ထိုင်ဝမ်နှင့် ပြန်လည်ပေါင်းစည်းရေးကို မည်သူမျှ မဟန့်တားနိုင်–ရှီ

တရုတ်နိုင်ငံ၏ ထိုင်ဝမ်နှင့် ပြန်လည်ပေါင်းစည်းရေးကို မည်သူမျှ ဟန့်တားနိုင်မည်မဟုတ်ကြောင်း တရုတ်သမ္မတ ရှီကျင့်ဖျင်က ဒီဇင်ဘာ ၃၁ ရက် နှစ်သစ်ကူးမိန့်ခွန်းတွင် ပြောကြားလိုက်ပြီး ကျွန်းဒေသအတွင်းနှင့် ပြင်ပရှိ လွတ်လပ်ရေးလိုလားသော အင်အားစုများဆိုသည်ကို ပြတ်သားသော သဘောထားဖြင့် သတိပေးခဲ့သည်။

ပြီးခဲ့သည့်နှစ်အတွင်း ပေကျင်းသည် ထိုင်ဝမ်အနီးတွင် စစ်ရေးဖိအားပေးမှုကို တိုးမြှင့်ခဲ့ပြီး ကျွန်းဒေသတစ်ဝိုက် ရေပိုင်နက်နှင့် ဝေဟင်ပိုင်နက်များအတွင်းသို့ စစ်သင်္ဘောနှင့် လေယာဉ်များကို နေ့စဉ်နီးပါးစေလွှတ်ခဲ့သည်။ ပေကျင်း၏ ယင်းလုပ်ရပ်သည် တရုတ်စစ်တပ် တည်ရှိနေရေးကို ပုံမှန်ဖြစ်စေရန် ကြိုးပမ်းမှုအဖြစ် ထိုင်ဝမ်အရာရှိများက ရှုမြင်ကြသည်။

ထိုင်ဝမ်ရေလက်ကြားနှစ်ဖက်တွင် နေထိုင်သူများသည် တစ်ခုတည်းသော မိသားစုဝင်များဖြစ်ကြောင်း၊ မိမိတို့၏ မိသားစုနှောင်ကြိုးကို မည်သူကမျှ ဖြတ်တောက်နိုင်မည် မဟုတ်ကြောင်းနှင့် အမျိုးသားပြန်လည်ပေါင်းစည်းရေး သမိုင်းဝင်လမ်းကြောင်းကို မည်သူကမျှ ဟန့်တားနိုင်မည်မဟုတ်ကြောင်း နိုင်ငံပိုင် စီစီတီဗီသတင်းဌာနမှတဆင့် မိန့်ခွန်းပြောကြားရာတွင် ရှီက ထည့်သွင်းပြောဆိုခဲ့သည်။

အထူးသဖြင့် ပေကျင်းက ခွဲထွက်ရေးသမားဟု သတ်မှတ်သော မစ္စတာလိုင်ချင်းတေက မေလ၌ ထိုင်ဝမ်သမ္မတဖြစ် လာခဲ့ပြီးနောက်တွင် အကဲဆတ်သော ထိုင်ဝမ်ရေလက်ကြားသည် တစ်နှစ်ပတ်လုံး တင်းမာမှုများ မြင့်မားနေခဲ့သည်။

Ref: သည်စထရိတ်တိုင်းမ်စ်