နေပြည်တော်အတွင်း ငလျင်ဒဏ်သင့်ခဲ့သည့်နေရာများနှင့် ငလျင်ဒဏ်ကြောင့် ဆေးရုံတက်ရောက်နေရသူများကို နစက ဥက္ကဋ္ဌကြည့်ရှုအားပေးခဲ့

နေပြည်တော်အပါအဝင် တိုင်းနှင့်ပြည်နယ်အချို့၌ ယနေ့ မတ် ၂၈ ရက်မွန်းတည့်ပိုင်းက အင်အားအလွန်ပြင်းထန်သောငလျင်လှုပ်ခတ်ခဲ့ပြီး ‌ေ-သဆုံးမှုများ၊ ထိခိုက်ဒဏ်ရာရရှိမှုများနှင့် ပျက်စီးဆုံးရှုံးမှုများဖြစ်ပေါ်ခဲ့သည်။

အဆိုပါ ဖြစ်ပေါ်ခဲ့ရမှုများအနက် နေပြည်တော်အတွင်း၌ ပျက်စီးခဲ့ရမှုများနှင့် ဆေးရုံတက်ရောက်နေရသူများကို နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က ငလျင်လှုတ်ခတ်ပြီး နာရီပိုင်းအကြာတွင် ကြည့်ရှုစစ်ဆေးအားပေးမှုများပြုလုပ်ခဲ့သည်။

နစက ဥက္ကဋ္ဌမှ ပင်လောင်းလမ်းဆုံနေရာမှ နေပြည်တော်တိုင်းစစ်ဌာနချုပ် မီးပွိုင့်နေရာအထိ ငလျင်ဒဏ်ကြောင့် လမ်းတံတားပျက်စီးခဲ့မှုများ၊ ရာဇဌာနီ လမ်းမကြီးပေါ်ရှိ လမ်းတံတားပျက်စီးမှုများ၊ ပျဉ်းမနား-တောင်ညိုလမ်းမကြီးပေါ်ရှိ လမ်းတံတား ပျက်စီးမှုများအားကြည့်ရှုစစ်ဆေးခဲ့သည်။

ထိုသို့ စစ်ဆေးပြီးနောက် အများပြည်သူများသွားလာမှုအဆင်ပြေစေရေးနှင့် အမြန်ဆုံးသွားလာနိုင်ရေးဦးစားပေးဆောင်ရွက်သွားရန်၊ လူအင်အား၊ယာဉ်ယန္တရားအင်အားများကိုအသုံးပြု၍ လမ်းကြောင်းများအမြန်ဆုံးပြန်လည်ကောင်းမွန်စေရေး ဆောင်ရွက်ရန်တို့ကို မှာကြားခဲ့သည်။

ထို့နောက် နေပြည်တော်၊ ပြည်သူ့ဆေးရုံကြီး(ခုတင်-၁၀၀၀)တွင် ငလျင်ဘေးဒဏ်ကြောင့် ထိခိုက်ဒဏ်ရာရရှိခဲ့သူများအား ဆေးဝါးကုသပေးနေမှုများကိုကြည့်ရှု၍ အားပေးစကားပြောကြားခဲ့သည်။

ထို့အတူ နစက ဥက္ကဋ္ဌသည် နေပြည်တော်မြို့မဈေးအနီးရှိ ခရေဝန်ထမ်းအိမ်ရာအတွင်း ငလျင်ဘေးဒဏ်သင့်မှုကြောင့် ပျက်စီးခဲ့ရသည့်အိမ်ရာများတွင် ကူညီကယ်ဆယ်ရေးလုပ်ငန်းများဆောင်ရွက်ပေးနေမှုများကိုကြည့်ရှု၍ အဆောက်အဦပျက်များအတွင်း ပိတ်မိနေသူများကို အမြန်ဆုံးကယ်ထုတ်နိုင်ရေးဦးစားပေးဆောင်ရွက်သွားရန်နှင့် အခြားလိုအပ်သည်များကိုမှာကြားပြီး အခြားငလျင်ဘေးဒဏ်သင့်နေရာများသို့ ဆက်လက်၍ လိုက်လံကြည့်ရှုစစ်ဆေးလျက်ရှိသည်။