အမျိုးသား အားကစားပွဲတော် ဝင်ရောက်ယှဉ်ပြိုင်မည့် ကရင်ပြည်နယ် အားကစားအဖွဲ့များထံ ပြည်နယ်ဝန်ကြီးချုပ် ဦးစောမြင့်ဦးက ကရင်ပြည်နယ်၊ ဘားအံမြို့၊ ဇွဲကပင်ခန်းမ၌ နိုဝင်ဘာ (၂၂) ရက်က တွေ့ဆုံအားပေး၍ အောင်နိုင်ရေးအလံနှင့် ငွေကျပ်သိန်း (၂၀၀) ထောက်ပံ့ပေးအပ်လိုက်ကြောင်း သိရသည်။
ထို့အပြင် ပြိုင်ပွဲယှဉ်ပြိုင်နေစဉ်အတွင်း ရွှေ၊ ငွေ၊ ကြေးရရှိသည့် အားကစားသမားများကို ချက်ချင်းဆုကြေးငွေများ ချီးမြှင့်သွားမည်ဟု ကရင်ပြည်နယ်ဝန်ကြီးချုပ် က ပြောကြားခဲ့သည်။
ပြည်နယ်သို့ ပြန်ရောက်သည့်အခါတွင်လည်း ထိုက်ထိုက်တန်တန် ထောက်ပံ့ဂုဏ်ပြုချီးမြှင့်ပေးသွားမည် ဖြစ်သည့်အတွက် အနိုင်မခံ၊ အရှုံးမပေးစိတ်ဓာတ်ကို မွေးမြူပြီး နောက်ဆုံးအချိန်ထိ မလျှော့သော ဇွဲစိတ်ဓာတ်နှင့် ယှဉ်ပြိုင်ကြကာ ပြည်နယ်ဂုဏ်ကို ဆောင်နိုင်သော ပြည်နယ်ဂုဏ်ဆောင် ထူးချွန်အားကစားသမားများဖြစ်အောင် ကြိုးစားကြစေလိုကြောင်း ၎င်းက ဆက်လက်ပြောကြားခဲ့ပြီး ဆုငွေများ ပေးအပ်ခဲ့သည်။
နေပြည်တော်တွင် ကျင်းပပြုလုပ်မည့် ၂၀၂၄ ခုနှစ် ပဉ္စမအကြိမ်မြောက် အမျိုးသားအားကစားပွဲတော်သို့ ကရင်ပြည်နယ်မှ အားကစားနည်း (၂၃) နည်း၊ အားကစားသမားပေါင်း (၄၆၅) ဦး ဝင်ရောက်ယှဉ်ပြိုင်မည် ဖြစ်ကြောင်း သိရသည်။