တရုတ်သမ္မတ ရှီကျင့်ဖျင်ဟာ MIG-29 ဂျက်တိုက်လေယာဉ်တွေ ဝန်းရံထားတဲ့ တင်းကြပ်သော လုံခြုံရေးခရီးစဉ်ဖြင့် အင်္ဂါနေ့မှာ ဆာဘီးယားနိုင်ငံကို ဆိုက်ရောက်ခဲ့ကြောင်း သိရပါတယ်။ တရုတ် သတင်းသမား သုံးဦး ေ-သဆုံ-းခဲ့တဲ့ တရုတ်သံရုံးကို နေတိုးက ဗုံးကြဲတိုက်ခိုက်ခဲ့မှု ၂၅ နှစ်မြောက် နှစ်ပတ်လည်နေ့နဲ့ တိုက်ဆိုင်စွာ ရှီရောက်ရှိခဲ့တာလည်းဖြစ်ပါတယ်။
ငါးနှစ်အတွင်း ရှီရဲ့ ပထမဆုံး ဥရောပခရီးမှာ ပြင်သစ်နိုင်ငံနဲ့ အစပြုခဲ့ပြီးနောက် ဒုတိယခရီးအဖြစ် ဘဲလ်ဂရိတ်ကို ရောက်ရှိလာတာဖြစ်ပြီး ယင်းနောက်မှာ ဟန်ဂေရီနိုင်ငံကို ဆက်လက်သွားရောက်မှာဖြစ်ပါတယ်။ ဆာဘီးယားဟာ ဘော်လ်ကန်ဒေသမှာ တရုတ်ရဲ့ အရေးအပါဆုံး မိတ်ဖက်နိုင်ငံအဖြစ် ရှုမြင်ကြပြီး ရှီအနေနဲ့ တရုတ်ရဲ့ ဘီလီယံများစွာသော ရင်းနှီးမြုပ်နှံမှုတွေနဲ့ သဘောတူညီချက်အသစ်တွေအတွက် ဆွေးနွေးသွားဖို့ မျှော်လင့်ရပါတယ်။
ဆာဘီးယားသမ္မတ အလက်ဆန်ဒါ ဗူဆစ်နဲ့ အစိုးရတာဝန်ရှိသူတွေက ရှီကို ဘဲလ်ဂရိတ်လေဆိပ်မှာ ကြိုဆိုနှုတ်ဆက်ခဲ့ကြပြီး ဂုဏ်ပြုတပ်ဖွဲ့၊ ရိုးရာအကတွေနဲ့ ကြိုဆိုခဲ့ကြပါတယ်။ ခေါင်းဆောင်နှစ်ဦးဟာ ဗုဒ္ဓဟူးနေ့မှာ အစည်းအဝေးပြုလုပ်သွားကြမှာ ဖြစ်ပါတယ်။
၁၉၉၉ ခုနှစ် မေ ၇ ရက်က နေတိုးရဲ့ တိုက်ခိုက်မှုအတွင်း တရုတ်နိုင်ငံသား ၂၀ ခန့်လည်း ဒဏ်ရာရခဲ့ပြီး ယင်းဖြစ်ရပ်ကြောင့် တရုတ်ကို ဒေါသအမျက်ထွက်စေခဲ့သလို ယင်းအချိန်က အမေရိကန်သမ္မတ ဘီလ်ကလင်တန်က တောင်းပန်ခဲ့ရပါတယ်။ ကိုဆိုဗိုမှာ အယ်လ်ဘေးနီးယားလူမျိုးတွေကို နှိမ်နင်းမှုလုပ်နေတဲ့ ဆာဘီးယားအာဏာရှင် ဆလိုဗိုဒန် မီလိုဆီဗစ်ရဲ့ လုပ်ရပ်ကို အဆုံးသ-တ်စေဖို့အတွက် တစ်ချိန်က ယူဂိုဆလားဗီးယားကို ဗုံးကြဲတို-က်ခို-က်မှုလုပ်ခဲ့စဉ် တရုတ်သံရုံးကို ထိမှန်ခဲ့တာဖြစ်ပါတယ်။
“တရုတ်ပြည်သူတွေဟာ ငြိမ်းချမ်းရေးကို တန်ဖိုးထားပေမယ့် သမိုင်းဝင် ဖြစ်ရပ်ဆိုးကြီး ပြန်ဖြစ်လာမှာမျိုးကို လုံး၀ ခွင့်မပြုပါဘူး” လို့ အင်္ဂါနေ့က Politika သတင်းစာ သဘောထားအမြင်ဆောင်းပါးမှာ ရှီက ပြောဆိုခဲ့ပါတယ်။
ဘဲလ်ဂရိတ်မြို့ လမ်းတွေပေါ်မှာ တရုတ်နိုင်ငံအလံတွေနဲ့ စာတမ်းတွေ ချိတ်ဆွဲထားပြီး ရဲတပ်ဖွဲ့ဝင် ထောင်ပေါင်းများစွာက ရှီနဲ့ သူ့ရဲ့ အဖွဲ့ဝင် ၄၀၀ အတွက် လုံခြုံရေးပေးခဲ့ကာ ဒါဟာ နှစ်ပေါင်းများစွာအတွင်း နိုင်ငံခြားခေါင်းဆောင်တစ်ဦးရဲ့ အမြင့်ဆုံးအဆင့် ခရီးစဉ်ဖြစ်ပါတယ်။
၂၀၁၆ ခုနှစ်က သူ့ရဲ့ ပထမဆုံး ဘဲလ်ဂရိတ်ခရီးစဉ်အတွင်း နှစ်နိုင်ငံ မဟာဗျူဟာမြောက်ဆက်ဆံရေးကို လက်မှတ်ရေးထိုးခဲ့ပါတယ်။ ပြီးခဲ့တဲ့နှစ်က ဗူစစ်ဟာ ပေကျင်းကို သွားရောက်ခဲ့ရာမှာ ဇူလိုင်လမှာ စတင်လည်ပတ်မယ့် လွတ်လပ်စွာ ကုန်သွယ်ရေးသဘောတူညီချက် အပါအဝင် သဘောတူညီချက် ၁၈ ခုကို ရှီနဲ့ လက်မှတ်ရေးထိုးခဲ့ကြောင်း သိရပါတယ်။
Ref: DH