နိုဝင်ဘာ ၂၇ ရက်မှ ဒီဇင်ဘာ ၆ ရက်အတွင်း တစ်နိုင်ငံလုံးအနှံ ချိန်ခါမဟုတ်မိုးရွာသွန်းနိုင်

မြန်မာတစ်နိုင်ငံလုံးအနှံတွင် လာမည့် နိုဝင်ဘာ ၂၇ ရက်မှ ဒီဇင်ဘာ ၆ ရက်အတွင်း ချိန်ခါမဟုတ် မိုးရွာသွန်းနိုင်သည်ဟု မိုးလေဝသမြန်မာ ရန်ကုန်ဌာနခွဲက အသိပေးခဲ့သည်။

အားကောင်းသော အပူပျံတက်တိမ်တိုက်များ သည် ဘင်္ဂလားပင်လယ်အော်အတွင်းဖြစ်ပေါ်လျှက်ရှိသည့် လေဖိအားနည်းရပ်ဝန်း၏အရှိန်နှင့်အတူ ဖြစ်ထွန်းမှုပိုမိုအားကောင်းနိုင်ပြီး မြန်မာနိုင်ငံဘက်သို့လွှင့်စင်လာနိုင်ပြီး အနောက်နှင့် မြောက်ဘက်မှလာသော ကုန်းတွင်းလေအေးများ၊ အရှေ့မြောက်ဘက်မှလာသော အရှေ့မြောက်မုတ်သုံလေအေးများနှင့်တွေ့ဆုံမှုကြောင့် တစ်နိုင်ငံလုံးတွင် နေရာကျဲကျဲမှ နေရာစိပ်စိပ် ချိန်ခါမဟုတ် မိုးသည်းထန်စွာရွာသွန်းနိုင်ခြင်းဖြစ်သည်ဟု အသိပေးခဲ့သည်။

အဆိုပါ ဖြစ်စဉ်များကြောင့် နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ချင်းပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာကွက်၍ မိုးကြီးခြင်း၊ လျှပ်စီးလက်ခြင်း၊ မိုးခြိမ်းခြင်း၊ မိုးကြိုးပစ်ခြင်းနှင့် လေပြင်းတိုက်ခတ်ခြင်းများဖြစ်ပေါ်နိုင်သည်ဟုလည်း အသိပေးခဲ့သည်။

ထို့ကြောင့် ယင်း တိုင်းနှင့်ပြည်နယ်များတွင်နေထိုင်သူများအနေဖြင့် မိုးရွာသွန်းခြင်းကြောင့် ဖြစ်ပေါ်လာနိုင်သည့် ရေကြီးခြင်း၊ မြေပြိုခြင်း၊ မိုးကြိုးပစ်ခြင်း၊ လေတိုက်ခတ်ခြင်းကြောင့်ဖြစ်ပေါ်နိုင်သည့် အဆောက်အအုံများ၊ သစ်ပင်သစ်ကိုင်းများ၊ ဖိုင်ဘာလိုင်းနှင့် လျှပ်စစ်ဓာတ်အားလိုင်းများပြိုကျယိုင်လဲခြင်းအန္တရာယ်များဖြစ်ပေါ်နိုင်၍ အထူးသတိပြုနေထိုင်ကြရန်လည်း အသိပေးခဲ့သည်။