အခွန်ငွေကောက်ခံရရှိမှုတွေ နည်းပါးလျက်ရှိနေတာကြောင့် ဘဏ္ဍာငွေသုံးစွဲမှုနဲ့ ပတ်သက်ပြီး သက်ဆိုင်ရာဝန်ကြီးဌာနတွေ အဖွဲ အစည်းတွေ အနေနဲ့ တတ်နိုင်သမျှချွေတာ သုံးစွဲကြဖို့ လိုအပ်တယ်လို့ နစကဥက္ကဌက ပြောဆိုလိုက်ပါတယ်။
အိမ်စောင့်အစိုးရအဖွဲ့ အစည်းအဝေးရဲ့ အမှတ်စဉ် (၁/၂၀၂၁)မှာ ပြောကြားခဲ့တာဖြစ်ပြီး မဖြစ်မနေသုံးစွဲရမယ့် လုပ်ငန်း ကိစ္စရပ်တွေမှအပ အခြားကိစ္စရပ်တွေမှာ တတ်နိုင်သမျှချွေတာ သုံးစွဲဖို့ ဝန်ကြီးဌာနတွေနဲ့ အဖွဲအစည်းတွေကို တိုက်တွန်းခဲ့တာပါ။
အခွန်ငွေကောက်ခံရရှိမှု နည်းပါးနေတဲ့ အပေါ် နစကဥက္ကဌက နိုင်ငံတော် အစိုးရရဲ့ ဝင်ငွေဟာ အခွန်ငွေဖြစ်ပြီး ကိုဗစ်ကြောင့် စီးပွားရေးထိခိုက်မှုတွေ နဲ့ စီးပွားရေးကျဆင်းမှုတွေကြောင့် ကောက်ခံရရှိတဲ့ အခွန်ငွေနည်းပါနေရတာလို့ နစကဥက္ကဌက ပြောဆိုသွား တာရှိပါတယ်။
နောက်ပြီး ဝန်ကြီးဌာနတွေ၊ အဖွဲအစည်းတွေအနေနဲ့ သောက်သုံးရေနဲ့ လျှပ်စစ်မီး သုံးစွဲမှုတွေကို လေလွင့်မှု မရှိအောင် စနစ်တကျ သုံးစွဲကြဖို့လည်း နစက ဥက္ကဌက တိုက်တွန်းခဲ့တာလည်း တွေ့ရပါတယ်။
နိုင်ငံရေးအပြောင်းအလဲ ဖြစ်ခဲ့တဲ့ ဖေဖော်ဝါရီ ၁ရက်နောက်ပိုင်း အစိုးရရဲ့ အခွန်ငွေရ လမ်းကြောင်း တစ်ခုဖြစ်တဲ့ အောင်ဘာလေထီဟာ ထိုးနှံသူနည်းပါးသွားတာကြောင့် အောင်ဘာလေထီ မထွက်ရတဲ့ ကာလတွေနဲ့ အောင်ဘာလေထီထွက်သော်လည်းပဲ အမြင့်ဆုံးဆုကြေး သိန်း၅၀၀၀ဆုသာ ချီးမြှင့်ခဲ့ရတဲ့ အနေအထားတွေလည်း ရှိနေပါတယ်။
တစ်ဖက်မှာလည်း ပြည်ပရင်းနှီးမြှပ်နှံမှုအချို့ စွန့်ခွာသွားတာတွေနဲ့ ပြည်တွင်းစက်ရုံအလုပ်ရုံအချို့ ပိတ်သိမ်းတာကလည်း လုပ်သားတွေရဲ့ ဝင်ငွေရလမ်းအပြင် အစိုးရရဲ့ အခွန်ရငွေအပေါ်မှာပါ သက်ရောက်မှုတွေ ရှိခဲ့တယ်လို့ သိရပါတယ်။ ဒါ့အပြင် ကိုဗစ်ကြောင့် အသွားအလာကန့်သတ်မှု၊ဆိုင်တွေ ယာယီပိတ်ထားရမှု စတာတွေကလည်း နိုင်ငံ့စီးပွားရေးကို ထိခိုက်မှုတွေဖြစ်စေခဲ့တယ်လို့ လုပ်ငန်းရှင်အချို့က မှတ်ချက်ပြုပါတယ်။
လက်ရှိမှာတော့ ၂၀၂၁ ခုနှစ်၊ အောက်တိုဘာလမှ ၂၀၂၂ ခုနှစ်၊ မတ်လအထိ (၆) လ အတွက် ဘဏ္ဍာငွေ အရအသုံးခန့်မှန်းခြေငွေ စာရင်းတွေကို နစက ပြည်ထောင်စုအဆင့် ဌာနအဖွဲအစည်းတွေက ရေးဆွဲ တင်ပြလာနေကြပြီး နစက စီမံကိန်းနဲ့ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းနဲ့ အဖွဲ့က စိစစ်ဆောင်ရွက်နေတယ်လို့ သိရပါတယ်။
ဆက်လက်၍ နစက စီမံ၊ဘဏ္ဍာဝန်ကြီးက ထပ်မံစိစစ်ခြင်း၊ဘဏ္ဍာရေးကော်မရှင်က ထပ်မံစိစစ်ခြင်း၊နစက အစည်းအဝေးက ဆုံးဖြတ် အတည်ပြုခြင်းနဲ့ ၂၀၂၁ ခုနှစ်၊ အောက်တိုဘာလမှ ၂၀၂၂ ခုနှစ်၊ မတ်လအထိ (၆) လ အတွက် ဘဏ္ဍာငွေ အရ အသုံး ခန့်မှန်းခြေငွေစာရင်းတွေကို အတည်ပြုမယ်လို့ သိရပါတယ်။