ပြည်တွင်းဝယ်လိုအား နှေးကွေးနေမှု၊ ၂၀၂၅ ခုနှစ်ကုန်ပိုင်းတွင် အာရှ-ပစိဖိတ် ထိပ်သီးအစည်းအဝေး လက်ခံကျင်းပရန်ရှိနေမှုတို့ကြောင့် တောင်ကိုရီးယားသည် နိုင်ငံ၏ ခရီးသွားလုပ်ငန်းကို မြှင့်တင်ရန် ယခုနှစ် တတိယသုံးလပတ်တွင် တရုတ်ခရီးသွားများကို ဗီဇာကင်းလွတ်ခွင့်ပေးသွားမည်ဖြစ်ကြောင်း မတ် ၂၀ ရက်တွင် ပြောကြားလိုက်သည်။
တရုတ်အစိုးရက စီးပွားရေး၊ ခရီးသွားလာခြင်းနှင့် မိသားစုအလည်အပတ်ခရီးစဉ်များအတွက် တောင်ကိုရီးယား၊ အခြားအာရှနှင့် ဥရောပနိုင်ငံများမှ နိုင်ငံသားများကို ဗီဇာကင်းလွတ်ခွင့်ပေးထားခြင်း ကို ၂၀၂၅ ခုနှစ်ကုန်သည်အထိ သက်တမ်းတိုးရန် ပြီးခဲ့သည့် နိုဝင်ဘာလတွင် ဆုံးဖြတ်ခဲ့ပြီးနောက်တွင် တောင်ကိုရီးယား၏ ယခုအစီအစဉ် ထွက်ပေါ်လာခြင်းဖြစ်သည်။
“တရုတ်ခရီးသွားဦးရေ ပြန်လည်မြင့်တက်လာဖို့အတွက် တရုတ်နိုင်ငံက လာရောက်တဲ့ ခရီးသွားအုပ်စုတွေကို တတိယသုံးလပတ်ကာလမှာ ယာယီဗီဇာကင်းလွတ်ခွင့်ပြုသွားပါမယ်” ဟု တောင်ကိုရီးယား ယာယီသမ္မတ Choi Sang-mok က ပြောကြားခဲ့သည်။
နိုင်ငံသည် ၂၀၂၅ ခုနှစ် စတုတ္ထသုံးလပတ်ကာလတွင် နိုင်ငံအရှေ့တောင်ပိုင်းရှိ ရှေးဟောင်းအမွေအနှစ်ဆိုင်ရာ ခရီးသွားနေရာအဖြစ်သိကြသည့် Gyeongju မြို့တွင် အာ-ပစိဖိတ် စီးပွားရေးပူးပေါင်းဆောင်ရွက်မှုဖိုရမ်အတွက် နိုင်ငံ ၂၁ နိုင်ငံမှ စီးပွားရေးခေါင်းဆောင်များ၏ ထိပ်သီးအစည်းအဝေးကို လက်ခံကျင်းပသွားရန် စီစဉ်ထားသည်။
၂၀၂၄ ခုနှစ်တွင် တောင်ကိုရီးယားနိုင်ငံသို့ လာရောက်ခဲ့သော ခရီးသွားဦးရေ ၁၆ ဒဿမ ၄ သန်းရှိခဲ့ပြီး ယမန်နှစ်ကထက် ၄၈ ရာခိုင်နှုန်းမြင့်တက်ခဲ့ကာ ကိုဗစ်-၁၉ ကပ်ရောဂါမဖြစ်မီ ၂၀၁၉ ခုနှစ်ကမူ ၁၇ ဒဿမ ၅ သန်းရှိခဲ့သည်။ ယင်းတွင် တရုတ်ခရီးသွားဦးရေသည် ၂၈ ရာခိုင်နှုန်းဖြင့် အများဆုံးဝင်ရောက်ခဲ့သည်ဟု အစိုးရ၏ ကိန်းဂဏန်းအချက်အလက်များအရ သိရသည်။
ကေပေါ့ပ်ဂီတမှ အစပြု၍ ဖက်ရှင်အထိ တိုင် ကျော်ကြားသော တောင်ကိုရီးယား ယဉ်ကျေးမှုသည် ပြီးခဲ့သည့် ဆယ်စုနှစ်အနည်းငယ်အတွင်း ကမ္ဘာ့အသိအမှတ်ပြုမှုကို ရရှိခဲ့ပြီး အာဏာပိုင်များသည် ယင်းကို အရှိန်အဟုန်မြှင့် အသုံးချရန် စီစဉ်ထားသည်။
၂၀၂၅ ခုနှစ်တွင် ခရီးသွားဝင်ရောက်မှု ၁၈ ဒဿမ ၅ သန်းရောက်ရှိရေး မျှော်မှန်းချက်အတွက် ကိုရီးယား အစားအစာနှင့် အလှကုန်ပစ္စည်းများ ကို အလွယ်တကူ ရရှိစေမည့် လည်ပတ်စရာနေရာများကိုဖော် ထုတ် ဖန်တီးကာ ခရီးသွားများကို ပိုမိုဆွဲဆောင်မည့် နောက်ထပ်အစီအမံများအတွက်လည်း အစိုးရက ပြင်ဆင်မည်ဖြစ်သည်။
Ref: သည်စထရိတ်တိုင်းမ်စ်