ပေကျင်း၊ဧပြီ ၂၁
အမေရိကနှင့်ပူးတွဲပြီး အကြီးစားစစ်ရေးလေ့ကျင့်မှုပြုလုပ်ရန် ဆုံးဖြတ်ခဲ့သည့် ဖိလစ်ပိုင်၏အဆုံးအဖြတ်ကို ဒေသတွင်းနိုင်ငံများက မနှစ်မြို့ကြဘဲ ဆန့်ကျင်ခဲ့ကြကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူကပြောကြားခဲ့သည်။
ပေကျင်းနှင့်မနီလာတို့အကြား တောင်တရုတ်ပင်လယ်အရေးအငြင်းပွားနေချိန်၌ အဆိုပါစစ်ရေးလေ့ကျင့်မှုကို ပြုလုပ်ရန် စီစဉ်ခြင်းဖြစ်ပြီး အမေရိကနှင့်ဖိလစ်ပိုင်တို့၏ နှစ်ပတ်လည်စစ်ရေးလေ့ကျင့်မည့် အစီအစဉ်ကို ပေကျင်းကယခုကဲ့သို့ တုန့်ပြန်ပြောကြားခဲ့ခြင်းဖြစ်သည်။
“တစ်ကမ္ဘာလုံးမှာ တစ်ဘက်သတ်ဝါဒ၊ကိုယ်ကျိုးစီးပွားကာကွယ်ရေးဝါဒနဲ့ အနိုင်ကျင့်ဗိုလ်ကျမှုတွေဖြစ်နေကြလို့ ဒေသတွင်းမှာရှိတဲ့ စိန်ခေါ်မှုတွေကို တုန့်ပြန်ဖို့နဲ့ဒေသတွင်းတည်ငြိမ်ရေးကို ထိန်းသိမ်းဖို့အတွက် ဒီဒေသမှာရှိတဲ့နိုင်ငံတွေက စည်းလုံးညီညွတ်မှု၊ ပေါင်းစပ်ညှိနှိုင်းမှုနဲ့ ပူးပေါင်းကြိုးပမ်းမှုတွေပြုလုပ်ဖို့ တောင်းဆိုနေကြတာပါ” ဟုလည်း ၎င်းကဆက်လက်ပြောကြားခဲ့သည်။
ဤအခြေအနေတွင် ဖိလစ်ပိုင်သည် ဒေသတွင်းတည်ငြိမ်မှုနှင့် စီးပွားရေးအလားအလာများကို ထိခိုက်စေနိုင်သောလုပ်ရပ်မျိုးဖြစ်သည့် အကြီးစားစစ်ရေးလေ့ကျင့်မှုပြုလုပ်ခြင်းကိုလုပ်ရန် ဖိလစ်ပိုင်ဘက်ကရွေးချယ်ခဲ့သည်ဟုလည်း ၎င်းကဆိုသည်။
ထို့ကြောင့် ယခုလုပ်ရပ်ကို ဒေသတွင်းနိုင်ငံများက မနှစ်မြို့သဖြင့် ကန့်ကွက်ခဲ့သည်ဟုလည်းဆိုသည်။သို့သော် ဖိလစ်ပိုင်နှင့်အမေရိကတို့ကမူ စစ်ရေးလေ့ကျင့်မှုကို ဆက်လက်လုပ်ဆောင်ခဲ့ပြီး နှစ်ဖက်ပေါင်း စစ်အင်အား (၁၄,၀၀၀) နှင့်ပြုလုပ်ခဲ့ကြကာ အမေရိကန်စစ်သား (၉,၀၀၀) နှင့် ဖိလစ်ပိုင်စစ်သား (၅,၀၀၀) ပါဝင်သည်ဟုသိရသည်။
ထို့ပြင် အဆိုပါစစ်ရေးလေ့ကျင့်မှုသို့ အခြားနိုင်ငံပေါင်း ၁၀ နိုင်ငံကလည်း လေ့လာသူနိုင်ငံများအဖြစ် ပါဝင်တက်ရောက်မည်ဖြစ်ပြီး ဧပြီ ၂၁ ရက်မှ မေလ ၉ ရက်နေ့အထိတောင်တရုတ်ပင်လယ်၌ လုပ်ဆောင်သွားမည်ဟုလည်း ပြောကြားခဲ့သည်။
Ref 1 : ရှင်းဟွာ
Ref 2 : NOM World News