မြန်မာ့ငလျင်ဘေးသင့်ပြည်သူများအတွက် တရုတ်နိုင်ငံ၊ နန်နင်းမြို့ရှိ ဆေးရုံမှ ဒုတိယအကြိမ် လှူဒါန်းသော ယွမ် (၂၁၃, ၁၉၈) တန်ဖိုးရှိ ဆေးပစ္စည်းများကို နန်နင်းမြို့၊ မြန်မာကောင်စစ်ဝန်ချုပ်က လက်ခံခဲ့ပြီး ဒုတိယအကြိမ်အဖြစ် ငလျင်ဘေးသင့်ဒေသများသို့ ဆက်လက်ပေးပို့ခဲ့ကြောင်း နိုင်ငံခြားရေးဝန်ကြီးဌာန ထုတ်ပြန်ချက်အရ သိရသည်။
မတ်လ (၂၈)ရက်က မြန်မာနိုင်ငံ၌ အင်အား ၇.၇ အဆင့်ရှိ အင်အားပြင်းငလျင် လှုပ်ခတ်ခဲ့ရာ ငလျင်ဘေးသင့်ပြည်သူများအတွက် The first Affiliated Hospital of Guangxi Medical University မှ ဒုတိယအကြိမ် လှူဒါန်းခဲ့ခြင်းဖြစ်ရာ မြန်မာကောင်စစ်ဝန်ချုပ်က အဆိုပါ ဆေးရုံ၌ ဧပြီ (၂၂)ရက်တွင် လက်ခံရယူခဲ့ပြီး ကျေးဇူးတင်မှတ်တမ်းလွှာ ပြန်လည်ပေးအပ်ခဲ့ကြောင်း သိရသည်။
အဆိုပါ ဆေးဝါးပစ္စည်းများအပြင် မြန်မာကောင်စစ်ဝန်ချုပ်ရုံးမှ လက်ခံရရှိထားသော Guangxi International Zhuang Medicine Hospital၊ Shandong Puze Health Indust ry Group Co., Ltd နှင့် Linyi Puze Huihai Health Technology Co., Ltd တို့မှ လှူဒါန်းသော ဆေးပစ္စည်းများ ပါဝင်သည်။
ထို့ပြင် Guangxi Liuyao Group Co., Ltd နှင့် နန်နင်းအကောက်ခွန်ဌာနမှ လှူဒါန်းသော ဆေးဝါးများနှင့် Shanglin Yingfu Agricultural and Sideline Products Co., Ltd. မှ လှူဒါန်းသော အမျိုးသမီးသုံးပစ္စည်းများ၊ စုစုပေါင်း လှူဒါန်းပစ္စည်း (၄.၉) တန်ကို မြန်မာကောင်စစ်ဝန်ချုပ်ရုံး၏ စီစဉ်ပေးမှုဖြင့် ဧပြီ (၂၄)ရက်တွင် နန်နင်းမြို့မှ ရန်ကုန်မြို့သို့ ပြေးဆွဲသည့် ကုန်တင်လေကြောင်းအမှတ် – UB8504 ဖြင့် ပို့ဆောင်ပေးခဲ့ကြောင်း သိရသည်။
အဆိုပါ လှူဒါန်းပစ္စည်းများကို ရန်ကုန်အပြည်ပြည်ဆိုင်ရာလေဆိပ်၌ နိုင်ငံခြားရေး ဝန်ကြီးဌာနမှ တာဝန်ရှိသူများက လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ညွှန်ကြားရေးမှူး ဦးသန်းစိုးထံသို့ ဧပြီ (၂၅)ရက်တွင် ဆက်လက် လွှဲပြောင်းပေးအပ်ခဲ့ပြီး သက်ဆိုင်ရာ ငလျင်ဘေးသင့် ဒေသများရှိ ပြည်သူများထံ အမြန်ဆုံး ဖြန့်ဝေပေးပို့လှူဒါန်းသွားမည်ဖြစ်ကြောင်း သိရသည်။