အိန္ဒိယနိုင်ငံသည် ငလျင်ဒဏ်သင့် မြန်မာနိုင်ငံသို့ ဆေးဘက်ဆိုင်ရာ အထူးအဖွဲ့တစ်ဖွဲ့ စေလွှတ်သွားမည်ဖြစ်ကြောင်း စနေနေ့က သတင်းထုတ်ပြန်ချက်တွင် ကာကွယ်ရေးဝန်ကြီးဌာနက ပြောကြားခဲ့သည်။
လက်ရွေးစင် ဆေးတပ်မဟာ တစ်ခုဖြစ်သော Shatrujeet Brigade Medical Responders မှ အဖွဲ့ဝင် ၁၁၈ ဦးပါ အဖွဲ့သည် မရှိမဖြစ်လိုအပ်သော ဆေးပစ္စည်းကိရိယာများ၊ ထောက်ပံ့ရေးပစ္စည်းများနှင့်အတူ မြန်မာနိုင်ငံသို့ မကြာမီ ထွက်ခွာမည်ဟု ဆိုသည်။ Airborne Angels Task Force သည် သဘာဝဘေးဒဏ်သင့်ဒေသများတွင် ခေတ်မီ ဆေးဝါးကုသမှုနှင့် ခွဲစိတ်ကုသမှုများ ပြုလုပ်ပေးရန် ပစ္စည်းကိရိယာများ အပြည့်အစုံ ရှိပြီးလေ့ကျင့် သင်ကြားထားနေသော အဖွဲ့ဖြစ်သည်ဟု သတင်းထုတ်ပြန်ချက်တွင် ဆက်လက် ဖော်ပြထားသည်။
အိန္ဒိယစစ်တပ်သည် သဘာဝဘေးဒဏ်ကြောင့် ထိခိုက်ဒဏ်ရာရခဲ့သူများကို ချက်ချင်း ကုသစောင့်ရှောက်မှုများပေးရန်အတွက် ကုတင် ၆၀ ဆံ့ ကုသရေးစင်တာတစ်ခုကို ထူထောင်သွားမည်ဖြစ်ကြောင်းလည်း သတင်းထုတ်ပြန်ချက်တွင် ပြောကြားခဲ့သည်။
အဆိုပါစင်တာသည် ဒေသန္တရ ကျန်းမာရေးစောင့်ရှောက်မှုစနစ်ကို ပံ့ပိုးပေးသည့်အနေဖြင့် အရေးပေါ် ခွဲစိတ်ကုသမှုများနှင့် ထိခိုက်ဒဏ်ရာရသည့်လူနာများကို ကုသပေးမည်ဖြစ်သည်။
Ref: ရှင်းဟွာ