မြန်မာငလျင်အတွက် မလေးရှားက ရင်းဂစ် ၁၀ သန်း ကူညီထောက်ပံ့မည်

မလေးရှားနိုင်ငံသည် မြန်မာနိုင်ငံရှိ ငလျင်ဘေးဒဏ် ကြုံခဲ့ရသူများအတွက် လူသားချင်းစာနာထောက်ထားမှု အကူအညီ အဖြစ် ရင်းဂစ် ၁၀ သန်း ကို ထောက်ပံ့သွားမည်ဖြစ်ကြောင်း ဝန်ကြီးချုပ် ဒါတွတ် ဆရီ အန်ဝါ အီဘရာဟင်က ယနေ့ ပြောကြားလိုက်သည်။

ထောက်ပံ့ကူညီမှုသည် ၂၀၂၅ အာဆီယံအလှည့်ကျ ဥက္ကဌဖြစ်သော မလေးရှားနိုင်ငံ၏ တာဝန်ယူမှုနှင့် စည်းလုံးညီညွတ်မှုကို ထင်ဟပ်စေကြောင်း သူက ပြောကြားခဲ့ပြီး လူသားချင်းစာနာမှုမစ်ရှင်ကို ဦးဆောင်ရန်အတွက် လာမည့်သီတင်းပတ်တွင် နိုင်ငံခြားရေးဝန်ကြီး ဒါတွတ်ဆရီ မိုဟာမက် ဟာဆန်ကို မြန်မာနိုင်ငံသို့ သွားရောက်ရန် ညွှန်ကြားထားကြောင်း သူက ပြောကြားခဲ့သည်။

ယင်းခရီးစဉ်သည် ယနေ့ မြေပြင်တွင် တပ်ဖြန့်ချထားသော နိုင်ငံတော် သဘာဝဘေး စီမံခန့်ခွဲရေးအေဂျင်စီ (Nadma) အဖွဲ့၏ ကြိုးပမ်းဆောင်ရွက်မှုများ အပါအဝင် ရှာဖွေရေးနှင့် ကယ်ဆယ်ရေးလုပ်ငန်းများကို ဆက်လက်ဆောင်ရွက်ရာတွင် မလေးရှားနိုင်ငံ၏ ခိုင်မာသော ပံ့ပိုးကူညီမှုကို ပြသရန် ရည်ရွယ်သည်ဟု သတင်းထုတ်ပြန်ချက်တွင် သူက ပြောကြားထားသည်။

ဘနားမား သတင်းဌာန၏ ဖော်ပြချက်အရ လူသားချင်းစာနာထောက်ထားမှုမစ်ရှင်နှင့် ရှာဖွေကယ်ဆယ်ရေး လုပ်ငန်းများတွင် ကူညီဆောင်ရွက်ရန် Nadma လက်အောက်ရှိ မလေးရှား အထူးရှာဖွေ ကယ်ဆယ်ရေးအဖွဲ့(SMART) ၏ အဖွဲ့ဝင် ၅၀ ပါ သောအဖွဲ့တစ်ဖွဲ့သည် ယနေ့နံနက်ပိုင်းတွင် နေပြည်တော်သို့ ထွက်ခွာသွားပြီဖြစ်ကြောင်း သိရသည်။

ယခုကဲ့သို့ လူသားချင်းစာနာထောက်ထားမှုဆိုင်ရာ အကြပ်အတည်းများကို ဖြေရှင်းရာတွင် အာဆီယံနိုင်ငံများအကြား ပူးပေါင်းဆောင်ရွက်မှုနှင့် စုပေါင်းလုပ်ဆောင်မှုသည် အရေးကြီးကြောင်း အန်ဝါက ပြောကြားခဲ့သည်။

အာဆီယံ၏ ဦးစားပေးအရာသည် ဒေသတွင်း ပြည်သူများ၏ ကောင်းကျိုးချမ်းသာကို ကာကွယ်စောင့်ရှောက်ရာတွင် လျင်မြန်၊ ထိရောက်ပြီး ကျယ်ကျယ်ပြန့်ပြန့်ပါဝင် လုပ်ဆောင်မှုအဖြစ် ပြောင်းလဲရမည်ဖြစ်ကြောင်းလည်း သူက ဆိုခဲ့သည်။

မလေးရှားနိုင်ငံသည် မြန်မာနိုင်ငံအတွက် အကူအညီများကို ပေါင်းစပ်ညှိနှိုင်းရန်နှင့် ထိခိုက်နစ်နာသူများအတွက် အဓိပ္ပာယ်ရှိသော အကျိုးသက်ရောက်မှုရှိစေရန် အာဆီယံမိတ်ဖက်များနှင့် ဆက်လက်ဆွေးနွေးသွားမည်ဖြစ်ကြောင်း အန်ဝါက ပြောကြားခဲ့သည်။

Ref: မလေးမေးလ်