“ထာဝရ မိတ်ဆွေများဖြစ်၊ မည်သည့်အခါကမှ ရန်သူမဟုတ်”–ဝမ်ယိ

တရုတ်နိုင်ငံခြားရေးဝန်ကြီး ဝမ်ယိသည် ဧပြီ (၁) ရက်နေ့က မော်စကိုသို့ သွားရောက်ခဲ့သည့် ခရီးစဉ်အတွင်း တရုတ်နှင့် ရုရှားတို့သည် “ထာဝရ မိတ်ဆွေများဖြစ်ပြီး မည်သည့်အခါကမှ ရန်သူများ မဟုတ်” ဟု ပြောကြားခဲ့ကာ ဝါရှင်တန်နှင့် မော်စကိုအကြား ဆက်ဆံရေး ပုံမှန်ပြန်ဖြစ်မည့် လက္ခဏာတွေ့ရခြင်းကို ကြိုဆိုသည်ဟုလည်း ဆိုခဲ့သည်။

“ထာဝရ မိတ်ဆွေ” ဟူသော မူသည် ပိုမိုမြင့်မားသောအဆင့်တစ်ခုတွင် မဟာဗျူဟာမြောက် ပူးပေါင်းဆောင်ရွက်မှုကို မြှင့်တင်ရန်အတွက် ခိုင်မာသော တရားဝင်မှုအခြေခံတစ်ခုအဖြစ် ထမ်းဆောင်သည်ဟု မစ္စတာ ဝမ်က ရုရှား၏ အာအိုင်အေ သတင်းဌာနနှင့် အင်တာဗျူးတွင် ပြောကြားခဲ့သည်။

မစ္စတာဝမ်သည် အရေးကြီးသော ပူးပေါင်းဆောင်ရွက်ရေး ဆွေးနွေးမှုများအတွက် မော်စကိုသို့ သုံးရက်ကြာ အလည်အပတ်ရောက်ရှိနေခြင်းဖြစ်သည်။ ယူကရိန်းစစ်ပွဲ အပစ်အခတ်ရပ်စဲမှု ရရှိရေး ဆွေးနွေးပွဲများ သည် မရေရာ မသေချာဖြစ်နေကာ အမေရိကန်သမ္မတ ဒေါ်နယ်ထရမ့်ပ်က ရုရှားနှင့် ယူကရိန်းခေါင်းဆောင်များကို ဝေဖန်မှုများလုပ်နေသည့် အခြေအနေတွင် သူ၏ခရီးစဉ်က ပေါ်ပေါက်လာခြင်းဖြစ်သည်။

မစ္စတာ ပူတင်သည် ဝမ်ကို လက်ခံတွေ့ဆုံသွားမည်ဖြစ်သည်ဟု ခရမ္မလင်က မတ်လ ၃၁ ရက်‌နေ့တွင် ပြောကြားခဲ့ပြီး ဝမ်သည် ရုရှားနိုင်ငံခြားရေးဝန်ကြီး ဆာဂီလက်ဗ်ရော့ဗ်နှင့် လည်းဆွေးနွေးသွားမည်ဖြစ်သည်။

လက်ရှိ ကမ္ဘာ့အခြေအနေများအရ အင်အားကြီးနိုင်ငံများသည် အခြေအနေများကို တည်ငြိမ်အောင် ဆောင်ရွက်ရန် တာဝန်ရှိပါကြောင်း၊ ယင်းအတွက်ကြောင့် ရုရှားနှင့် အမေရိကန်ပြည်ထောင်စုတို့က ဆက်ဆံရေးမြှင့်တင်မည့် အရွေ့ကို အားပေးပါကြောင်း မစ္စတာ ဝမ်က ပြောဆိုခဲ့သည်။

Ref: သည်စထရိတ်တိုင်းမ်စ်