တရုတ်နိုင်ငံအစိုးရအစီအစဉ်ဖြင့် ထောက်ပံ့သည့် ပထမဆုံးအသုတ် ငလျင်ကယ်ဆယ်ရေးနှင့် ကူညီရေးပစ္စည်းများကို ယနေ့ မတ်လ (၃၁)ရက်၌ ပေကျင်း မြို့တော်အပြည်ပြည်ဆိုင်ရာလေဆိပ်မှစတင်ပို့ဆောင်ခဲ့ကြောင်း သိရသည်။
ပထမဆုံးအသုတ် ကူညီရေးပစ္စည်းများကို စင်းလုံးငှားလေယာဉ်ဖြင့် ရန်ကုန်သို့ ပို့ဆောင်မည်ဖြစ်ပြီး၊ရွက်ဖျင်တဲ(၁,၂၀၀) လုံး၊ ခြုံစောင် (၈,၀၀၀) ၊ အရေးပေါ်ကယ် ဆယ်ရေးအိတ် (၄) သောင်းကျော်ပါဝင်သည်ဟု တရုတ်နိုင်ငံ နိုင်ငံတကာ ဖွံ့ဖြိုးတိုးတက်ရေးနှင့် ပူးပေါင်းဆောင်ရွက်ရေးအေဂျင်စီ (CIDCA)၏ အသိပေးချက်အပေါ်ဆင်ဟွာသတင်းဌာန ဖော်ပြထား သည်။
အဆိုပါ ကူညီရေးပစ္စည်းများသည်
မြန်မာနိုင်ငံအစိုးရ၏ တောင်းဆိုချက်အရ တရုတ်နိုင်ငံအစိုးရမှ ယွမ်သန်း (၁၀၀) တန်ဖိုးရှိလူသားချင်းစာနာမှု ငလျင်ကယ်ဆယ်ရေး အကူအညီများ ပေးအပ်ရန် ဆုံးဖြတ်ခဲ့ခြင်းဖြစ်ကြောင်း သိရသည်။
ထို့အပြင် တရုတ်နိုင်ငံဘက်က မြန်မာဘက်သို့ သောက်သုံးရေ၊ စားသုံးရန်လွယ်ကူသော စားသောက်ကုန် စသည့် အရေးပေါ်လိုအပ်သော ပစ္စည်းများကိုလည်း ထောက်ပံ့သွားမည်ဖြစ်ပြီး လက်ရှိတွင် ကုန်ပစ္စည်းများအား အရေးပေါ်စုစည်းလျက်ရှိကာ မကြာရက်ပိုင်း၌ ငလျင်ဒဏ်သင့်ဒေသများသို့ ဆက်တိုက်ပို့ဆောင်သွားမည်ဖြစ်ကြောင်း သိရသည်။