ဂျပန်တွင်ကိုဗစ်ကူးစက်သူ နှစ်သိန်းကျော်လာ

ဂျပန်တွင်ကိုဗစ်ကူးစက်သူ နှစ်သိန်းကျော်လာ

တိုကျို၊ဇူလိုင် ၂၃

စနေနေ့ကဖော်ပြခဲ့သော ရောဂါကူးစက်မှုမှတ်တမ်းအရ ဂျပန်တွင်ကိုဗစ်ကူးစက်‌နေသူ နှစ်သိန်းကျော်ရှိနေပြီဖြစ်ကြောင်းသိရသည်။အဆိုပါပမာဏသည် ပထမလှိုင်းမှစ၍ယခုသတ္တမလှိုင်းအတွင်း ကူးစက်မှုအမြင့်ဆုံးပမာဏဖြစ်သည်ဟုဖော်ပြထားသည်။

တိုကျိုတွင် ရောဂါကူးစက်မှုအသစ် ၃၂,၆၉၈ ခုရှိခဲ့ပြီး၊ တတိယအများဆုံးရက်ဖြစ်သည့်ကူးစက်သူ ၃၀,၀၀၀ ကို ကျော်လွန်ကာ ယခင်အပတ်စနေနေ့ကထက်ပင် ၁၃,၀၀၀ ကျော်တိုးလာခဲ့သည်။

တစ်နိုင်ငံလုံး၌နေ့စဉ် ပေါ်ထွက်နေသောလူနာအ‌ရေအတွက်သည် ၂၀၀,၉၇၅ ဦးသို့ရောက်ရှိပြီး ဖေဖော်ဝါရီ ၃ ရက်က ၁၀၄,၀၀၀ ဝန်းကျင်သို့ရောက်ရှိခဲ့သည့် ဆဌမလှိုင်း၏ အထွတ်အထိပ်ပမာဏထက်ပင်နှစ်ဆတိုးလာသည်။ယခုနောက်ဆုံးဖြစ်ပေါ်နေသောလှိုင်းသည် BA.5 ဟုသိကြသော ကူးစက်မြန် Omicron ၏မျိုးကွဲဖြစ်သည်။

နိုင်ငံအနှံ့အပြားတွင် မကြုံစဖူးသောကူးစက်မှုများရှိနေသော်လည်း Kishida က ၎င်း၏အစိုးရအနေဖြင့်အသွားအလာထိန်းချုပ်ရန်၊လော့ခ်ဒေါင်းချမှတ်ရန်မစဉ်းစားထားကြောင်းပြောကြားခဲ့သည်။

သို့သော် Tohoku University ဘွဲ့လွန်ကျောင်းမှ ပြည်သူ့ကျန်းမာရေးပါမောက္ခ Ken Osaka က “ရောဂါကူးစက်သူ အရေအတွက်ကို လျှော့ချဖို့စီမံ‌ဆောင်ရွက်မှု‌တွေ အပြည့်အဝလုပ်ရမယ့်ကာလကိုရောက်နေပါပြီ” ဟုလည်းဆိုသည်။

တိုကျိုတွင် စုစုပေါင်းလူ ၃,၄၃၄ ဦးသည် ကိုဗစ်ကြောင့်ဆေးရုံတင်ထားရပြီး ဆေးရုံရှိခုတင်ပမာဏ၏ ၄၆ ဒသမ ၅ ရာခိုင်နှုန်းဖြစ်သည်။၅၀ရာခိုင်နှုန်းအထက်ဆိုပါက မြို့တော်၏‌ဆေးရုံတွင် လူနာလက်ခံရန်အခက်အခဲရှိလာပြီဟု ဆိုလိုခြင်းဖြစ်သည်။

ဆေးရုံတိုင်းရှိ ကုတင်များတွင် လူနာများပြည့်လျှံနေသဖြင့် မီးသတ်နှင့်ဘေးအန္တရာယ်ဆိုင်ရာ စီမံခန့်ခွဲမှုအေဂျင်စီမှ လူနာတင်ယာဉ်များသည်လည်း ဆေးရုံပို့ဆောင်ရမည့်လူနာများအတွက်နေရာ‌အသည်းအသန်ရှာနေရသည်ဟုသိရသည်။ ကိုဗစ်ကြောင့်အပြင်းအထန် ဖျားနာသူဦးရေလည်း တိုးလာနေကြောင်းကျန်းမာရေးဝန်ကြီးဌာနကပြောသည်။

စနေနေ့မှစ၍ တိုကျိုရှိဆေးဘက်ဆိုင်ရာဝန်ထမ်းများနှင့်သက်ကြီးရွယ်အိုစောင့်ရှောက်ရေးလုပ်သားများသည် ၎င်းတို့၏စတုတ္ထအကြိမ်မြောက်ကိုဗစ် ကာကွယ်ဆေးများကို စတင်ထိုးနှံခဲ့သည်။မူလက စတုတ္ထအကြိမ်ဆေးထိုးနှံနိုင်သူများကို အသက် ၆၀ နှင့်အထက်သက်ကြီးရွယ်အိုများနှင့် ၁၈ နှစ်မှ ၅၉ နှစ်အတွင်းရှိပြီး မူလကကျန်းမာရေးအခံမကောင်းသူများကိုသာထိုးနှံပေးခြင်းဖြစ်သည်။

စတုတ္ထမြောက်ကာကွယ်ဆေးသည် ရောဂါပျံ့နှံ့မှုကိုတားဆီးရာတွင် အတိုင်းအတာတစ်ခုအထိ ထိရောက်မှုရှိကြောင်း ကျန်းမာရေးကျွမ်းကျင်သူအဖွဲ့တစ်ဖွဲ့က သောကြာနေ့တွင်ပြောကြားခဲ့သည်။

Source – Kyodo News