စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန ဆောင်းဒါး ရက်ကန်းနှင့် အသက်မွေးပညာသိပ္ပံမှ လူမှုဘဝဖွံ့ဖြိုး တိုးတက်ရေးကို တစ်ဖက်တစ်လမ်းမှ ကူညီထောက်ပံ့ ပေးလျက်ရှိရာ ယခုနှစ်အတွက် သင်တန်းသား/သူများအား ဇန်နဝါရီလမှစတင်ခေါ်ယူနေပြီဖြစ်ကြောင်း အမရပူရမြို့၊ ဆောင်းဒါးရက်ကန်းနှင့် အသက်မွေး ပညာသိပ္ပံ မှ သိရသည်။
ပုံမှန်သင်တန်း အတွက် (၁၀) တန်းအောင်၊ (၈) တန်းအောင်နှင့် (၄) တန်းအောင်များအား အသက် (၁၆)နှစ် မှ (၂၈)နှစ် အတွင်း အိမ်ထောင်မရှိသူ အပျို/လူပျိုများအား ခေါ်ယူသွားမည်ဖြစ်ပြီး တက်ရောက်ခွင့်ရရှိသော သင်တန်းသားများအနေဖြင့် ပညာသင်ထောက်ပံ့ကြေးများကိုလည်း ပေးအပ်သွားမည်ဖြစ်ကာ အခြားအသက်မွေးဝမ်းကျောင်း သင်တန်းများအတွက် အသက်ကန့်သက်ချက်နှင့် ပညာအရည် အချင်း ကန့်သတ်ချက်မရှိကြောင်း၊ သင်တန်းတိုင်းအတွက် ရေမီးအစုံဖြင့် အဆောင်အခမဲ့ နေထိုင်ခွင့် နှင့် သင်တန်းသုံးပစ္စည်းများအား အခမဲ့သုံးစွဲခွင့်ရရှိမည်ဖြစ်ကြောင်း သိရသည်။
သင်တန်းကာလအနေဖြင့် ပုံမှန်သင်တန်းများအတွက် တစ်နှစ်သင်တန်း၊ ခြောက်လသင်တန်းနှင့် သုံးလသင်တန်းရှိပြီး သင်တန်းအမျိုးအမည်အလိုက် ကာလကြာမြင့်မည်ဖြစ်ကြောင်း၊ ပုံမှန်သင်တန်းများတွင် သင်တန်းတက်ရောက်ပြီးပါက နိုင်ငံပိုင်၊ ပုဂ္ဂလိကပိုင်ချည်မျှင်နှင့် အထည်စက်ရုံများတွင် ဝင်ရောက်လုပ်ကိုင်နိုင်ပြီး အသေးစား စက်မှုလက်မှု လုပ်ငန်း ဦးစီးဌာန အောက်ရှိ ရုံးခွဲများ ရက်ကန်းကျောင်းများတွင် ဝန်ထမ်းအဖြစ် ဝင်ရောက် လုပ်ကိုင်နိုင်ကြောင်း၊ ကိုယ်ပိုင်ထုတ်လုပ်မှု လုပ်ငန်းများလည်း လုပ်ကိုင်နိုင်ကြောင်း သိရသည်။
အဆိုပါ သင်တန်းကျောင်းတွင် လေ့ကျင့်သင်ကြားပေးလျက်ရှိသော ပုံမှန်သင်တန်းများမှာ ချည်မျှင်နှင့် အထည်အလိပ် ဒီပလိုမာ သင်တန်း၊ ချည်မျှင်နှင့် အထည်အလိပ် ကျွမ်းကျင်သူ သင်တန်း၊ ရိုးရာ လွန်းရာကျ အချိတ်သင်တန်း၊ လက်ရက်ကန်းသင်တန်း၊ ရွှေချည်ငွေချည်ထိုး သင်တန်းများဖြစ်ပြီး အခြား အသက်မွေး ဝမ်းကျောင်း သင်တန်းများမှာ စက်ရက်ကန်း စက်မောင်း/စက်ပြင် သင်တန်း၊သဘာဝဆေး ဆိုးနည်း ပညာသင်တန်း၊အထည်ပန်း ပုံရိုက်ဆေးရေး ပန်းချီ သင်တန်း၊ရိုးရာဂျပ်ခုတ်နည်းသင်တန်း၊ အခြေခံစက်ချုပ် နည်းပညာသင်တန်း၊ လက်ရက်ကန်း အထည် ဒီဇိုင်းသင်တန်း၊ အခြေခံမော်တော် ဆိုင်ကယ်ပြုပြင် ထိန်းသိမ်းနည်းသင်တန်း၊ အခြေခံလျှပ်စစ်သံဂဟေဆက်သင်တန်းများ ဖွင့်လှစ် သင်ကြားပေးလျက် ရှိကြောင်းသိရသည်။