စစ်ကိုင်းတိုင်းဒေသကြီး၊ စစ်ကိုင်းမြို့၊ သကျမိတာသီလရှင်စာသင်တိုက် အဆောက်အဦပြိုကျပျက်စီး၍ ပိတ်မိနေသူများအနက် သီလရှင်(၁)ပါးအား အသက်ရှင်လျက်ကယ်ထုတ်နိုင်ခဲ့ပြီး ပျံလွန်တော်မူသည့် သီလရှင်(၃)ဦးတို့၏ ရုပ်အလေ-ာင်းများအား ရှာဖွေတွေ့ရှိခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သိရသည်။
ယနေ့ မတ်လ (၃၀)ရက်နေ့တွင် စစ်ကိုင်းတိုင်းဒေသကြီးမီးသတ်ဦးစီးမှူးရုံးမှ ရှာဖွေကယ်ဆယ်ရေးတပ်ဖွဲ့ဝင်များသည် သက်ဆိုင်ရာအဖွဲ့အစည်းများနှင့် ပူးပေါင်း၍ ရှာဖွေကယ်ဆယ်ရေးလုပ်ငန်းများဆောင်ရွက်ခဲ့ခြင်း ဖြစ်ကြောင်း သိရသည်။
မတ်လ(၂၈) ရက်၊ အင်အားရစ်(ချ်)တာစကေး ၇ ဒသမ ၇ အဆင့်ရှိ အင်အားအလွန်ပြင်းထန်သော မြေငလျင်လှုပ်ရှားမှုကြောင့် စစ်ကိုင်း၊ ပဲခူး၊ မန္တလေး၊ မကွေး၊ ရှမ်းပြည်နယ် အရှေ့မြောက်ဒေသ၊ နေပြည်တော်ကောင်စီနယ်မြေတို့ရှိ နေရာများကို အရေးပေါ် အခြေအနေအဖြစ် အစိုးရမှ ကြေညာထားပြီး သက်ဆိုင်ရာ တာဝန်ရှိသူများနှင့် အဖွဲ့အစည်း အသီးသီးမှလည်း ကယ်ဆယ်ရေးလုပ်ငန်းများ လုပ်ဆောင်လျက်ရှိကြောင်း သိရသည်။
ငလျင်ဘေးသင့်ဒေသများမှ လက်ရှိ နောက်ဆုံးကောက်ယူရရှိသော စာရင်းများအရ ေ-သဆုံးခဲ့ရသူ စုစုပေါင်း (၁၆၄၄) ဦး၊ ဒဏ်ရာရရှိသူ စုစုပေါင်း (၃၄၀၈) ဦး၊ ပျောက်ဆုံးနေသူ (၁၃၉) ဦး ဖြစ်ကြောင်းနှင့် အသေးစိတ် စာရင်းများအား ဆက်လက်ကောက်ယူလျက်ရှိကြောင်း သိရသည်။