မြန်မာနိုင်ငံ၏ ရထားပို့ဆောင်ရေးလုပ်ငန်းသည်အရှေ့တောင်အာရှ၏ သက်တမ်းအရင့်ဆုံး ရထားပို့ဆောင်ရေးလုပ်ငန်း ဖြစ်ပြီး နိုင်ငံတစ်ဝန်းတွင် ဘူတာရုံပေါင်း (၉၆၂) ခုအထိ တည်ဆောက်ထားကြောင်း သိရသည်။
မြန်မာနိုင်ငံတွင် ရထားပို့ဆောင်ရေးလုပ်ငန်းသည် ၁၈၇၇ ခုနှစ်၊ မေလ (၁) ရက် တွင် စတင်ခဲ့ခြင်းဖြစ်ပြီး ရန်ကုန်-ပြည် ရထားလမ်းပိုင်း (၁၆၁)မိုင်ခရီးကို ရန်ကုန်ဘူတာကြီးမှ စတင်ဖောက်လုပ်ပြေးဆွဲခဲ့ခြင်း ဖြစ်သည်။
လက်ရှိတွင် ရန်ကုန်မြို့ပတ်ရထားလမ်းပိုင်းတွင် ခေတ်မီ Diesel Electric Multiple Unit (DEMU) ရထားတွဲဆိုင်းသစ်များဖြင့် နိုဝင်ဘာ (၂၉) ရက်တွင် စတင်ပြေးဆွဲနေပြီဖြစ်ကာ ယခင်က မြို့ပတ်ရထားပြေးဆွဲမှု တစ်နာရီလျှင် ကီလိုမီတာ (၄၀) နှုန်းမှ ယခုအခါ ကီလိုမီတာ (၆၀) နှုန်းဖြင့် တိုးမြှင့်ပြေးဆွဲပေးနေခြင်းဖြစ်ကြောင်းလည်း သိရသည်။
ရန်ကုန်မြို့ပတ်ရထားလမ်းပိုင်းတွင် ယခင် ပြေးဆွဲနေသော RBE ရထားအစင်း (၂၀)နှင့် DEMU ရထား (၁၅) စင်းအသုံးပြုပြီး ဖြည့်စွက်ပြေးဆွဲပေးသွားမည်ဖြစ်ကာ ခရီးသွားပြည်သူများ မြို့ပတ်ရထားများကို ယခင်ကထက် ပိုမိုမြန်ဆန်အဆင်ပြေကာ စီးနင်းလိုက်ပါနိုင်ရန် စီစဉ်နေကြောင်းလည်း သိရသည်။