ငလျင်ဒဏ်ကြောင့် ပျက်စီးဆုံးရှုံးခဲ့ရသည့် နေရာဒေသများသို့ ကမ္ဘောဇဘဏ်ခွဲများမှ ဝန်ထမ်းများနှင့် အခြား ငလျင်ဘေးသင့်ဒေသများအတွက် လိုအပ်သည့် ကူညီကယ်ဆယ်ရေးလုပ်ငန်းများကို အချိန်နှင့်တပြေးညီ ဆောင်ရွက်လျက်ရှိကြောင်း သိရသည်။
ထိုသို့ဆောင်ရွက်ရာတွင် ကမ္ဘောဇဘဏ် နာယကကြီး ဦးအောင်ကိုဝင်း ဦးဆောင်သော ကမ္ဘောဇဘဏ်အဖွဲ့ဝင်များမှ ငလျင်လှုပ်ခတ်ပြီးသည်နှင့် တပြိုင်နက် နေ့လယ် (၂) နာရီအချိန်တွင် တောင်ကြီးမြို့၊ သစ်တောရပ်၊ ကားလေးကွင်းအတွင်း ငလျင်လှုပ်ခတ်မှုကြောင့် ကျောက်တုံးပိကာ လူနေဆိုင်ခန်းများ ပျက်စီးဆုံးရှုံးခဲ့မှုများကို ကိုယ်တိုင်သွားရောက် ကြည့်ရှုပြီး ဒဏ်ရာရရှိသူများအတွက် တစ်ဦးလျှင် ငွေကျပ် (၅၀၀၀၀၀) စီ ထောက်ပံ့ ပေးအပ်လှူဒါန်းခဲ့ကြောင်း သိရသည်။
ထို့ပြင် ရှမ်းပြည်တောင်ပိုင်း၊ ရွှေညောင်တိုက်နယ်ဆေးရုံသို့ သွားရောက်ပြီး ဆရာဝန်များ၊ ဝန်ထမ်းများနှင့် ကိုယ်ဝန်ဆောင်မိခင်များအတွက် ကူညီကယ်ဆယ် ထောက်ပံ့လှူဒါန်းပေးခဲ့ပြီး အောင်ပန်းမြို့၊ ဟိုတယ်အောင်ပန်းရှိ ကယ်ဆယ်ရေးအဖွဲ့ထံ အလှူငွေကျပ် သိန်း (၁၀၀)၊ ထမင်းထုပ်များနှင့် အရေးပေါ် ကူညီကယ်ဆယ်ရေး ပစ္စည်းအပြည့်အစုံတို့ကို ဆက်လက် ပံ့ပိုးလှူဒါန်းပေးခဲ့ကြောင်း ထုတ်ပြန်သည်။
အလားတူ ငလျင်ဒဏ်ကြောင့် ပြိုကျပျက်စီးသွားသော အောင်ပန်းမြို့ရှိ ဟိုတယ်အောင်ပန်းသို့ သွားရောက်၍ ကူညီကယ်ဆယ်ရေးလုပ်ငန်းများအား ဆောင်ရွက်ခဲ့ကြောင်း သိရသည်။
ထို့နောက် ယနေ့ မတ်လ(၂၉) ရက် နံနက်ပိုင်းတွင် ရှမ်းပြည်နယ်(တောင်ပိုင်း) အင်းလေးဒေသသို့ ကိုယ်တိုင် ဆက်လက်သွားရောက်ပြီး လိုအပ်သည့် ကူညီကယ်ဆယ်ထောက်ပံ့ရေး လုပ်ငန်းများကို အချိန်နှင့် တပြေးညီ ဆောင်ရွက်ပေးလျက်ရှိကြောင်းလည်း သိရသည်။