ကန်ဒုသမ္မတကမ်မလာဟဲရစ် တောင်ကိုရီးယားရောက်

ကန်ဒုသမ္မတကမ်မလာဟဲရစ် တောင်ကိုရီးယားရောက်

ဆိုးလ်၊စက်တင်ဘာ ၂၉

အမေရိကန်ဒုတိယသမ္မတကမ်မလာဟဲရစ်သည် မြောက်ကိုရီးယားက ပဲ့ထိန်းဒုံးကျည်များထပ်မံစမ်းသပ်ပြီး တစ်ရက်အကြာ စက်တင်ဘာ ၂၉ ရက် ကြာသပတေးနေ့၌ ဝါရှင်တန်နှင့်ဆိုးလ်ကြား မဟာမိတ်ဆက်ဆံရေးပိုမိုအားကောင်းလာစေရန် တောင်ကိုရီးယားသို့လာရောက်ခဲ့သည်။

လုပ်ကြံခံခဲ့ရသည့် ဂျပန်ဝန်ကြီးချုပ်ဟောင်း ရှင်ဇိုအာဘေး၏နိုင်ငံတော်ဈာပန တက်ရောက်ရန်တိုကျိုမြို့သို့သွားရောက်ခဲ့သည့် မစ္စဟဲရစ်သည် တောင်ကိုရီးယားသမ္မတမစ္စတာယွန်းဆော့ယော်နှင့်လည်းတွေ့ဆုံမည်ဖြစ်ကြောင်းသိရသည်။

သူ့အနေဖြင့်မြောက်ကိုရီးယားနှင့်တောင်ကိုရီးယားကိုပိုင်းခြားထားသည့် စစ်မဲ့ဇုန်နေရာသွားလည်းသွားရောက်မည်ဖြစ်ပြီး အဆိုပါလုပ်ရပ်သည် ပြုံယမ်းအားဒေါသထွက်စေနိုင်သည့် လှုပ်ရှားမှုတစ်ခုလည်းဖြစ်သည်။

ဩဂုတ်လအတွင်းကနယ်စပ်သို့သွားရောက်ခဲ့သည့် အမေရိကန်အောက်လွှတ်တော်ဥက္ကဌနန်စီပေလိုစီအား မြောက်ကိုရီးယားက နိုင်ငံတကာငြိမ်းချမ်းရေးကို အဆိုးရွားဆုံးဖျက်ဆီးသူအဖြစ် တံဆိပ်ကပ်ခဲ့သည်။မြောက်ကိုရီးယားသည် ဟဲရစ်၏တောင်ကိုရီးယားခရီးစဉ်အကြိုယခုသီတင်းပတ်အတွင်း တားမြစ်ထားသောဒုံးကျည်စမ်းသပ်မှုကိုနှစ်ကြိမ်ပြုလုပ်ခဲ့သည်။

ဂျပန်မှမထွက်ခွာမီ အမေရိကန်ဖျက်သင်္ဘောတစ်စင်းပေါ်၌ ဟဲရစ်ကပြောကြားခဲ့သည်မှာ မြောက်ကိုရီးယားသည် ၎င်းတို့၏တရားမဝင်လက်နက်များ၊ဒုံးကျည်အသစ်ပစ်လွှတ်မှုများဖြင့် ဒေသတွင်းတည်ငြိမ်ရေးကိုခြိမ်းခြောက်နေသည်ဟု စွပ်စွဲခဲ့သည်။

