လန်ချန်း-မဲခေါင်နိုင်ငံများအကြား ခရီးသွားလုပ်ငန်းများနှင့် နိုင်ငံဖြတ်ကျော်ခရီးသွားအရင်းအမြစ်များ မျှဝေခြင်း လုပ်ငန်းစဉ်များအား ဆွေးနွေးခဲ့ကြသည့် ၂၀၂၄ ခုနှစ် လန်ချန်း-မဲခေါင် ခရီးသွားမြို့များ ပူးပေါင်းဆောင်ရွက်ရေး မဟာမိတ်ဆွေးနွေးပွဲသို့ မြန်မာကောင်စစ်ဝန်ချုပ် တက်ရောက်ဆွေးနွေးခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရသည်။
အဆိုပါ ၂၀၂၄ ခုနှစ် လန်ချန်း-မဲခေါင် ခရီးသွားမြို့များ ပူးပေါင်းဆောင်ရွက်ရေး မဟာမိတ်ဆွေးနွေးပွဲကို ချုံချင့်မြို့၊ Jinyuan ဟိုတယ်၌ နိုဝင်ဘာ (၂၇)ရက်က တရုတ်နိုင်ငံ၊ ယဉ်ကျေးမှုနှင့် ခရီးသွားလာရေးဝန်ကြီးဌာနနှင့် ချုံချင့်မြူနီစီပယ်အစိုးရ ယဉ်ကျေးမှုနှင့် ခရီးသွားဖွံ့ဖြိုးတိုးတက်ရေးကော်မရှင်မှ ဦးစီးကျင်းပခဲ့ခြင်းဖြစ်သည်။
၎င်းဆွေးနွေးပွဲသို့ မြန်မာကောင်စစ်ဝန်ချုပ်ရုံး၊ ချုံချင့်မြို့မှ ကောင်စစ်ဝန်ချုပ် ဦးကျော်ဇေယျာလင်းက တရုတ်နိုင်ငံ၊ ယဉ်ကျေးမှုနှင့် ခရီးသွားလာရေးဝန်ကြီးဌာနနှင့် ချုံချင့် မြူနီစီပယ်အစိုးရ ယဉ်ကျေးမှုနှင့် ခရီးသွား ဖွံ့ဖြိုးတိုးတက်ရေးကော်မရှင်တို့မှ တာဝန်ရှိသူများ၊ မဲခေါင်နိုင်ငံများ၏ ဟိုတယ်နှင့်ခရီးသွားဝန်ကြီးဌာနများမှ ကိုယ်စားလှယ်များ၊ ချုံချင့်မြို့နှင့် ချန်သူးမြို့အခြေစိုက် မဲခေါင်နိုင်ငံများ၏ ကောင်စစ်ဝန်ချုပ်ရုံးများမှ ကောင်စစ်ဝန်ချုပ်များနှင့် နိုင်ငံတကာမှ ခရီးသွားလုပ်ငန်းဆိုင်ရာ ကိုယ်စားလှယ်များနှင့် အတူ တက်ရောက်ခဲ့ကြောင်း သိရသည်။
ဆွေးနွေးပွဲအား “Lancang-Mekong Water, Long Origin” ဆောင်ပုဒ်ဖြင့်ကျင်းပခဲ့ပြီး တက်ရောက်လာသည့် ကိုယ်စားလှယ်များမှ လန်ချန်း-မဲခေါင်နိုင်ငံများအကြား ခရီးသွားလုပ်ငန်း ပူးပေါင်းဆောင်ရွက်မှုများ ပိုမိုနက်ရှိုင်းစွာဆောင်ရွက်ကာ နိုင်ငံဖြတ်ကျော်ခရီးသွားအရင်းအမြစ်များ မျှဝေခြင်းနှင့် ပေါင်းစည်းဆောင်ရွက်ခြင်း လုပ်ငန်းစဉ်များအား ဆွေးနွေးခဲ့ကြကြောင်း သိရသည်။