Tiangong အာကာသစခန်းမှ တရုတ်အာကာသယာဉ်မှူးနှစ်ဦးသည် အာကာသတွင် တစ်ကြိမ်တည်း အချိန်အကြာဆုံးလမ်းလျှောက်ခဲ့ခြင်းဖြင့် လွန်ခဲ့သည့် ဆယ်စုနှစ် ၂ ခုကျော်က အမေရိကန်အာကာသအစီအစဉ်က တင်ထားခဲ့သော ကမ္ဘာ့စံချိန်ကို ချိုးဖျက်ခဲ့သည်။
ရှန်ကျိူး-၁၉ အာကာသယာဉ် အဖွဲ့ဝင်များဖြစ်သော Cai Xuzhe နှင့် Song Lingdong တို့သည် ပေကျင်းစံတော်ချိန် ည ၉း၅၇ နာရီတွင် ၉ နာရီကြာ အထူးသီးသန့် လှုပ်ရှားမှု(EVA) ကို ပြီးမြောက်ခဲ့သည်ဟု တရုတ်အာကာသအေဂျင်စီ(CMSA) က ပြောဆိုခဲ့သည်။
ယခင်စံချိန်ကို ၂၀၀၁ ခုနှစ် မတ်လ ၁၁ ရက်က တင်ခဲ့ခြင်းဖြစ်ပြီး အမေရိကန်အာကာသယာဉ်မှူး James Voss နှင့် Susan Helms တို့က နိုင်ငံတကာအာကာသစခန်း ခရီးစဉ်အတွင်း Discovery အာကာသလွန်းပျံယာဉ် အပြင်ဘက်တွင် အချိန် ၈ နာရီ ၅၆ မိနစ်ကြာ နေထိုင်ခဲ့ခြင်းဖြစ်ကြောင်း နာဆာက ဆိုခဲ့သည်။
EVA ၉ နာရီစံချိန်သည် တရုတ်နိုင်ငံ၏ အာကာသလမ်းလျှောက်မှုသမိုင်းတွင် မှတ်တိုင်တစ်ခုစိုက်ထူနိုင်ခဲ့ခြင်းလည်းဖြစ်သည်။ ယခုနှစ်အစောပိုင်းက ရှန်ကျိူး-၁၈ အာကာသယာဉ်မှူးများဖြစ်သော Ye Guangfu နှင့် Li Guangsu တို့သည် Tiangong အပြင်ဘက်တွင် အချိန် ၈ နာရီ ၂၃ မိနစ်နေထိုင်ကာ အလားတူမစ်ရှင်ကို ပြီးမြောက်ထားခဲ့သည်။
Ref: ဘန်ကောက်ပို့စ်