မြောက်ကိုရီးယားခေါင်းဆောင်ကင်မ်ဂျုံအမ်သည် နောက်ထပ်နျူစမ်းသပ်မှုပြုလုပ်ရန်ပြင်ဆင်နေပြီဖြစ်ကြောင်း တောင်ကိုရီးယားနှင့် အမေရိကန်တာဝန်ရှိသူများကသတိပေးထားကာ အဆိုပါစမ်းသပ်မှုသည် တရုတ်ကွန်မြူနစ်ပါတီကွန်ဂရက်အပြီး နောက်လအစောပိုင်းလောက်တွင်ဖြစ်နိုင်သည်ဟု တောင်ကိုရီးယားထောက်လှမ်းရေးအေဂျင်စီကပြောကြားခဲ့သည်။ပြုံယမ်းအနေဖြင့်နျူစမ်းသပ်မှုပြုလုပ်ရန် အောက်တိုဘာ ၁၆ ရက်နေ့၌ကျင်းပမည့် တရုတ်ကွန်မြူနစ်ပါတီကွန်ဂရက်အပြီးနှင့် နိုဝင်ဘာလ ၇ ရက်နေ့တွင်ပြုလုပ်မည့် အမေရိကန်၏ကြားဖြတ်ရွေးကောက်ပွဲနှစ်ခုအကြားမည်သည့်အချိန်တွင်ပြုလုပ်မည်ကိုရွေးချယ်လိမ့်မည်ဟုလည်းဖော်ပြထားသည်။

မြောက်ကိုရီးယား၏ရန်စမှုများကို ဆန့်ကျင် အင်အားပြလိုသည့်ရည်ရွယ်ချက်ဖြင့် တောင်ကိုရီးယားနှင့်အမေရိကတို့သည်လည်း ယခုအပတ်အတွင်းကြီးမားသည့် ပူးတွဲရေတပ်စစ်ရေးလေ့ကျင့်မှုကိုပြုလုပ်လျက်ရှိသည်။

သမ္မတယွန်နှင့်တွေ့ဆုံပါက မစ္စဟဲရစ်သည် နိုင်ငံများ၏ကာလရှည်ကြာ လုံခြုံရေးမဟာမိတ်၊၎င်းတို့၏ကြီးထွားလာသော စီးပွားရေးနှင့်နည်းပညာဆိုင်ရာပူးပေါင်းဆောင်ရွက်မှုနှင့် အခြားသောဒေသတွင်းနှင့် ကမ္ဘာလုံးဆိုင်ရာကိစ္စရပ်များကိုပါ ဆွေးနွေးရန်စီစဉ်ထားကြောင်းသူ၏ရုံးကပြောကြားခဲ့သည်။

ဆိုးလ်အနေဖြင့် အမေရိကပြင်ပတွင်ထုတ်လုပ်သည့်လျှပ်စစ်ကားများအတွက် ထောက်ပံ့ကြေးများကိုဖယ်ရှားလိုက်ခြင်းအတွက် သမ္မတဘိုင်ဒင်လက်မှတ်ရေးထိုးပေးလိုက်သည့် ဥပဒေနှင့်ပတ်သက်၍လည်း စိုးရိမ်မှုများမြင့်တက်လာကာ Hyundai နှင့် KIA ကဲ့သို့သော ကိုရီးယားကားထုတ်လုပ်ငန်းများအပေါ်ထိခိုက်နိုင်ဖွယ်ရှိသည့်အတွက်လည်း စိုးရိမ်နေကြရသည်။

ထပ်မံ၍ဆိုးလ်သည် အမေရိကအပါအဝင်ဂျပန်နှင့်လည်း ရေငုပ်သင်္ဘောလေ့ကျင့်မှုများလည်းပြုလုပ်မည်ဖြစ်သည်ဟုဆိုသည်။ပြုံယမ်းသည်ရေငုပ်သင်္ဘောမှပစ်လွှတ်မည့် ပဲ့ထိန်းဒုံးကျည်ကိုလည်း စမ်းသပ်ရန်ပြင်ဆင်နေသည်ကို တာဝန်ရှိသူများကတွေ့ရှိခဲ့ကြောင်း ပြီးခဲ့သည့်သီတင်းပတ်ကပြောကြားခဲ့သဖြင့် ၂၀၁၇ ခုနှစ်နောက်ပိုင်းပထမဆုံးအကြိမ်အနေဖြင့်သုံးနိုင်ငံလေ့ကျင့်မှုများပြုလုပ်သွားမည်ဟုလည်း ကြာသပတေးနေ့ကဆိုးလ်ကပြောကြားခဲ့သည်။

Source – AFP/fh