တရုတ်နိုင်ငံ၏ ရာသီဥတုရည်မှန်းချက်များပြည့်မီရန် ရင်းနှီးမြှုပ်နှံမှုဒေါ်လာ ၁၇ ထရီလီယံလိုအပ်ဟုကမ္ဘာ့ဘဏ်ဆို

ဝါရှင်တန်၊အောက်တိုဘာ ၁၃

တရုတ်နိုင်ငံသည် ၂၀၆၀ ပြည့်နှစ်တွင် အသား တင်ဓာတ်ငွေ့ထုတ်လွှတ်မှုလုံးဝကင်းစင်သွားစေရန် စွမ်းအင်နှင့်သယ်ယူပို့ဆောင်ရေးကဏ္ဍများတွင် စိမ်းလန်းသောအဆောက်အဦနှင့် နည်းပညာအတွက်ထပ်လောင်းရင်းနှီးမြှုပ်နှံမှုများပြုလုပ်နိုင်ရန် ကန်ဒေါ်လာ ၁၇ ထရီလီယံအထိလိုအပ်ကြောင်း တရုတ်နိုင်ငံ၏ ရာသီဥတုနှင့်ဖွံ့ဖြိုးတိုးတက်မှုဆိုင်ရာ စိန်ခေါ်မှုများ၏ ကမ္ဘာ့ဘဏ်အစီရင်ခံစာသစ်တွင်ဖော်ပြထားသည်။

ကမ္ဘာ့ဒုတိယစီး ပွားရေး အင်အား အကြီးဆုံး နိုင်ငံဖြစ်သောတရုတ်သည် ကြီးမားသောဈေးနှုန်းကိုကာမိစေရန်နှင့် လိုအပ်သောတီထွင်ဆန်းသစ်မှုများကို ထုတ်လုပ်ရန်ပုဂ္ဂလိကရင်းနှီးမြှုပ်နှံမှုများ လိုအပ်မည်ဖြစ်ကြောင်း နိုင်ငံ၏ရာသီဥတုနှင့် ဖွံ့ဖြိုးတိုးတက်မှုအစီရင်ခံစာတစ်ခုကပြောကြားခဲ့သည်။

ရာသီဥတုဖောက်ပြန်မှုသည် တရုတ်နိုင်ငံအတွက် သိသာထင်ရှားသောခြိမ်းခြောက်မှုတစ်ခုဖြစ်ပြီး အထူးသဖြင့် ၎င်း၏လူဦးရေထူထပ်ပြီးစီးပွားရေးအရအရေးပါသော အနိမ့်ပိုင်းရှိကမ်းရိုးတန်းမြို့များတွင်ပိုမိုဆိုးရွားသည်။ မတည်ငြိမ်သော ရာသီဥတုဖောက်ပြန်မှုကြောင့် ၎င်း၏စီးပွားရေးထွက်ကုန်အား ၂၀၃၀ ပြည့်နှစ်အစောပိုင်းတွင် ၀ ဒသမ ၅ ရာခိုင်နှုန်းမှ ၂ ဒသမ ၃ ရာခိုင်နှုန်းအထိ လျော့ကျစေခဲ့ကြောင်း အောက်တိုဘာ ၁၂ ရက် ဗုဒ္ဓဟူးနေ့တွင်ထုတ်ပြန်သည့် အစီရင်ခံစာအရသိရှိရသည်။

တရုတ်နိုင်ငံ၏ရေရှည်တိုးတက်မှုအလားအလာသည် အခြေခံအဆောက်အဦရင်းနှီးမြှုပ်နှံမှုမှ ဆန်းသစ်တီထွင်မှု၊ပို့ကုန်မှပြည်တွင်းစားသုံးမှုများအား စီးပွားရေးကိုပြန်လည်ချိန်ညှိခြင်းနှင့် နိုင်ငံတော်က ဦးဆောင်၍ အရင်းအမြစ်များခွဲဝေပေးသည့် ဈေးကွက်၏အပေါ်မှီခိုနေရသည် ဟုလည်း ကမ္ဘာ့ဘဏ်၏ အရှေ့အာရှနှင့်ပစိဖိတ်ဒေသဆိုင်ရာ ဒုတိယဥက္ကဌ Manuela Ferro ကပြောကြားခဲ့သည်။

တရုတ်နိုင်ငံသည်ကာဗွန်နည်းသော စီးပွားရေးစနစ်သို့မကူးပြောင်းပဲ ကမ္ဘာ့ရာသီဥတုမျှော်မှန်းချက်ပန်းတိုင်သို့ ရောက်ရှိရန်မဖြစ်နိုင်ကြောင်း အစီရင်ခံစာတွင်ဖော်ပြထားပြီး တရုတ်နိုင်ငံအနေဖြင့် ကမ္ဘာ့ကာဗွန်ဒိုင်အောက်ဆိုဒ် ၂၇ ရာခိုင်နှုန်းနှင့် ကမ္ဘာ့ဖန်လုံအိမ်ဓာတ်ငွေ့သုံးပုံတစ်ပုံကိုထုတ်လွှတ်ကြောင်းလည်းဖော်ပြထားသည်။

ယခုအပြောင်းအလဲတွင် ကြီးမားသည့်အရင်းအမြစ်အပြောင်းအလဲများ၊ဆန်းသစ်တီထွင်မှုများ၊စွမ်းအင်ထိရောက်မှုနှင့်ကုန်ထုတ်စွမ်းအားအရင်းအမြစ်မြှင့်တင်ရန်ကြီးမားသော ပြောင်းလဲမှုနှင့်နည်းပညာသစ်များလည်းလိုအပ်လိမ့်မည်” ဟုအစီရင်ခံစာကဆိုသည်။

သို့သော်တရုတ်၏ကာဗွန်မျှခြေလမ်းကြောင်းကိုသေချာစေရန်အတွက် ပုဂ္ဂလိကကဏ္ဍမှပူးပေါင်းပါဝင်မှုသည် အရေးကြီးသည် ဟုဆိုကာ ပိုမိုခန့်မှန်းနိုင်သော စည်းမျဉ်းစည်းကမ်းဝန်းကျင်တစ်ခုနှင့် ဈေးကွက်နှင့်ဘဏ္ဍာရေးဆိုင်ရာ ပိုမိုကောင်းမွန်သောလက်လှမ်းမီမှုအတွက် လိုအပ်ကြောင်းလည်းအလေးပေးဖော်ပြခဲ့သည်။

Source : Reuters