အမေရိကန်ရွေးကောက်ခံသမ္မတ ဒေါ်နယ်ထရမ့်ပ်သည် နောက်လတွင်ပြုလုပ်မည့် သူ၏ သမ္မတကျမ်းသစ္စာ ကျိန်ဆိုပွဲအခမ်းအနားကို တက်ရောက်ရန် တရုတ်သမ္မတ ရှီကျင့်ဖျင်ကို ဖိတ်ကြားခဲ့သည်ဟု သတင်းရင်းမြစ်များစွာကို ကိုးကား၍ စီဘီအက်စ်သတင်းဌာနက ဗုဒ္ဓဟူးနေ့တွင် ဖော်ပြခဲ့သည်။
နိုဝင်ဘာ ၅ ရက် သမ္မတရွေးကောက်ပွဲအပြီး သိပ်မကြာခင် နိုဝင်ဘာလအစောပိုင်းကပင် ဇန်နဝါရီ ၂၀ ရက်တွင် ဝါရှင်တန်၌ ပြုလုပ်မည့် ကျမ်းသစ္စာဆိုပွဲတက်ရောက်ရန် ဖိတ်ကြားခဲ့ခြင်းဖြစ်ကြောင်းနှင့် ဖိတ်ကြားချက်ကို လက်ခံခဲ့သလားဆိုသည်ကိုမူ ရှင်းလင်းစွာမသိရကြောင်း စီဘီအက်စ်က ဆိုခဲ့သည်။
ယင်းသတင်းနှင့် ပတ်သက်၍ မှတ်ချက်ပေးရန် ဝါရှင်တန်ရှိ တရုတ်သံရုံးကို တောင်းဆိုခဲ့သော်လည်း လတ်တလောတွင် တုန့်ပြန်ဖြေကြားခြင်း မရှိဟု ဆိုသည်။
သောကြာနေ့က အင်န်ဘီစီသတင်းဌာနနှင့် အင်တာဗျူးတွင် သူနှင့် ရှီသည် အလွန်ကောင်းမွန်သော ဆက်ဆံရေးရှိကြောင်းနှင့် ယခုသီတင်းပတ်ကကဲ့သို့ပင် မကြာခင်ကလည်း အဆက်အသွယ်ရှိထားခဲ့ကြောင်း ထရမ့်ပ်က ပြောကြားခဲ့သည်။
အမေရိက၏ အဓိက ပထဝီနိုင်ငံရေးပြိုင်ဘက်ဖြစ်သော တရုတ်နိုင်ငံ၏ ခေါင်းဆောင်တစ်ဦးက အမေရိကန်သမ္မတကျမ်းကျိန်ပွဲတက်ရောက်မည့်ဖြစ်ရပ်သည် မကြုံစဖူးသည့် အကြောင်းအရာဖြစ်သည်။
ထရမ့်ပ်သည် အထက်လွှတ်တော်အမတ်မာကို ရူဘီယိုကို နိုင်ငံခြားရေးဝန်ကြီးအဖြစ် လျာထားမှုအပါအဝင် သူ၏ အစိုးရအဖွဲ့သစ်အတွက် တရုတ်အပေါ်အမြင်မကြည်သော နိုင်ငံရေးသမားများစွာကို အဓိကရာထူးများတွင် လျာထားခဲ့သည်။
Ref: အေအိုအယ်လ်