ပခုက္ကူမြို့၊ အမှတ် (၁) ရပ်ကွက်တွင် ဘိုထိုင်အိမ်သာခုံထဲ အောင်းနေသည့် မြွေကိုက်ခံရ၍ တက္ကသိုလ်ဝင်တန်း ကျောင်းသူတစ်ဦး အသက်ဆုံးရှုံးခဲ့သည့် ဖြစ်စဉ်တစ်ခု ယမန်နေ့ နိုဝင်ဘာ (၂၄) ရက် ညပိုင်းက ဖြစ်ပွားခဲ့ကြောင်း သိရသည်။
“ပခုက္ကူမှာ ဖြစ်သွားတာပါ။မနေ့ည ကပါ။ ဘိုထိုင်အိမ်သာထဲမှာ အကိုက်ခံရတာပါ၊ ၁၀ တန်းကျောင်းသူလေး။ အသ -က်ဆုံးရှူံးခဲ့ရပါတယ်။ ပခုက္ကူမှာ မြွေပေါနေပါတယ်။ ဂရုစိုက်ကြပါ ၊ အိမ်သာထိုင်မယ်ဆို သေချာကြည့်ထိုင်ပါ၊ ရေအရင်လောင်းပါ” ဟု ဖြစ်စဉ်ကို သိရှိသူ တစ်ဦးက လူမှုကွန်ရက်တွင် မျှဝေထားသည်။
Native Species Conservation and Identification Myanmar (NSCI) ၏ လူမှုကွန်ရက်တွင်လည်း ၎င်းတို့ရရှိထားသည့် မြွေပုံသည် အဆိပ်ပြင်းရုံမက အဆိပ်ရည်များပါ မှုတ်ထုတ်နိုင်သည့် မန္တလေး အဆိပ်မှုတ်မြွေဟောက်ဖြစ်ပြီး သိပ္ပံအမည် (Naja mandalayensis) ဖြစ်ကြောင်း ဖော်ပြထားသည်။
ကိုက်ခဲ့သည့် မြွေကို ည (၉)နာရီကျော်တွင် အိမ်သာကို ဖျက်၍ ရှင်းလင်းနိုင်ခဲ့ပြီး အကိုက်ခံရသည့် ကျောင်းသူအား ဆေးရုံပို့၍ မြွေဆိပ်ဖြေဆေးထိုးခဲ့သော်လည်း အသက်မမီခဲ့ကြောင်း သိရသည်။
ထို့ကြောင့် မြွေကိုက်ခံရပြီးပြီးချင်းတွင် မြွေကိုက်ခံရသည့် လူနာကို ဆေးရုံမပို့ခင် အသက်မီနိုင်ရန် ရှေးဦးသူနာပြုစုနည်းများ လုပ်ဆောင်ပေးထားရန်လိုကာ ထိုသို့လုပ်ဆောင်နိုင်ရန် မြွေအန္တရာယ် သတိပေးပို့စ်များနှင့် ရှေးဦးသူနာပြုနည်းများကို ဖတ်ထားရန် လိုကြောင်းလည်း (NSCI) က ၎င်းတို့၏ လူမှုကွန်ရက်စာမျက်နှာတွင် ရေးသားထားသည်။
ထို့ပြင် မိမိပတ်ဝန်းကျင်၌ မြွေကိုက်ခံရခြင်း၊ မြွေတွေ့ခြင်းမျိုးရှိပါက NSCI လူမှုကွန်ရက်ဂရုတွင် ပို့စ်တင်ပြီး မြွေမျိုး စိတ်အမည်၊ ရှေးဦးသူနာပြုစုနည်းနှင့် လမ်းညွှန်များ လာမေးမြန်နိုင်သလို အမြို့မြို့အနယ်နယ်တိုင်း မြွေဖမ်းရန် အကူအညီလိုခြင်း၊ မြွေတင်မက မည်သည့်အကောင်မျိုးမဆို အဆိပ်ရှိ မရှိ (၂၄)နာရီအချိန်ပြည့် မေးမြန်းနိုင်ကြောင်း NSCI က ရေးသား ဖော်ပြထားသည်။