တရုတ်နိုင်ငံ ကူမင်းမြို့တွင် ဇန်နဝါရီလ ၂၁ ရက်ကကျင်းပ ပြုလုပ်ခဲ့သော အစည်းအဝေး၌ အွန်လိုင်းငွေလိမ်ဂိုဏ်းမျာကို အမြစ်ပြတ်နှိမ်နင်းသွားရေးအတွက် တရုတ်၊ မြန်မာ နှင့် ထိုင်းနိုင်ငံတို့မှ တာဝန်ရှိသူများ သဘောတူညီမှု ရရှိခဲ့သည်ဟု တရုတ်နိုင်ငံပိုင် စီစီတီဗီသတင်းဌာနက ဖော်ပြခဲ့သည်။
ထိုအစည်းအဝေးမှာပင် မြန်မာ၊ တရုတ်၊ လာအို၊ ကမ္ဘောဒီးယား၊ ထိုင်းနှင့် ဗီယက်နမ်နိုင်ငံတို့မှ အာဏာပိုင်များသည် ရာဇဝတ်ဂိုဏ်းများ၏ ခေါင်းဆောင်များကို ဖမ်းဆီးရေး၊ အွန်လိုင်းငွေလိမ်ဂိုဏ်းများကို ဖျက်သိမ်းရေးနှင့် ပိတ်မိနေသူများကို ကယ်တင်ရန်အတွက် အစွမ်းကုန်ညှိနှိုင်းဆောင်ရွက်သွားကြရန်လည်း သဘောတူညီခဲ့ကြသည်ဟု စီစီတီဗီက ဆိုခဲ့သည်။
ထိုင်း-မြန်မာနယ်စပ်အနီး ပျောက်ဆုံးခဲ့သော တရုတ်သရုပ်ဆောင်တစ်ဦး၏ အမှုဖြစ်စဉ်အပါအဝင် အမှုဖြစ်စဉ်များစွာ ပေါ်ပေါက်လာခဲ့ပြီးနောက် တရုတ်နိုင်ငံသည် အွန်လိုင်းငွေလိမ်ဂိုဏ်းများကို နှိမ်နင်းရာတွင် အရှိန်မြှင့်လုပ်ဆောင်လာခဲ့သည်။
မြန်မာနိုင်ငံသည် ၂၀၂၃ ခုနှစ်မှစတင်ကာ အွန်လိုင်းလိမ်ညာမှုများတွင် ပါဝင်ပတ်သက်နေသော တရုတ်နိုင်ငံသား ၅၃,၃၈၈ ဦးကို ချစ်ကြည်ရင်းနှီးသော ဆက်ဆံရေးနှင့် လူသာချင်းစာနာထောက်ထားမှု အခြေအနေများအရ တရားဥပဒေအရ အရေးယူခြင်းမရှိဘဲ ပြည်နှင်ဒဏ်ပေးခဲ့သည်ဟု ပေကျင်းရှိ မြန်မာနိုင်ငံ သံရုံးက ဇန်နဝါရီ ၂၁ ရက်တွင် ပြောဆိုခဲ့သည်။
မြန်မာအစိုးရသည် အွန်လိုင်းလောင်းကစားလုပ်ငန်းများကို အားပေးအားမြှောက်လုပ်ခြင်းမရှိဘဲ နှိမ်နင်းခြင်းသာရှိသည်ဟု သံရုံး၏ သတင်း ထုတ်ပြန်ချက်တွင် ဖော်ပြခဲ့ပြီး ငွေလိမ်ဂိုဏ်းများကို အမြစ်ဖြတ်ဖယ်ရှားရန်အတွက် အိမ်နီးချင်းနိုင်ငံများက ပူးပေါင်းဆောင် ရွက်ကြရန် တောင်းဆိုခဲ့သည်။
Ref: သည်စထရိတ်တိုင်းမ်စ်
