ခွင့်ပြုချက်ရယူခြင်း မရှိဘဲ VPN ထူထောင်ခြင်းနှင့် အွန်လိုင်းလေ-ာင်းကစားစနစ် တည်ဆောက်ခြင်း၊ ဆိုက်ဘာအလွဲ သုံးစားပြုလုပ်ခြင်းများ ပြုလုပ်ပါက ပစ်ဒဏ်ချမှတ်နိုင်သည့် ဆိုက်ဘာလုံခြုံရေး ဥပဒေကို နစက က ဇန်နဝါရီ (၁) ရက်၌ ပြဋ္ဌာန်းလိုက်သည်။
အီလက်ထရောနစ် နည်းပညာအသုံးပြုပြီး ဆိုက်ဘာတိုက်ခိုက်ခြင်းကြောင့် နိုင်ငံအချုပ်အခြာအာဏာနှင့် တည်ငြိမ်အေးချမ်းရေးကို ထိခိုက်စေခြင်းတို့မှ ကာကွယ်ရန်၊ ဆိုက်ဘာမှုခင်းများကို ထိထိရောက်ရောက် စုံစမ်းဖော်ထုတ် အရေးယူနိုင်ရန်အတွက် ပြဌာန်းခြင်း ဖြစ်သည်ဟု ဆိုသည်။
ယင်းဥပဒေပါ ရည်ရွယ်ချက်များကို အကောင်အထည်ဖော်နိုင်ရန်အတွက် ပြည်ထောင်စုအစိုးရအဖွဲ့အနေဖြင့် ဥက္ကဋ္ဌအဖြစ် ဒုတိယသမ္မတတစ်ဦး၊ ဒုတိယဥက္ကဋ္ဌအဖြစ် ဝန်ကြီး ဌာန၏ ပြည်ထောင်စုဝန်ကြီး၊ အဖွဲ့ဝင်များအဖြစ် ဆက်စပ်ဝန်ကြီးဌာနများက ပြည်ထောင်စုဝန်ကြီးများနှင့် ဆက်စပ်ပြည်ထောင်စုအဆင့် အဖွဲ့အစည်းများက ဥက္ကဋ္ဌများ ပါဝင်စေကာ ဆိုက်ဘာလုံခြုံရေးဆိုင်ရာ ဗဟိုကော်မတီကို ဖွဲ့စည်းရမည်ဟု ထည့်သွင်းပြဋ္ဌာန်းထားသည်။
ဥပဒေအရ တရားမဝင် VPN ဝန်ဆောင်မှုအတွက် ထောင်ဒဏ် အများဆုံး (၆) လအထိ၊ ဒဏ်ငွေ အနည်းဆုံး ကျပ်ဆယ်သိန်းမှ သိန်းတစ်ရာအထိ ချမှတ်ခံရမည် ဖြစ်သလို ဒဏ်နှစ်ရပ်လုံးလည်း ချမှတ်နိုင်ကြောင်း ဖော်ပြထားသည်။
ထို့ပြင် အမှုနှင့် သက်ဆိုင်သည့် သက်သေခံပစ္စည်းများကိုလည်း နိုင်ငံ့ဘဏ္ဍာအဖြစ် သိမ်းဆည်းမည်ဖြစ်ကြောင်းလည်း ဖော်ပြထားသည်။
ထိုနည်းတူ ဆိုက်ဘာအလွဲအသုံးပြုခြင်း တစ်မျိုးမျိုးကို ကျူးလွန်လျှင် ထိုသူကို အနည်းဆုံး တစ်နှစ်မှ အများဆုံး သုံးနှစ်ထိ ထောင်ဒဏ်၊ အနည်းဆုံး ကျပ်သိန်း (၅၀) မှ အများဆုံး ကျပ်သိန်း နှစ်ရာထက် မပိုသည့် ငွေဒဏ်၊ ဒဏ်နှစ်ရပ်စလုံး ချမှတ်ရမည်ဟုလည်း ပြဋ္ဌာန်းထားသည်။
မရိုးမဖြောင့်သဘောနှင့် ဆိုက်ဘာအရင်းအမြစ်ကို အသုံးပြုပြီး အခြားသူ၏ အွန်လိုင်းငွေကြေးတစ်ရပ်ရပ်ကို ခို-းယူခြင်း သို့မဟုတ် အကျိုးဖျက်ဆီးခြင်း သို့မဟုတ် အခြားသူတစ်ဦးဦး ပြုလုပ်ရန် ခိုင်းစေလျှင် ထိုသူကို အနည်းဆုံး နှစ်နှစ်မှ အများဆုံး ခုနစ်နှစ်ထိ ထောင်ဒဏ်ချမှတ်ရမည့် အပြင် ငွေဒဏ်လည်း ချမှတ်နိုင်ကြောင်း ပြဋ္ဌာန်း ထားသည်။
ထို့အပြင် အများပြည်သူ ကြည့်ရှုရန် မသင့်တော်သည့် သတင်းအချက်အလက်များကို အီလက်ထရောနစ် နည်းပညာနှင့် ဖြန့်ဝေခြင်း၊ ပေးပို့ခြင်း၊ ကူးယူခြင်း၊ ရောင်းချခြင်းများအတွက် ထောင်ဒဏ် အနည်းဆုံး တစ်လမှ ခြောက်လ၊ ဒဏ်ငွေ အနည်းဆုံး ကျပ် ဆယ်သိန်းမှ သိန်းတစ်ရာအထိ ချမှတ်မည့် အပြင် ဒဏ်နှစ်ရပ်လုံးကိုလဲ ချမှတ်ရမည်ဟု လည်း သိရသည်။
ထုတ်ပြန်သည့် နည်းဥပဒေ စည်းမျဉ်း၊ စည်းကမ်း အမိန့် ညွှန်ကြားချက်များကို ဖောက်ဖျက်ကျူးလွန်လျှင် ထောင်ဒဏ် တစ်လမှ သုံးလအထိဖြစ်စေ၊ ဆယ်သိန်းမှ သိန်းတစ်ရာထက်မပိုသည့် ဒဏ်ငွေဖြစ်စေ၊ ပြစ်ဒဏ်နှစ်ရပ်လုံးဖြစ်စေ ချမှတ်နိုင်ကြောင်းလည်း ဖော်ပြထားသည်။