ကရင်ပြည်နယ်သို့ ၂၀၂၄ ခုနှစ်၏ (၁၁)လတာအတွင်း ခရီးသွား(၄)သိန်းခွဲကျော်လာရောက်လည်ပတ်ခဲ့၍ ပြည်နယ်ခရီးသွားလုပ်ငန်းမှာ ၁၀၀ ရာခိုင်နှုန်းကျော်တိုးတက်လာကြောင်း ဟိုတယ်နှင့်ခရီးသွားညွှန်ကြားမှုဦးစီးဌာနထံမှ သိရသည်။
၂၀၂၄ ခုနှစ်၏ (၁၁)လတာအတွင်း ပြည်တွင်း/ပြည်ပခရီးသွား(၄)သိန်းခွဲကျော် ကရင်ပြည်နယ်သို့ ဝင်ရောက်လည်ပတ်ခဲ့၍ ဟိုတယ်နှင့်တည်းခိုရိပ်သာများ၏ဝင်ငွေရရှိမှုမှာ ငွေကျပ်(၄၇၆၁၉ ဒဿမ ၁၈)သိန်းအထိရရှိခဲ့သဖြင့် ၁၀၀ ရာခိုင်နှုန်းကျော်တိုးတက်ရရှိခဲ့ကြောင်း သိရသည်။
ထို့ပြင် ကရင်ပြည်နယ်၏ ဟိုတယ်နှင့်ခရီးသွားကဏ္ဍတွင် လက်ရှိအချိန်၌ ဟိုတယ်နှင့်တည်းခိုရိပ်သာ(၆၀)လုံး၊ အိပ်ခန်းပေါင်း(၂၁၅၉)ခန်းရှိရာ လုပ်ငန်းလိုင်စင်ထုတ်ပေးနိုင်မှုတွင်လည်း (၂၂ ဒဿမ ၄၅)ရာခိုင်နှုန်းအထိ တိုးတက်လာခဲ့ကြောင်း သိရသည်။
ထိုသို့ ကရင်ပြည်နယ်၌ ခရီးသွားလုပ်ငန်းတိုးတက်လာခဲ့သဖြင့် ဟိုတယ်ဝန်ဆောင်မှုဆိုင်ရာ (အခြေခံ)သင်တန်းများဖြစ်သည့် ဧည့်ကြိုသင်တန်း၊ အိပ်ခန်းဆောင်ထိန်းသိမ်းရေးသင်တန်း၊ အစားအစာနှင့်အဖျော်ယမကာဧည့်ခံကျွေးမွေးရေးသင်တန်းတို့အား ဒီဇင်ဘာ ၁၆ ရက်မှ ဇန်နဝါ ရီ ၁၀ ရက်အထိဖွင့်လှစ်သင်ကြားခဲ့ရာ သင်တန်းသား၊ သင်တန်းသူ(၉၈)ဦးတက်ရောက်ခဲ့သည်။
အဆိုပါ သင်တန်းများ၏ သင်တန်းဆင်းပွဲကို ယနေ့ ဇန်နဝါရီ ၁၀ ရက်နံနက် ၉ နာရီက ဘားအံမြို့၌ကျင်းပရာ ကရင်ပြည်နယ်ဝန်ကြီးချုပ်ဦးစောမြင့်ဦးတက်ရောက်၍ သင်တန်းထူးချွန်ဆုရရှိသူများ၊ နည်းပြများအားဂုဏ်ပြုဆုနှင့် သင်တန်းဆင်းလက်မှတ်များကို ပေးအပ်ချီးမြှင့်ခဲ့သည်။
ကရင်ပြည်နယ်၏သာယာလှပသည့် ရေ၊မြေ၊တော၊တောင်သဘာဝရှုခင်းများ၊ လှိုဏ်ဂူများ၊ ရေတံခွန်၊ စိမ့်စမ်းများ၊ တိုင်းရင်းသားတို့၏ရိုးရာယဉ်ကျေးမှုဓလေ့ထုံးစံများ၊ ရာသီအလိုက်ပွဲတော်များနှင့် အရင်းအမြစ်အခြေခံကောင်းများပေါကြွယ်ဝမှုတို့ကြောင့် ပြည်တွင်း/ပြည်ပခရီးသွားများလာရောက်လည်ပတ်မှုများပြားလျက်ရှိသည်။