အာဆီယံအနေဖြင့် မြန်မာနှင့် ထိုင်းနိုင်ငံတို့မှ ငလျင်ဘေးသင့် ပြည်သူများအား ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများ ပေါင်းစပ်ညှိနှိုင်းဆောင်ရွက်သွားရန် အသင့်ရှိ

အာဆီယံအနေဖြင့် မြန်မာနှင့် ထိုင်းနိုင်ငံတို့မှ ငလျင်ဘေးသင့် ပြည်သူများအပေါ် ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများကို ပေါင်းစပ်ညှိနှိုင်းဆောင်ရွက်သွားရန် အသင့်ရှိကြောင်း အာဆီယံနိုင်ငံခြားရေး ဝန်ကြီးများ အထူးအ‌ရေးပေါ်အစည်းအဝေးတွင် တစ်ညီ တစ်ညွတ်တည်း ဆုံးဖြတ်ခဲ့ကြကြောင်း ၎င်းအစည်းအဝေးမှ သိရသည်။

မတ်လ (၂၈) ရက်က မြန်မာနိုင်ငံ၌ ဖြစ်ပွားခဲ့သည့် အင်အားပြင်းငလျင်ကြောင့် ထိခိုက်ပျက်စီးဆုံးရှုံးမှုများစွာ ဖြစ်ပွားခဲ့မှုနှင့် ပတ်သက်၍ မတ်လ (၃၀)ရက်က အာဆီယံနိုင်ငံခြားရေးဝန်ကြီးများ အထူး အရေးပေါ် အစည်းအဝေးကို ဗီဒီယိုကွန်ဖရင့်စနစ်ဖြင့် ကျင်းပပြုလုပ်ခဲ့ရာ မြန်မာနိုင်ငံမှ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဦးသန်းဆွေ ပါဝင်တက်ရောက်ခဲ့ကြောင်း နိုင်ငံခြားရေးဝန်ကြီးဌာန ထုတ်ပြန်ချက်အရ သိရသည်။

အဆိုပါ အစည်းအဝေးအား မြန်မာနိုင်ငံနှင့် ထိုင်းနိုင်ငံတို့တွင် ပြင်းထန်သော ငလျင်ဖြစ်ပွားပြီးနောက်၌ ငလျင်ဘေးသင့် ဒေသများ၌ လူသားချင်းစာနာမှုအကူအညီများပေးအပ်ရေး၊ ကူညီကယ်ဆယ်ရေးနှင့် ပြန်လည် ထူထောင်ရေးလုပ်ငန်းများ ဆောင်ရွက်ရန်အတွက် လိုအပ်သည့် ပေါင်းစပ်ညှိနှိုင်းမှုများ ပြုလုပ်နိုင်ရန် ကျင်းပပြုလုပ်ခြင်းဖြစ်ကြောင်း သိရသည်။

နိုင်ငံတော်စီမံအုပ်ချုပ်ရေးကောင်စီက သဘာဝဘေးအန္တရာယ် ဆိုင်ရာစီမံခန့်ခွဲမှု ဥပဒေအရ အရေးပေါ်အခြေအနေကို ထုတ်ပြန်ကြေညာခဲ့ပြီးသည်နှင့် တစ်ပြိုင်နက် ငလျင်ကြောင့် ထိခိုက်ခံစားရသူများကို ကယ်ဆယ်ရေးနှင့် ပြန်လည်ထူထောင် ရေးလုပ်ငန်းများ ကြိုးပမ်းဆောင်ရွက်မှုများကို ရှင်းလင်း ပြောကြားခဲ့သည်။

ပြင်းအားမြင့် ငလျင်နှင့် ဆက်စပ်သည့် ငလျင်ငယ် (၁၇)ကြိမ်ကျော်ကိုလည်း ကြုံတွေ့လျက်ရှိသည့်အတွက် လတ်တလောတွင် ပျောက်ဆုံးနေသူများ ရှာဖွေကယ်ဆယ်‌ရေးနှင့် ယာယီနေထိုင်နိုင်ရန် ကျန်းမာရေး စောင့်ရှောက်မှုများအတွက် အဓိကအကူအညီလိုအပ်ကြောင်း ဒုတိယဝန်ကြီးချုပ်နှင့် ပြည်ထောင်စုဝန်ကြီးက ပြောကြားခဲ့သည်။

ထို့ပြင် ပြိုကျပျက်စီးမှုမရှိသည့် အဆောက်အအုံများကို အန္တရာယ်ကင်းစွာသုံးစွဲနိုင်မှုကို ဆန်းစစ်ခြင်း၊ ပြင်ဆင်ဆောက်လုပ်ခြင်းများကို ဆောင်ရွက်မည်ဖြစ်၍ ဝိုင်းဝန်းပူးပေါင်းကူညီပေးရန် မေတ္တာရပ်ခံခဲ့ကြောင်းလည်း သိရသည်။

အာဆီယံနိုင်ငံများက မြန်မာနိုင်ငံနှင့် ထိုင်းနိုင်ငံတို့တွင် ကြုံတွေ့ခဲ့ရသည့် ငလျင်ဘေးသင့် ပြည်သူများအပေါ် များစွာ စာနာ၊ စိတ်မကောင်းဖြစ်ရကြောင်း ပြောကြားခဲ့ကြသည်။ 

ထို့ကြောင့် အရေးပေါ်အခြေအနေကြုံတွေ့နေရသည့် အချိန်တွင် အာဆီယံအနေဖြင့် စည်းလုံးညီညွတ်မှု မြှင့်တင်ကြရန်နှင့် လူသားချင်းစာနာမှု အကူအညီများ၊ ပံ့ပိုးမှုများနှင့် ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများကို ပေါင်းစပ်ညှိနှိုင်းဆောင်ရွက်သွားရန် အသင့်ရှိပါကြောင်း ပြောကြားခဲ့သည်။