ဗန့်ကူးဗားတွင်လမ်းပေါ်ပွဲဈေး၌လူအုပ်ကိုကားဝင်တိုက်၊အများအပြားသေ

       
ကနေဒါနိုင်ငံအနောက်ပိုင်း ဗန့်ကူးဗားမြို့တွင် ဖိလစ်ပိုင်လူမျိုးတို့၏ လမ်းပေါ်ပွဲဈေးတစ်ခု၌ လူအုပ်အတွင်းကို ယာဉ်မောင်းတစ်ဦးက ကားနှင့်ဝင်တိုက်၍ လူအများအပြားသေဆုံးကာ အမြောက်အများဒဏ်ရာရခဲ့ကြောင်း ရဲတပ်ဖွဲ့က စနေနေ့တွင် ပြောကြားခဲ့သည်။
          
ယာဉ်မောင်းကို ဖမ်းဆီးထိန်းသိမ်းထားသည်ဟု ဆိုရှယ်မီဒီယာ X ပေါ်တွင် ရဲတပ်ဖွဲ့က ပို့စ်တင်ပြောဆိုခဲ့ပြီး အသေးစိတ်အချက်အလက်များကိုမူ မဖော်ပြခဲ့ပေ။ ညသန်းခေါင်ခန့်တွင် ရဲတပ်ဖွဲ့က နောက်ဆုံးရ သတင်းအချက်အလက်များကို ထုတ်ပြန်မည်ဟု မျှော်လင့်ရသည်။
         
Lapu Lapu Day Block Party ကျင်းပနေသည့် ၄၁ လမ်းနှင့် ဖရေဇာလမ်း ထောင့် အနီးတွင် ည ၈ နာရီမတိုင်ခင်လေး၌ ၎င်း ဖြစ်ရပ်ဖြစ်ပွားခဲ့သည်။
           
“ဒီညအစောပိုင်းက ဗန့်ကူးဗား Lapu Lapu ပွဲတော်မှာ ကြောက်လန့်စရာ အဖြစ်အပျက်ဖြစ်ပွားခဲ့တာကို ကြားသိရတဲ့အတွက် စိတ်မချမ်းမြေ့ဖြစ်ရပါတယ်” ဟု ကနေဒါဝန်ကြီးချုပ် မတ်ခ်ကာနေးက X ပေါ်တွင် ပြောကြားခဲ့သည်။
          
အနက်ရောင်ယာဉ်တစ်စီးသည် လူအုပ်ထဲဝင်မတိုက်ခင်တွင် ပွဲတော်ဧရိယာ၌ အမှားအယွင်းမရှိ မောင်းနှင်နေသည်ကို မြင်တွေ့ခဲ့သည်ဟု မျက်မြင်သက်သေတစ်ဦးက CTV သတင်းဌာနကို ပြောဆိုခဲ့သည်။
         
ကနေဒါ ဒီမိုကရေစီပါတီသစ် ခေါင်းဆောင် Jagmeet Singh သည် ပွဲအခမ်းအနားသို့ လာရောက်ခဲ့သူများတွင် ပါဝင်သော်လည်း အခင်းမဖြစ်မီ မိနစ်ပိုင်းအလိုတွင် ပြန်သွားခဲ့သည်ဟုလည်း CTV က ဖော်ပြခဲ့သည်။
         
“အရမ်းကြောက်စရာဖြစ်ရပ်ပါ၊ ဘယ်လိုပြောရမှန်းတောင် မသိတော့ဘူး” ဟု Singh က ပြောခဲ့သည်ဟု CTV က ဖော်ပြသည်။ “ကျွန်တော် အဲဒီမှာရောက်နေချိန် ပြုံးပြုံးရွှင်ရွှင် နဲ့ ကခုန်နေတဲ့ ကလေးတွေရဲ့ မျက်နှာလေးတွေကိုတောင် မြင်ယောင်မိသေးတယ်” ဟု သူက ပြောဆိုခဲ့သည်။
         
ကနေဒါနိုင်ငံတွင် ပြည်ထောင်စု ရွေးကောက်ပွဲကို တနင်္လာနေ့တွင် ကျင်းပမည်ဖြစ်သည်။
       
အခင်းဖြစ်ဧရိယာတွင် လူထောင်နှင့်ချီ၍ ရှိနေခဲ့သည်ဟု သည်ဗန်းကူဗားဆန်း က ဖော်ပြခဲ့သည်။