နယ်နှင်သူများတင်လာသောကန်စစ်လေယာဉ် မက္ကဆီကို ဆင်းသက်ခွင့် မပြု

နေရပ်ပြန်ပို့သည့် ရွှေ့ပြောင်းအခြေချများ ကိုတင်ဆောင်လာသော အမေရိကန်စစ်လေယာဉ်တစ်စင်းကို ဆင်းသက်ခွင့်ပြုရန် သမ္မတဒေါ်နယ်ထရမ့်ပ်အစိုးရ၏ တောင်းဆိုမှုကို မက္ကဆီကို အစိုးရက ငြင်းပယ်ခဲ့သည်ဟု အမေရိကန်နှင့် မက္ကဆီကို အရာရှိများက ရိုက်တာသတင်းဌာနကို ပြောကြားခဲ့သည်။

အမေရိကန်စစ်တပ်သည် ဇန်နဝါရီလ ၂၄ ရက်‌ေန့က ရွှေ့ပြောင်းအခြေချသူ ၈၀ စီ လိုက်ပါခဲ့သော အလားတူ လေယာဉ်ခရီးစဉ်နှစ်ခုဖြင့် ဂွါတီမာလာသို့ နေရပ်ပြန်ပို့မှုလုပ်ဆောင်ခဲ့သည်။

ဂွါတီမာလာနိုင်ငံသား စုစုပေါင်း၂၆၅ ဦးသည် စစ်ဘက်လေယာဉ်နှစ်စင်း၊ စင်းလုံးငှားလေယာဉ်တစ်စင်းတို့ပါဝင်သော ခရီးစဉ်သုံးကြောင်းဖြင့် ဆိုက်ရောက်လာခဲ့သည်ဟု ဗဟိုအမေရိကနိုင်ငံ၏ ရွှေ့ပြောင်းအခြေချမှုဆိုင်ရာ အင်စတီကျူ့က ပြောကြားခဲ့သည်။

သို့ရာတွင် ဆင်းသက်ခွင့် ငြင်းပယ်ခံခဲ့ရသဖြင့် မက္ကဆီကိုတွင် C-17 သယ်ယူပို့ဆောင်ရေးလေယာဉ် ဆင်းသက်မည့် အစီအစဉ်ကို အမေရိကန်အစိုးရက ဆက်အကောင်အထည်ဖော်နိုင်ခြင်း မရှိခဲ့ပေ။

အဆိုပါဆုံးဖြတ်ချက်ကိုအမေရိကနှင့် မက္ကဆီကို အရာရှိတစ်ဦးစီက အတည်ပြုခဲ့ကြပြီး အင်န်ဘီစီသတင်းဌာနက ပထမဆုံးသတင်းဖော်ပြခဲ့သည်။

မက္ကဆီကိုနိုင်ငံခြားရေးဝန်ကြီးဌာနက ဇန်နဝါရီလ ၂၄ ရက် နေ့တွင် ပြောဆိုခဲ့ရာ၌ နိုင်ငံသည် အမေရိကနှင့် ကောင်းမွန်သော ဆက်ဆံရေးရှိကြောင်းနှင့် ရွှေ့ပြောင်းနေထိုင်သူများအရေးကဲ့သို့ ကိစ္စရပ်များတွင် ပူးပေါင်းဆောင်ရွက်ကြောင်း ပြောကြားခဲ့သည်။

လေယာဉ်ဆင်းသက်ခွင့်ကို ငြင်းပယ်ရခြင်း၏ အကြောင်းရင်းကို အထက်ပါ မက္ကဆီကို အရာရှိက ပြောကြားခဲ့ခြင်း မရှိသကဲ့သို့ မက္ကဆီကိုနိုင်ငံခြားရေးဝန်ကြီးဌာနကလည်း အဆိုပါဖြစ်ရပ်ကို ဖော်ပြခဲ့ခြင်းမရှိပေ။

Ref: သည်စထရိတ်တိုင်းမ်စ်