ကူညီကယ်ဆယ်ရေးဆောင်ရွက်လိုသည့် မည်သည့်အဖွဲ့အစည်းမဆို ကြိုဆိုလက်ခံသွားမည်ဟု နစကထုတ်ပြန်

ငလျင်ကြောင့် ထိခိုက်ပျက်စီးခဲ့ရမှုများအား ကူညီကယ်ဆယ်ရေးဆောင်ရွက်လိုသည့် မည်သည့်အဖွဲ့အစည်းပင်ဖြစ်စေ
လုပ်ထုံးလုပ်နည်းနှင့်အညီအကြောင်းကြားသတင်းပို့လာပါက နိုင်ငံတော်အစိုးရအနေဖြင့် ကြိုဆိုလက်ခံသွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ၊ သတင်းထုတ်ပြန်ရေးအဖွဲ့ ထုတ်ပြန်ထားသည်။

လက်ရှိတွင် တရုတ်၊ ရုရှား၊ အိန္ဒိယ၊ ထိုင်း ၊ စင်ကာပူ၊ မလေးရှား၊ ဘင်္ဂလားဒေ့ရှ်၊ ဗီယက်နမ်၊ ယူအေအီး၊ လာအို၊ ဘယ်လာရုစ်၊ အင်ဒိုနီးရှား၊ ဘူတန်၊ ဖိလစ်ပိုင်၊ ဂျပန် ၊ တရုတ်(ဟောင်ကောင်) စသည့် နိုင်ငံပေါင်း ၁၅ နိုင်ငံမှ လေကြောင်းကူညီထောက်ပံ့မှု လေယာဉ် ၅၃ စီး၊ကယ်ဆယ်ရေးဝန်ထမ်းပေါင်း ၁၉၁၅ ဦး ရောက်ရှိပြီး ကယ်ဆယ်ရေးလုပ်ငန်းများဆောင် ရွက်လျက်ရှိကာ ထောက်ပံ့ရေးပစ္စည်း တန်ချိန် ၃၅၄ တန်ကျော် ကယ်ဆယ်ရေးပစ္စည်းတန်ချိန် ၄၉၅ တန်ကျော် ရောက်ရှိပြီးဖြစ်သည်ဟု ဆိုသည်။

နိုင်ငံတကာ ကူညီကယ်ဆယ်ရေးလုပ်ငန်းများ ဆောင်ရွက်ရာတွင် အသိပေးခြင်း၊ အကြောင်းကြားခြင်းများ ဆောင်ရွက်ရသည်ဟုလည်း ဆိုသည်။

ထို့ပြင် မိမိတို့နိုင်ငံအနေဖြင့် ယခုအချိန်တွင်ကူညီကယ်ဆယ်ရေးလုပ်ငန်းများ အင်တိုက်အားတိုက်ဆောင်ရွက်နေရသည့်အပြင် လက်နက်ကိုင်သောင်းကျန်းသူများ၏ အန္တရာယ်လည်းရှိသည့် အတွက် လက်နက်ကိုင်အဖွဲ့များ၏ နိုင်ငံရေးအမြတ်ထုတ်လိုမှုများရှိသောကြောင့် နိုင်ငံတော်အစိုးရအနေဖြင့် အကောင်းဆုံးဖြစ်စေရေး ချိန်ဆ၍ ဆောင်ရွက်နေရကြောင်း ဖော်ပြထားသည်။

မြန်မာနိုင်ငံတွင်အခက်အခဲများဖြစ်ပေါ်နေချိန်တွင် ကူညီကယ်ဆယ်ရေးလုပ်ငန်း များဆောင်ရွက်ပေးခြင်း၊ စာနာထောက် ထားပေးခြင်း၊ ထောက်ပံ့ပေးခြင်းတို့ ဆောင်ရွက်ပေးကြသည့် အဖွဲ့အစည်းများ နိုင်ငံများအားလုံးကို အထူးပင်ကျေးဇူးတင်ရှိကြောင်းနှင့် ကြိုတင် အကြောင်းကြားခြင်း အသိပေးခြင်းများ၊ လုံခြုံရေးအကူအညီ ရယူ ဆောင်ရွက်ခြင်းတို့အား ဝိုင်းဝန်းဆောင်ရွက်ပေးကြရန်အတွက်လည်း မေတ္တာရပ်ခံကြောင်း ထုတ်ပြန်ချက်တွင်ပါရှိသည်။