ယနေ့ မတ်လ (၂၈) ရက် နေ့လယ်ပိုင်းက မန္တလေးမြို့ အနီးကို ဗဟိုပြုလှုပ်ခတ်ခဲ့သည့် အင်းအားအလွန်ပြင်းသည့် ငလျင်လှုပ်ခတ်မှုဒဏ်ကြောင့် မန္တလေးလေဆိပ်ကို ပိတ်ထားရပြီး ရန်ကုန် – မန္တလေး ပြေးဆွဲနေသည့် အဝေးပြေးကားများလည်း ခရီးစဉ်များ ရပ်နားထားရကြောင်း သိရသည်။
ယနေ့ နေ့လယ် (၁) နာရီဝန်းကျင်က မန္တလေးမြို့ အရှေ့မြောက်ဘက် ကီလိုမီတာ (၂၀) အကွာကို ဗဟိုပြု၍ ပြင်းအား (၇. ၇) အဆင့်ရှိ အင်းအား အလွန်ပြင်းသော ငလျင် လှုပ်ခတ်ခဲ့ခြင်း ဖြစ်သည်။
အဆိုပါ ငလျင်ဒဏ်ကြောင့် မန္တလေး၊ နေပြည်တော်၊ စစ်ကိုင်း အပါအဝင် တိုင်းနှင့်ပြည်နယ်(၆) ခုတွင် အပျက်အစီးနှင့် ထိခိုက်ေ-သဆုံးမှု များခဲ့ခြင်း ဖြစ်သည်။
လတ်တလောရရှိထားသည့် မြေပြင်သတင်းများအရ နိုင်ငံတစ်ဝန်း ငလျင်ကြောင့် ေ-သဆုံးသူ ရာနှင့်ချီ ရှိနေပြီး ထိ ခိုက်ဒဏ်ရာရသူလည်း အများအပြားရှိနေကြောင်း သိရသည်။
အဆိုပါ ငလျင်ဒဏ်ကြောင့် မန္တလေး အပြည်ပြည်ဆိုင်ရာ လေဆိပ်အဆောက်အဦအချို့ ပြိုကျပျက်စီးမှုများရှိခဲ့ပြီး လေကြောင်းလိုင်းများ ယာယီပိတ်ထားရကြောင်း သိရသည်။ မန်းဖက်တွင် ငလျှင်သေးသေးလေးများလှုပ်ဆဲဟုလည်းဆိုသည်။
ထို့ပြင် ရန်ကုန် – မန္တလေး အမြန်လမ်းတွင်လည်း လမ်းပိုင်းအချို့နှင့် တံတားအချို့ ငလျင်ဒဏ်ကြောင့် ပျက်စီးမှုရှိခဲ့သည့်အတွက် ရန်ကုန် – မန္တလေး အဝေးပြေးယာဉ်လိုင်းများအားလုံး ယနေ့ ညခရီးစဉ်များအား ပိတ်ထားရကြောင်းသိရသည်။
” ဒီည ခရီးစဉ်အားလုံး ဖျက်ထားရပါတယ်။ အမြန်လမ်းက သွားလို့မရလို့ပါ။ မနက်ဖြန်အတွက်ကလည်း အတိအကျပြောလို့မရပါဘူး။ အသေးစိတ်ကို အချိန်နဲ့တပြေးညီ ဖုန်းဆက်မေးပေးပါ” ဟု ရန်ကုန် – မန္တလေး အဝေးပြေးယာဉ်လိုင်းတစ်ခုဖြစ်သည့် မန္တလာမင်း ယာဉ်လိုင်းမှ တာဝန်ရှိသူတစ်ဦးက ပြောသည်။
အချို့ယာဉ်များ ရန်ကုန် – မန္တလေး လမ်းဟောင်းမှ သွားလာမှုအနည်းငယ်ရှိနေသော်လည်း လက်မှတ်ဖြတ်မရတော့သည့်အခြေအနေရှိနေကြောင်းလည်း သိရသည်။
ယနေ့ လှုပ်ခတ်ခဲ့သည့် ငလျင်ဒဏ်ကြောင့် မန္တလေးမြို့တွင် သာသနိက အဆောက်အဦများ၊ ဟိုတယ်များ၊ အထပ်မြင့်တိုက်များအပါအဝင် ပျက်စီးဆုံးရှုံးမှုများခဲ့ပြီး ကယ်ဆယ်ရေးလုပ်ငန်းများပင် မနိုင်နင်းသေးသည့်အခြေအနေဖြစ်နေကြောင်း သိရသည်။