နီပွန်ဖောင်ဒေးရှင်းကငလျင်အတွက် ဒေါ်လာ၃သန်းဖိုးကူညီထောက်ပံ့မည်

       
ဂျပန်နိုင်ငံ နီပွန်ဖောင်ဒေးရှင်းက မြန်မာငလျင်ဘေးအတွက် ဒေါ်လာ ၃ သန်း ထောက်ပံ့သွားမည်ဖြစ်ကြောင်း မတ်လ ၃၁ ရက်‌နေ့တွင် ကြေညာခဲ့ပြီး မြန်မာနိုင်ငံနှင့် အနီးတစ်ဝိုက်တွင် လှုပ်ခတ်ခဲ့သော ငလျင်ဒဏ်ခံခဲ့ရသူတိုင်းအတွက် ဝမ်းနည်းကြေကွဲရကြောင်း ပြောကြားခဲ့သည်။
            
မြန်မာနိုင်ငံကို ဗဟိုပြုလှုပ်ခတ်ခဲ့သော ငလျင်ကြောင့် ပျက်စီးဆုံးရှုံးမှုများဖြစ်ခဲ့သော ဒေသများအတွက် အစားအသောက်၊ ဆေးဝါးများ အပါအဝင် အမေရိကန်ဒေါ်လာ ၃ သန်းနှင့်ညီမျှသော အရေးပေါ်အကူအညီများထောက်ပံ့ရန် ဆုံးဖြတ်ခဲ့သည်ဟု ဖောင်ဒေးရှင်းက ဆိုသည်။
       
ရန်ကုန်မြို့ရှိ နီပွန်ဖောင်ဒေးရှင်း မြန်မာဆက်ဆံရေးရုံးနှင့် ညှိနှိုင်းကာ လိုအပ်နေသော ဒေသများသို့ အကူအညီပစ္စည်းများ အမြန်ပို့ဆောင်ရန် ရည်ရွယ်ထားသည်ဟုလည်း ပြောကြားခဲ့သည်။
        
“မြန်မာနှင့် အနီးဝန်းကျင် ဒေသများတွင် လှုပ်ခတ်ခဲ့သော ငလျင်ဒဏ်ခံစားခဲ့ရသူတိုင်းအတွက် အထူးဝမ်းနည်းရကြောင်း ပြောကြားလိုပါသည်။ နိုင်ငံအတွင်း နူနာပပျောက်ရေး ပရောဂျက်များဖြင့် နီပွန်ဖောင်ဒေးရှင်းသည် မြန်မာတွင် နှစ်ပေါင်း ၅၀ နီးပါး လုပ်ဆောင်ခဲ့ပြီး လူသားအရင်းအမြစ် ဖွံ့ဖြိုးတိုးတက်ရေး၊ ကျန်းမာရေး၊ သန့်ရှင်းရေး၊ ပညာရေး၊ ဝန်ထမ်းဖလှယ်ရေးနှင့် မသန်စွမ်းသူများအတွက် ပံ့ပိုးကူညီမှု စသည့် ကဏ္ဍမျိုးစုံတွင် ပါဝင်ခဲ့ပါသည်” ဟု နီပွန်ဖောင်ဒေးရှင်းဥက္ကဌ၊ မြန်မာနိုင်ငံ အမျိုးသားပြန်လည်သင့်မြတ်ရေးဆိုင်ရာ ဂျပန်အစိုးရ၏ အထူးကိုယ်စားလှယ်ဖြစ်သူ ယိုဟီ ဆာဆာကာဝါက ပြောကြားခဲ့သည်။
          
ထို့အပြင် “မြန်မာနိုင်ငံ အမျိုးသားပြန်လည်သင့်မြတ်ရေးဆိုင်ရာ ဂျပန်အစိုးရ၏ အထူးသံတမန်တစ်ဦး အနေဖြင့် မြန်မာနိုင်ငံတွင် ငြိမ်းချမ်းရေး ရရှိရန် ၂၀၁၃ ခုနှစ်ကတည်းက လုပ်ဆောင်နေပါသည်။ အခြေအနေကို အကဲဖြတ်ရန်နှင့် နိုင်ငံတော် စီမံအုပ်ချုပ်ရေးကောင်စီနှင့် ချိတ်ဆက်၍ ပဋိပက္ခဖြစ်ပွားနေသော ဒေသများသို့ အကူအညီများဖြန့်ဝေနိုင်ရန် ဧပြီ ၂ ရက်နေ့မှစ၍ မြန်မာနိုင်ငံသို့ သွားရောက်ရန် စီစဉ်ထားပါသည်။ အကောင်းမွန်ဆုံးသော ပံ့ပိုးကူညီမှုများ ပေးနိုင်ရန် နိုင်ငံအတွင်း လူသားချင်းစာနာထောက်ထားမှုဆိုင်ရာ ကူညီပံ့ပိုးခြင်းများဖြင့် ယနေ့အထိ မိမိတို့ တည်ဆောက်ထားသော ကွန်ရက်ကို အသုံးပြုသွားပါမည်” ဟု ၎င်းက ဆက်လက် ပြောကြားခဲ့သည်။

Ref: နီပွန်ဖောင်ဒေးရှင်း