တရုတ်ဘာသာစကား ကျွမ်းကျင်မှုသင်တန်း (Training in Chinese Language Proficiency) ဖွင့်လှစ်နိုင်ရေး ရည်ရွယ်ချက်စာချွန်လွှာ (MOI)ကိုနေပြည်တော်ရှိ Jasmine Palace Hotel တွင် လက်မှတ်ရေးထိုးခဲ့ကြောင်း သိရသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့နှင့်ပူးပေါင်း၍ တရုတ်ဘာသာစကား ကျွမ်းကျင်မှုသင်တန်း ( Training in Chinese Language Proficiency ) ဖွင့်လှစ်နိုင်ရေးကို စီစဉ်ခြင်းဖြစ်ကြောင်း သိရသည်။
မြန်မာကုန်သွယ်မှုမြှင့်တင်ရေးအဖွဲ့အနေဖြင့် ယူနန်ပြည်နယ်ကုန်သွယ်ရေးကိုယ်စားလှယ်ရုံး၏ ကူညီပံ့ပိုးမှုနှင့် တရုတ်ဘာသာစကားကျွမ်းကျင်မှုသင်တန်း (ပထမအဆင့်) ကို ၂၀၂၄ ခုနှစ်၊ ဇွန်လ ၆ ရက်နေ့မှ စက်တင်ဘာလ ၂ ရက်နေ့အထိ ဖွင့်လှစ်သင်ကြားခဲ့ကြောင်း၊ သင်တန်းသား အရာထမ်း၊ အမှုထမ်း စုစုပေါင်း (၃၅) ဦး တက်ရောက်သင်ကြားခဲ့ပြီး သင်တန်းသားအားလုံး ပထမအဆင့် Level 1 ကို ဖြေဆိုအောင်မြင်ခဲ့ပြီး ဖြစ်ကြောင်း သိရသည်။
တရုတ်ဘာသာစကားကျွမ်းကျင်မှုသင်တန်းကို အဆင့်အလိုက် ဆက်လက်ဖွင့်လှစ်သွားနိုင်ရန် ရည်ရွယ်ပြီး မြန်မာကုန်သွယ်မှုမြှင့်တင်ရေးအဖွဲ့၊ ဟွာချောင်တက္ကသိုလ်နှင့် ယူနန် ပြည်နယ်ကုန်သွယ်ရေးကိုယ်စားလှယ်ရုံးတို့အကြား သုံးဦးသုံးဖလှယ် ပါဝင်သည့် ရည်ရွယ်ချက်စာချွန်လွှာကိုလက်မှတ်ရေးထိုးနိုင်ခဲ့မှုအပေါ် အသိအမှတ်ပြုဂုဏ်ယူကြောင်းမြန်မာကုန်သွယ်မှုမြှင့်တင်ရေးအဖွဲ့မှ ညွှန်ကြားရေးမှူးချုပ် ပြောကြားခဲ့သည်။
မြန်မာကုန်သွယ်မှုမြှင့်တင်ရေးအဖွဲ့နှင့် ဟွာချောင်တက္ကသိုလ်၊ မြန်မာနိုင်ငံဆိုင်ရာ ယူနန်ပြည်နယ် ကုန်သွယ်ရေး ကိုယ်စားလှယ်ရုံးတို့အကြား ရည်ရွယ်ချက်စာချွန်လွှာ (MOI ) အား လက်မှတ်ရေးထိုး လဲလှယ်ခဲ့ကြသည်။
အဆိုပါရည်ရွယ်ချက်စာချွန်လွှာအရ တရုတ်ဘာသာစကား ကျွမ်းကျင်မှုသင်တန်း Level 2 မှ Level 4 အထိ ဆက်လက်ဖွင့်လှစ် သင်ကြားနိုင်မည်ဖြစ်ပြီး ပညာရေးနှင့် လေ့ကျင့်ရေး စီမံကိန်းများ၊ စီးပွားရေးဆိုင်ရာ သုတေသနလုပ်ငန်းများနှင့် ပညာရပ်ဆိုင်ရာ ဆွေးနွေးပွဲများအား အပြန်အလှန် ကျင်းပဆောင်ရွက်သွားနိုင်မည်ဖြစ်ကြောင်း၊ Silk Road Chinese Government Scholarship ကို ဟွာချောင်တက္ကသိုလ်တွင် တက်ရောက်နိုင်ရေးလည်း ဆက်လက်ဆောင်ရွက်နိုင်မည်ဖြစ်ကြောင်း၊ စီးပွားရေးနှင့်ကုန်သွယ်မှုဆက်ဆံရေးများကိုလည်း ပိုမိုခိုင်မာစေမည်ဖြစ်ကြောင်း သိရသည်။