မြန်မာ့တပ်မတော်(ရေ) တွင်တည်ဆောက်ခဲ့သည့် စစ်ရေယာဉ်များအနက် အရွယ်အစားအကြီးမားဆုံးဖြစ်သည့် အလျား(၁၃၅)မီတာရှိ ဖရီဂိတ်စစ်ရေယာဉ်ကြီးကို ယနေ့ ဒီဇင်ဘာ ၂၄ ရက်နံနက်ပိုင်းက “သာလွန်မင်း”ဟုအမည်ပေးပြီးနောက် ရေချပေးခြင်းအခမ်းအနားကျင်းပခဲ့ကြောင်း သိရသည်။
အဆိုပါ အခမ်းအနားကို ရန်ကုန်တိုင်း၊ သန်လျင်တပ်နယ်ရှိ ရေတပ်သင်္ဘောကျင်းဌာနချုပ်၌ ကျင်းပရာ နစက ဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်တက်ရောက်ခဲ့ကြောင်း သိရသည်။
အခမ်းအနားအတွင်း ဗိုလ်ချုပ်မှူးကြီးမင်းအောင်လှိုင်မှ စစ်ရေယာဉ်ကြီးတည်ဆောက်ရာတွင် ပါဝင်ဆောင်ရွက်ခဲ့သော အရာရှိ၊ စစ်သည်များအားတွေ့ဆုံနှုတ်ဆက်၍ ဂုဏ်ပြုလက်ဆောင်သစ်သီးခြင်း ပေးအပ်ပြီး ဖရီဂိတ်စစ်ရေယာဉ်ကြီးကို Ship lift Platform မှ ရေချခြင်းအားကြည့်ရှုအားပေးခဲ့သည်။
နိုင်ငံ၏ပြည်တွင်းရန်နှိမ်နင်းခြင်း၊ ပြည်ပရန်ကာကွယ်ခြင်းနှင့် တိုင်းပြည်ဖွံ့ဖြိုးတိုးတက်အောင် စံနှုန်းစနစ်များ ချမှတ်အကောင်အထည်ဖော်ဆောင်ရွက်ခဲ့သည့် သာလွန်မင်းတရားကြီးကို ဂုဏ်ပြုသောအားဖြင့် ဖရီဂိတ်စစ်ရေယာဉ်ကြီးအား “သာလွန်မင်း”ဟု အမည်ပေးအပ်ထားခြင်းဖြစ်ကြောင်း သိရသည်။
တပ်မတော်(ရေ)မှ အရာရှိ၊စစ်သည်များက ၂၀၁၇ ခုနှစ်၊ မတ်လတွင် စတင်တည်ဆောက်ခဲ့ခြင်းဖြစ်ကာ ရေယာဥ်ကိုယ်ထည်များခွဲခြားတည်ဆောက်ပြီး ရေယာဉ်ကိုယ်ထည်ကြီးအဖြစ် တွဲဆက်တည်ဆောက်ခဲ့ခြင်းဖြစ်သည်။
တပ်မတော်(ရေ) တွင်တည်ဆောက်ခဲ့သည့် စစ်ရေယာဉ်များအနက် အရွယ်အစားအကြီးမားဆုံးဖြစ်ပြီး ခေတ်မီစစ်ရေယာဉ်တစ်စီး၏ လိုအပ်ချက်များနှင့်အညီ နိုင်ငံတကာခေတ်မီ စစ်ရေယာဉ်ကြီးများနည်းတူ ကောင်းမွန်စေရန် ကြိုးပမ်းတည်ဆောက်ထားကြောင်း သိရသည်။
အဆိုပါ ရေယာဉ်ကြီးသည် အလျား ၁၃၅ မီတာ၊ အနံ ၁၄ ဒသမ ၅ မီတာ၊ အမြင့် ၉ မီတာ၊ ရေစူး ၄ ဒသမ ၁ မီတာ၊ ဝန်ပြည့်အလေးချိန် ၃၅၀၀ တန်ရှိပြီး အမြန်နှုန်း ၁ နာရီလျင် ရေမိုင် ၃၀ အထိမောင်းနှင်နိုင်မည်ဖြစ်သည်။
ထို့ပြင် ၂၁ ရာစု ရေတပ်များ ၏ ရည်မှန်းချက်တာဝန်များနှင့် စွမ်းရည်များကိုပိုင်ဆိုင်၍ မြန်မာ့ပင်လယ်ပြင်အတွင်း သမားရိုးကျနှင့်သမားရိုးကျမဟုတ်သော ခြိမ်းခြောက်မှုများကို ရှေ့တန်းကျကျကာကွယ်တားဆီးတိုက်ပွဲဝင်နိုင်ခြင်း၊ ကင်းလှည့်ထောက်လှမ်းခြင်း၊ အကြမ်းဖက်အဖွဲ့အစည်းများ၊ ကျူးကျော်မှုများကိုတိုက်ဖျက်ခြင်းနှင့် ရေပြင်နယ်နိမိတ်ကာကွယ် ခြင်း၊ မိမိနိုင်ငံပိုင်နက်ပင်လယ်ပြင်ကိုထိန်းချုပ်ခြင်း၊ လူသားချင်းစာနာထောက်ထားရှာဖွေကယ် ဆယ်ရေးလုပ်ငန်းများကိုလုပ်ဆောင်နိုင်စွမ်းရှိကြောင်းလည်း သိရသည်။