ဓာတ်သတ္တု (ရွှေ) ရည်ညွှန်းဈေးသတ်မှတ်ရေးကော်မတီက သတ်မှတ်ထုတ်ပြန်ထားသည့် ရည်ညွှန်းဈေးအတိုင်းမရောင်းချပါက အရေးယူသွားမည်ဖြစ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ထုတ်ပြန်ထားသည်။
ဒီဇင်ဘာလ (၆)ရက်မှစတင်၍ ဓာတ်သတ္တု (ရွှေ) ရည်ညွှန်းဈေးသတ်မှတ်ရေးကော်မတီက သိပ်သည်းဆ ၁၉.၂၅ ဂရမ်နှင့် အထက်ရှိသော စံချိန်မီရွှေ (၁) ကျပ်သား (၁၆.၃၂၉၃၂၅ ဂရမ်)၏ ဓာတ်သတ္တု (ရွှေ) ရည်ညွှန်းဈေးဖြင့် ရောင်းချရန် သတ်မှတ်ထားသည်။
အဆိုပါ ရည်ညွှန်းဈေးများကို မြန်မာ့အသံနှင့်ရုပ်မြင်သံကြား၊ မြဝတီရုပ်မြင်သံကြား၊မြန်မာ့အသံ(Radio) ၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၏ အင်တာနက်စာမျက်နှာနှင့် ရန်ကုန်တိုင်းဒေသကြီးရွှေလုပ်ငန်းရှင်များအသင်း၏ Facebook လူမှုကွန်ရက်စာမျက်နှာတို့တွင်နေ့စဉ်ထုတ်ပြန်ပေးလျက်ရှိသည်။
ယင်းရည်ညွှန်းဈေးအတိုင်း ရောင်းချခြင်းမပြုပါက အရေးကြီးကုန်စည်နှင့် ဝန်ဆောင်မှု ဥပဒေပုဒ်မ (၅)နှင့်အညီ အရေးယူမည်ဖြစ်ကြောင်း သိရသည်။
ထို့ပြင် ဓာတ်သတ္တု (ရွှေ) ရောင်းဝယ်ခြင်းဝန်ဆောင်မှုလုပ်ငန်း လုပ်ကိုင်ဆောင်ရွက်လိုသူများအနေဖြင့် ၂၀၂၅ ခုနှစ် ဖေဖော်ဝါရီလ (၁၇) ရက်နောက်ဆုံးထားလျှောက်ထားရန်လည်း အသိပေးထားသည်။
ယနေ့ ဒီဇင်ဘာ (၁၂) ရက်အတွက် ဓာတ်သတ္တု (ရွှေ) ရည်ညွှန်းဈေးသတ်မှတ်ရေးကော်မတီက သတ်မှတ်ထုတ်ပြန်ထားသည့် ရည်ညွှန်းဈေးမှာ (၁) ကျပ်သား (၅၃၈၀၀၀၀) ကျပ်ဖြစ်ပြီး အဆိုပါ ရည်ညွှန်းဈေးကို ရန်ကုန်တိုင်းရွှေလုပ်ငန်းရှင်များအသင်းက ထပ်ဆင့် အသိပေးထုတ်ပြန်ထားသည်။