တောင်ကြီးမြို့တွင် ရှမ်းပြည်နယ်မြောက်ပိုင်း စစ်ရှောင်များ နေထိုင်ရေး လိုအပ်ချက်များပြားလာသည့်အတွက် အိမ်ငှားရမ်းခ ဈေးနှုန်းများ မြင့်တက်လာသည်ဟု တောင်ကြီးမြို့၊နမ့်ခုံး ပရဟိတအသင်းတာဝန်ခံတစ်ဦးက ပေါ်ပြူလာနယူးစ်ကိုပြောသည်။
လက်ရှိတောင်ကြီးမြို့တွင် ယခင် ကျပ်တစ်သိန်းတန် အခန်းတစ်ခန်းလျှင် ကျပ်(၂)ခွဲ ဝန်းကျင်နှင့် ကျပ် (၃)သိန်းတန် အခန်းတစ်ခန်းလျှင် ကျပ်(၆)သိန်းအထိ တဖြည်းဖြည်း မြင့်တက်လျှက်ရှိကြောင်း ဆိုသည်။
“အခုက စစ်ရှောင်တွေနေထိုင်ရေးအရ လိုအပ်ချက်များ လာတာတွေကြောင့် ဈေးတွေ တက်လာတယ်။ စက်တင်ဘာလလောက်ကတည်းက အိမ်ငှားရမ်းခတွေ တက်လာနေတာ”ဟု ၎င်းက ရှင်းပြသည်။
ငွေကြေးမတတ်နိုင်သည့် စစ်ရှောင်များကို တောင်ကြီးမြို့ ရှမ်းပဋိကတ်ကျောင်း၊ ရှမ်းစာပေနှင့်ယဉ်ကျေးမှု၊ နမ့်ခုံးပရဟိတရုံးနေရာတွင် ခိုလှုံခွင့်ပေးထားသည့်အပြင် စားသောက်ရေးအတွက် ဆန်၊ ဆီ၊ ဆား ကြက်သွန်၊ ငရုတ်စသည့် အခြေခံ စားသောက်ကုန်ပစ္စည်းများထောက်ပံ့ထားရှိကြောင်းသိရသည်။
“ကျွန်တော်တို့ တစ်ဦးကို ကျပ်ငါးထောင်နှုန်း ဒါမှမဟုတ် ခုနှစ်ထောင်နှုန်း ဈေးဖိုးပေးပါတယ်။ ဆန်၊ ဆီ၊ ဆား၊ ပဲ၊ ကြက်သွန်၊ ငရုတ် စသဖြင့်ပေါ့။ ဒါလည်း နိုင်သမျှထောက်ပံ့ထားတယ်။ အခုတော့ စစ်ရှောင်ဦးရေ (၂၆၀)လောက် ရှိနေတာပေါ့”ဟု ၎င်းကဆိုသည်။
အလားတူ အချို့သော ရှမ်းမြောက် စစ်ဘေးရှောင်များမှာ တောင်ကြီးမြို့ အိမ်ငှားရမ်းဈေးများ မတတ်နိုင်သဖြင့် အေးသာယာ၊ ကလော ၊ ညောင်ရွှေ ၊ ရွှေညောင်စသည့် ဒေသများရှိ ဈေးသက်သာသည့်နေရာများသို့ ပြောင်းရွှေ့နေထိုင်သူများလည်း ရှိနေသည်ဟုဆိုသည်။
မြန်မာပြည်တစ်ဝန်း တိုက်ပွဲများကြောင့် ပြည်တွင်း ရွှေ့ပြောင်းနေထိုင်သူ ရာခိုင်နှုန်းမြင့်တက်လျက်ရှိပြီး၊ ရန်ကုန်၊မန္တလေးအပါအဝင် အခြားသော မြို့များတွင်လည်း နေထိုင်မှု လိုအပ်ချက်များကြောင့် အိမ်ငှားရမ်းဈေးနှုန်းများ မြင့်တက်လာလျက်ရှိသည်။
ပုံစာ – တောင်ကြီးမြို့သို့ ရောက်ရှိလာကြသည့် ရှမ်းမြောက်စစ်ဘေးရှောင် အချို့(ပုံဟောင်း)