ထိုင်းဝန်ကြီးချုပ်အပေါ် အယုံအကြည်မရှိအဆို မဲခွဲမှု ရှုံးနိမ့်

ထိုင်းဝန်ကြီးချုပ် ပေတုံတန် ရှင်နာဝပ်ထရာသည် မတ်လ ၂၆ ရက်က လွှတ်တော်တွင် သူ့အပေါ် အယုံအကြည်မရှိ အဆို မဲခွဲဆုံးဖြတ်ရာတွင် အနိုင်ရခဲ့ပြီး သူ၏ ဖခင်ဖြစ်သူ ဘီလျံနာဝန်ကြီးချုပ်ဟောင်း သက်ဆင် ရှင်နာဝပ်ထရာ၏ ရုပ်သေးရုပ်ဟု စွပ်စွဲခဲ့သည့် အတိုက်အခံပါတီများ၏ စိန်ခေါ်ချက်ကို ကျော်ဖြတ်နိုင်ခဲ့သည်။

တိုင်းပြည် စီမံခန့်ခွဲမှုအတွေ့အကြုံမရှိသေးသည့် အသက် ၃၈ နှစ်အရွယ် ဝန်ကြီးချုပ်ကို အတိုက်အခံများက တိုက်ခိုက်ခဲ့သည့် နှစ်ရက်ကြာ အချေအတင် စကားစစ်ထိုးပွဲအပြီးတွင် လွှတ်တော်အမတ်များက အဆိုကို ထောက်ခံမဲ ၁၆၂ မဲ၊ ကန့်ကွက်မဲ ၃၁၉ မဲ၊ ကြားနေ ၇ မဲတို့ဖြင့် ဖြုတ်ချခဲ့သည်။

မဲခွဲဆုံးဖြတ်မှု ကို အနိုင်ရအပြီးတွင် သူ့အပေါ် ထောက်ခံခဲ့သူများကို ကျေးဇူးတင်ကြောင်း မစ္စ ပေတုံတန်က ပြောကြားခဲ့သည်။

“ထောက်ခံတဲ့၊ ကန့်ကွက်တဲ့ ဆန္ဒမဲအားလုံးဟာ ပြည်သူတွေအတွက် ကြိုးကြိုးစားစား ဆက်လက်လုပ်ဆောင်ဖို့ ကျွန်မနဲ့ အစိုးရအဖွဲ့ကို တွန်းအားဖြစ်စေမှာပါ” ဟု သူက ဖေ့စ်ဘုတ်တွင် ရေးသားခဲ့သည်။

ယခင်ဝန်ကြီးချုပ် ဆရက်သာ ထဝီစင်းကို တရားရုံးအမိန့်ဖြင့် ထုတ်ပယ်ခဲ့ပြီးနောက် မစ္စတာ သက်ဆင်တည်ထောင်ခဲ့သော နိုင်ငံရေးလှုပ်ရှားမှု၏ နောက်ဆုံး ပွဲထုတ်မှုဖြစ်သော မစ္စ ပေတုံတန်သည် ဖြူထိုင်းပါတီဦးဆောင်သော ညွန့်ပေါင်းအစိုးရအဖွဲ့ကို ဦးဆောင်ကာ ပြီးခဲ့သည့်နှစ်တွင် ဝန်ကြီးချုပ် ဖြစ်လာခဲ့သည်။

Ref: သည်စထရိတ်တိုင်းမ်စ်