မြန်မာနိုင်ငံတွင် မူကြိုကလေးငယ် ၅၀ အပါအဝင် လူပေါင်း ၂,၇၀၀ ကျော်(ဧပြီ ၁ ရက် ညနေပိုင်းတွင် ၃,၀၀၀ နီးပါးရှိလာ) သေဆုံးခဲ့ပြီဖြစ်သော အင်အားပြင်းငလျင် လှုပ်ခတ်ပြီးနောက်တွင် အမိုးအကာ၊ စားနပ်ရိက္ခာနှင့် သောက်သုံးရေတို့ကို အရေးပေါ် လိုအပ်လျက်ရှိသည်ဟု ငလျင်ဒဏ်ကို အဆိုးဝါးဆုံးခံခဲ့ရသော ဒေသများ သို့ရောက်နေသော ကယ်ဆယ်ရေးအဖွဲ့များက ပြောကြားခဲ့သည်။ သို့ရာတွင် ပြည်တွင်းစစ်ကြောင့် လိုအပ်နေသူများထံ အကူအညီများရောက်ရှိနိုင်မှုကို အဟန့်အတားဖြစ်နိုင်သည်ဟုလည်း ၎င်းတို့က ဆိုသည်။
အင်္ဂါနေ့တွင် သေဆုံးသူ စုစုပေါင်း ၂,၇၁၉ ဦးနှင့် ဒဏ်ရာရသူစုစုပေါင်း ၄,၅၀၀ ကျော်ရှိခဲ့ပြီဖြစ်ကြောင်း မြန်မာအစိုးရခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ကိုးကား၍ တရုတ်ရုပ်မြင်သံကြားက သတင်းဖော်ပြခဲ့ပြီး သေဆုံးဦးရေသည် ၃,၀၀၀ ကျော်သွားနိုင်သည်ဟု ဗိုလ်ချုပ်မှူးကြီးက ပြောသည်ဟုလည်း ဆိုသည်။
သောကြာနေ့ မွန်းလွဲပိုင်းတွင် လှုပ်ခတ်ခဲ့သော ပြင်းအား ၇ ဒဿမ ၇ အဆင့်ရှိ ငလျင်သည် မြန်မာနိုင်ငံတွင် ရာစုနှစ်တစ်စုကျော်အတွင်း အပြင်းထန်ဆုံးငလျင်ဖြစ်ခဲ့ပြီး ရှေးဟောင်းဘုရားစေတီများနှင့် ခေတ်မီအဆောက်အအုံများပါ ပြိုကျခဲ့ရသည်။
မန္တလေးတိုင်းဒေသကြီးတွင် မူကြိုကျောင်းတစ်ကျောင်း ပြိုကျခဲ့ရာတွင် မူကြိုကလေးငယ် ၅၀ ဦးနှင့် သူတို့၏ ဆရာမနှစ်ဦး သေဆုံးခဲ့ရသည်ဟု ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံးက ပြောဆိုခဲ့သည်။
ငလျင်ဒဏ်ကို အဆိုးဝါးဆုံး ခံခဲ့ရတဲ့ ဒေသတွေမှာ လူမှုအသိုက်အဝန်းတွေဟာ ရေသန့်နဲ့ မိလ္လာစနစ်တို့လို သူတို့ရဲ့ အခြေခံလိုအပ်ချက်တွေ ရနိုင်ဖို့ ခက်ခဲနေကြပြီး ကယ်ဆယ်ရေးအဖွဲ့တွေက အသက်ရှင်ကျန်သူတွေကို ရှာဖွေဖို့နဲ့ အသက်ကယ် အကူအညီတွေ ပေးနိုင်ဖို့အတွက် မမောမပန်းလုပ်ဆောင်နေကြပါတယ်” ဟု ကုလအေဂျင်စီက အစီရင်ခံချက်တွင် ဖေါ်ပြထားသည်။
ငလျင်ဗဟိုချက်အနီး မန္တလေးကဲ့သို့သော နေရာများတွင် အမိုးအကာ၊ အစားအစာ၊ သောက်သုံးရေးနှင့် ဆေးဝါးများ လိုအပ်နေသည်ဟု နိုင်ငံတကာ ကယ်ဆယ်ရေးကော်မတီက ပြောကြားခဲ့သည်။
“ငလျင်ကို ကြောက်ရွံ့ထိတ်လန့်စွာ နေထိုင်နေကြရတဲ့ လူတွေဟာ နောက်ဆက်တွဲ ငလျင်တွေကို ကြောက်တာကြောင့် အခုအခါ လမ်းတွေပေါ်နဲ့ ကွင်းပြင်တွေမှာ အပြင်ထွက် အိပ်စက်နေကြရပါတယ်” ဟု မန္တလေးမှာ IRC ဝန်ထမ်းတစ်ဦးက ပြောသည်။
မြန်မာအစိုးရအနေဖြင့် ၎င်း၏ ထိန်းချုပ်မှုအောက်တွင် ရှိမနေသော ဒေသများသို့ အကူအညီများ ပေးပို့နိုင်ရေးကို ခွင့်ပြုပေးရန် လိုအပ်သည်ဟု အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့က ပြောကြားခဲ့သည်။
Ref: စီအင်န်ဘီစီ