတ်သက်၍ အကဲဖြတ်ခြင်းဖြစ်လိမ့်မည်ဟု သောကြာနေ့က ဖော်ပြခဲ့သော အင်တာဗျူးတစ်ခုတွင် ပြောဆိုထားသည်။
ရရှိနိုင်သော သတင်းပေးပို့မှုအပေါ် အခြေခံ၍ ကိုဗစ်-၁၉ ကပ်ရောဂါသည် သဘာဝဇစ်မြစ်တစ်ခုထက် သုတေသန နှင့် ဆက်နွယ်သော ဇစ်မြစ်တစ်ခု ဖြစ်နိုင်ခြေပိုများသည်ကို ခိုင်မာမှုနည်းသေးသော ယုံကြည်ချက်ဖြင့် စီအိုင်အေက အကဲဖြတ်သည်ဟု စနေနေ့က ထုတ်ပြန်ချက်တွင် စီအိုင်အေ ပြောရေးဆိုခွင့်ရှိသူက ပြောကြားခဲ့သည်။
စီအိုင်အေအနေဖြင့် ကိုဗစ်သည် ဓါတ်ခွဲခန်း အမှားအယွင်းတစ်ခုကြောင့် ထွက်ပေါ်ခဲ့ခြင်းလား၊ တိရစ္ဆာန်မှတဆင့် ကူးစက်ခဲ့ခြင်းလားဆိုသည်ကို ယခင်က ဆုံးဖြတ်ထားခြင်းမျိုး မရှိခဲ့ပေ။
စီအိုင်အေသည် ကိုဗစ်-၁၉ ကူးစက်ရောဂါ၏ သုတေသန နှင့် ဆက်နွယ်သော ဇစ်မြစ်ဖြစ်သလား ဆိုသည်နှင့် သဘာဝအတိုင်းပေါ်ပေါက်ခဲ့သည်လားဆိုသည့် ဖြစ်နိုင်ခြေနှစ်ခုလုံးအတွက် ဆက်လက်အကဲဖြတ်နေသည်ဟု ပြောရေးဆိုခွင့်ရှိသူက မှတ်ချက်ပြုခဲ့သည်။
Ref: ယဟျူးနူးစ်