တရုတ်သမ္မတ ရှီကျင့်ဖိန်သည် ရုရှားနိုင်ငံသို့ နိုင်ငံတော်ခရီးစဉ်အဖြစ် တနင်္လာနေ့တွင် မော်စကိုမြို့သို့ ရောက်ရှိခဲ့သည်။ ရုရှားသမ္မတ ဗလာဒီမာပူတင်၏ ဖိတ်ကြားချက်အရ အဆိုပါ ခရီးစဉ်သည် မတ် ၂၀ ရက်မှ ၂၂ ရက်အထိ ၃ ရက်ကြာမြင့်မည်ဖြစ်ပြီး ရှီကျင့်ဖိန်၏ ရုရှားနိုင်ငံ ခရီးစဉ်သည် ချစ်ကြည်ရင်းနှီးမှု၊ ပူးပေါင်းဆောင်ရွက်မှုနှင့် ငြိမ်းချမ်းရေး ခရီးစဉ်ဖြစ်ကြောင်းဆိုသည်။
၎င်း၏ ခရီးစဉ်အတွင်း ရှီကျင့်ဖိန်သည် နှစ်နိုင်ငံ ဆက်ဆံရေးနှင့် နိုင်ငံတကာနှင့် ဒေသတွင်း အရေးကိစ္စများနှင့်ပတ်သက်၍ နက်နက်ရှိုင်းရှိုင်း အမြင်ချင်းဖလှယ် ဆွေးနွေးမည်ဖြစ်သည်။
ယခုခရီးစဉ်သည် နှစ်နိုင်ငံအကြား မဟာဗျူဟာမြောက် ညှိနှိုင်းဆောင်ရွက်မှုနှင့် လက်တွေ့ကျသော ပူးပေါင်းဆောင်ရွက်မှုကို လွယ်ကူချောမွေ့စေရန် ရည်ရွယ်ပြီး နှစ်နိုင်ငံဆက်ဆံရေး ဖွံ့ဖြိုးတိုးတက်ရေးတွင် အသစ်သော တွန်းအားများမြှင့်တင်ရန် ရည်ရွယ်ကြောင်း သိရသည်။
သမ္မတရှီနှင့်အတူ Cai Qi၊ Wang Yi၊ Qin Gang တို့နှင့်အတူ ဗဟိုပါတီနှင့် အစိုးရဌာနများမှ ထိပ်တန်းအရာရှိများ ယခုခရီးစဉ်တွင် လိုက်ပါသွားကြသည်။
ထိုအပြင် သမ္မတရှီသည် ယူကရိန်းသမ္မတဇလန်းစကီးနှင့်လည်း ဖုန်းဖြင့် တွေ့ဆုံဆွေးနွေးရန်ရှိသည်ဟု သတင်းများထွက်ပေါ်နေသည်။ ယင်းသည် ရုရှား-ယူကရိန်းစစ်ပွဲစတင်ပြီးနောက် ဇလန်းစကီးနှင့် ပထမဆုံးအကြိမ် တရားဝင် ဆွေးနွေးခြင်းဖြစ်လာမည်။
“တရုတ်နိုင်ငံရဲ့ နိုင်ငံခြားရေးမူဝါဒ ရည်ရွယ်ချက်က ကမ္ဘာ့ငြိမ်းချမ်းရေးကို ထိန်းသိမ်းဖို့နဲ့ ဘုံဖွံဖြိုးတိုးတက်မှုကို မြှင့်တင်ဖို ဖြစ်ပါတယ်” ဟု ယူကရိန်းအရေးနှင့် ပတ်သက်၍ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝမ်ဝန်ပင်းက ပြီးခဲ့သည့်ရက်အနည်းငယ်အတွင်းက မှတ်ချက်ပြုပြောကြားခဲ့ပြီး တရုတ်နိုင်ငံအနေဖြင့် ငြိမ်းချမ်း၍ ဆွေးနွေးညှိနှိင်းမှုဘက်ခြမ်းနှင့် သမိုင်း၏ မှန်ကန်သောဘက်ခြမ်း၌ အစဉ်အမြဲ ရပ်တည်လျက်ရှိကြောင်း ဖြည့်စွက်ပြောကြားခဲ့သည်။
