ငလျင်ကယ်ဆယ်ရေး၌စင်ကာပူ၏ ဆိုက်ဘော့ခ်ပိုးဟပ်များပါဝင်ကူညီနေ

သေဆုံးသူ ၃,၀၀၀ ကျော်လာသည့် မတ်လ ၂၈ ရက် နေ့က ပြင်းအား ၇ ဒဿမ ၇ အဆင့်ရှိ ငလျင်လှုပ်ခတ်အပြီးတွင် ရှာဖွေ ကယ်ဆယ်ရေးလုပ်ငန်းများ၌ ပါဝင်ကူညီရန်အတွက် စင်ကာပူနိုင်ငံမှ စက်တစ်ပိုင်း သက်ရှိတစ်ပိုင်း ဆိုက်ဘော့ခ် ပိုးဟပ် ၁၀ ကောင်ကို မြန်မာနိုင်ငံသို့ ပေးပို့ခဲ့သည်ဟု သိရသည်။

အဆိုပါ အင်းဆက်များကို မြန်မာနိုင်ငံသို့ ပို့ဆောင်ခဲ့ပြီးနောက် မတ်လ ၃၀ ရက် နေ့တွင် စင်ကာပူအရပ်ဖက် ကာကွယ်ရေးတပ်ဖွဲ့(SCDF) ၏ ရှာဖွေကယ်ဆယ်ရေးလုပ်ငန်းများတွင် ပူးပေါင်းပါဝင်ခဲ့သည်။

ကမ္ဘာပေါ်တွင် လူသားချင်းစာနာထောက်ထားမှုဆိုင်ရာ လုပ်ငန်းစဉ်များ၌ ယင်းကဲ့သို့ ဆိုက် ‌ေဘာ့ခ်များကို ပထမဆုံးအကြိမ် အသုံးပြုခြင်းဖြစ်သည်ဟု ဆိုသည်။

ထို့အပြင် အင်းဆက်ပေါင်းစပ် စက်ရုပ်များကို လုပ်ငန်းခွင်တွင် ပထမဆုံးအကြိမ် ဖြန့်ကျက်အသုံးပြုခြင်းလည်းဖြစ်သည်။

ဆိုက်ဘော့ခ်ပိုးဟပ်များကို Home Team Science and Technology Agency(HTX) က နန့်ယန်းနည်းပညာတက္ကသိုလ်၊ Klass Engineering and Solutions တို့နှင့် ပူးပေါင်း တီထွင်ခဲ့ခြင်းဖြစ်သည်။

၎င်းတို့ကို မတ်လ ၃၁ ရက်‌ေန့တွင် မြန်မာနိုင်ငံ၌ ပထမဆုံးအကြိမ် ဖြန့်ကျက်ချထားခဲ့ပြီး ဧပြီလ ၃ ရက် နေ့တွင် နေပြည်တော်၌ နှစ်ကြိမ် ဖြန့်ကျက်ချထားအသုံးပြုခဲ့သည်။

ဆိုက် ဘော့ခ်များအနေဖြင့် အသက်ရှင် ကျန်ရစ်သူများကို ရှာတွေ့မှုမျိုး မရှိသေးသော်လည်း ငလျင်ဒဏ်အဆိုးဝါးဆုံးခံခဲ့ရသော ဧရိယာအချို့တွင် ကယ်ဆယ်ရေးအဖွဲ့များကို မြေပြင်တွင် အကူအညီများ ပေးခဲ့သည်။

SCDF သည် အဖွဲ့ဝင် ၈၀ ဦးနှင့် ရှာဖွေရေး ခွေးလေးကောင်ကို မတ်လ ၂၉ ရက် နေ့တွင် မြန်မာနိုင်ငံသို့ စေလွှတ်ခဲ့သည်။

အနီအောက်ရောင်ခြည်နှင့် ကင်မရာများနှင့် အာရုံခံကိရိယာများ တပ်ဆင်ထားသည့် မာဒါဂါစကား ပိုးဟပ်သည် အရှည် ၆ စင်တီမီတာခန့်ရှိသည်။ ၎င်းတို့၏ သေးငယ်သော အရွယ်အစားကြောင့် အဝေးထိန်းစနစ်ဖြင့် ထိန်းချုပ်ထားစဉ် အပျက်အစီးများအောက်ရှိ သေးငယ်သောနေရာများကို သွားလာနိုင်သည်။

ပိုးဟပ်များကို လှုံဆော်ပေးရန်နှင့် လှုပ်ရှားမှုကို ထိန်းချုပ်ရန်အတွက် အီလက်ထရုတ်များကို အသုံးပြုသည်။

၎င်းတို့၏ ကင်မရာများနှင့် အာရုံခံကိရိယာများမှတဆင့် စုဆောင်းရရှိသော အချက်အလက်များကို သက်ရှိ၏ လက္ခဏာရပ်များ ရှိ/မရှိကို ဆုံးဖြတ်နိုင်သည့် machine-learning algorithm ဖြင့် လုပ်ဆောင်ကြောင်း သိရသည်။

Ref: သည်စထရိတ်တိုင်းမ်စ်