အမေရိကန်သမ္မတ ဒေါ်နယ်ထရမ့်ပ် အစိုးရအဖွဲ့က ကြားဝင်ဆောင်ရွက်ပေးသည့် စေ့စပ်ဆွေးနွေးမှုများ၏ တစ်စိတ်တစ်ပိုင်းအဖြစ် အမေရိကနှင့် ယူကရိန်းအစိုးရ ကိုယ်စားလှယ်များသည် ဆော်ဒီအာရေဗျနိုင်ငံတွင် ဆွေးနွေးမှုများလုပ်ဆောင်လျက်ရှိသည်။
ရီယာ့ဒ်ဆွေးနွေးမှုတွင် ယူကရိန်းဘက်ကို ကိုယ်စားပြုသော ကာကွယ်ရေးဝန်ကြီး ရပ်စ်တန် အူမီရော့ဗ်က အကျိုးရလဒ်ထွက်ပေါ်သော ဆွေးနွေးမှုများ သည် တနင်္ဂနွေနေ့ ညပိုင်းတွင် အဆုံးသတ်ခဲ့သည်ဟု ပြောကြားခဲ့သည်။
အစောပိုင်းတွင် ယူကရိန်းသမ္မတ ဇလန်းစကီးက ရုပ်သံထုတ်ပြန်ချက်တစ်ခုတွင် ပြောဆိုရာ၌ မိမိတို့ ကိုယ်စားလှယ်အဖွဲ့သည် လုံး၀ အပြုသဘောဆောင်သော သဘောထားဖြင့် ဆောင်ရွက်နေကြောင်းနှင့် ဆွေးနွေးပွဲ စကားဝိုင်းသည် အလွန်အသုံးဝင်ပြီး ကိုယ်စားလှယ်အဖွဲ့၏ လုပ်ငန်းတာဝန်များကို ဆက်လက်လုပ်ဆောင်နေသည်ဟု ပြောကြားခဲ့သည်။
မိမိတို့ အနေဖြင့် တိုက်ခိုက်မှုများ ရပ်တန့်ရေးအတွက် ရုရှားသမ္မတ ဗလာဒီမာပူတင်ထံမှ စစ်မှန်သော အမိန့်ပေးမှုမျိုး ထွက်လာအောင် လုပ်ဆောင်ရန်လိုအပ်ကြောင်း၊ စစ်ကို ဆောင်ကြဉ်းခဲ့သူသည် စစ်ကို ပြန်ရုပ်သိမ်းရမည်ဖြစ်ကြောင်း သူက ပြောကြားခဲ့သည်။
ဆွေးနွေးပွဲအစတွင် နှစ်ဖက်ကိုယ်စားလှယ်များသည် စွမ်းအင်နယ်မြေများ၊ အရေးကြီးသော အခြေခံအဆောက်အအုံများကို တိုက်ခိုက်ခြင်းမှ ကာကွယ်ရန် ဆွေးနွေးခဲ့ကြသည်ဟု အူမာရော့ဗ်က ပြောသည်။ တစ်စိတ်တစ်ပိုင်း အပစ်ရပ်စဲရေး သဘောတူညီချက်ကအမှန်တကယ် အသက်ဝင်လာရေးတွင် မော်စကိုနှင့် ကိဗ်တို့အကြား ကွဲပြားသော ကန့်သတ်ချက်များ ကို ပြောဆို နေကြခြင်းဖြင့် အငြင်းပွားဖွယ်ရာများဖြစ်နေသည်။
အမေရိကန်သံတမန် စတိဗ် ဝစ်ကော့ဖ်က ရုရှား-ယူကရိန်း စစ်ပွဲအဆုံးသတ်ရေးအတွက် အကောင်းမြင်သည်ဟု ယခု ဆွေးနွေးပွဲများ မတိုင်မီတွင် ထုတ်ဖော်ပြောဆိုခဲ့ပြီး ပူတင်သည် ငြိမ်းချမ်းရေး လိုချင်သည်ဟု သူ ယုံကြည်ကြောင်း Fox News ကို ပြောကြားခဲ့သည်။ “ဥရောပတစ်ခုလုံးကို သူလိုချင်နေတယ်လို့တော့ ကျွန်တော် မမြင်ပါဘူး” ဟု ဝစ်ကော့ဖ်က ဆက်လက် ပြောဆိုခဲ့သည်။
ရုရှားနှင့် အမေရိကန်ကိုယ်စားလှယ်များသည် တနင်္လာနေ့၌ ရီယာ့ဒ်တွင် သီးခြား တွေ့ဆုံဆွေးနွေးကြမည်ဖြစ်သည်။
ယင်းအတောအတွင်း ယူကရိန်းအပေါ် ရုရှား၏ ညပိုင်း ဒရုန်းတိုက်ခိုက်မှုများကြောင့် လူ ၇ ဦးထက်မနည်း ေ-သဆုံးခဲ့ပြီး ငြိမ်းချမ်းရေးဆွေးနွေးမှုများ မတိုင်မီတွင် နိုင်ငံအပေါ် ရုရှား၏ တိုက်ခိုက်မှုများ ရပ်တန့်ရန် ဖိအားပေးရေး အနောက်နိုင်ငံမဟာမိတ်များကို ဇလန်းစကီးက တိုက်တွန်းခဲ့သည်။
Ref: အယ်ဂျာဇီးယား