ကျေးဇူးတော်ရှင် ပါမောက္ခချုပ်ဆရာတော်ကြီး ဘုရားကြီး ဒေါက်တာနန္ဒမာလာဘိဝံသ၏ မွေးနေ့အထိမ်းအမှတ်အနေဖြင့် မတ်လ (၂၂)ရက်တွင် လူဦးရေသုံးသောင်းကို စတုဒိသာကျွေးမွေးသွားမည်ဖြစ်ကြောင်း ရာသက်ပန် ကုမ္ပဏီ စတုဒိသာအဖွဲ့မှ သိရသည်။
ဆရာတော်ကြီး၏ သက်တော် (၈၅) နှစ်ပြည့် ဝိဇာတမွေးနေ့မင်္ဂလာကုသိုလ်ကို ပူဇော်သော အားဖြင့် အများကောင်းမှု အဖြစ် လူဦးရေ (၃) သောင်းစာ စတုဒိသာ အာဟာရဒါနအလှူအဖြစ် ပေါ်ဆန်းမွှေး ထမင်းဖြူနှင့်အတူ ကြက်သားဟင်း၊ သီးစုံချဉ်ရည်ဟင်း၊ ပုဇွန်ခြောက်ထောင်းအစပ်ကြော်၊ ကြက်သဲမြစ် ပဲကြာဇံကြော်၊ ခရမ်းချဉ်သီးချက်တို့ကို ကျွေးမွေးသွားမည်ဖြစ်သည်။
စတုဒိသာ အလှူတော်မင်္ဂလာကို ပြင်ဦးလွင်မြို့၊ အနီးစခန်း၊ အောင်ချမ်းသာရပ်ကွက်ရှိ ဆရာတော်ကြီး သီတင်းသုံးရာ ဓမ္မသဟာယသာသနစင်တာကျောင်း၏ အလှူကွင်းပြင်ရှိ အလှူမဏ္ဍဒ်ကြီးတွင် မတ်လ(၂၂)ရက်၊ နံနက် (၉) နာရီမှ ညနေ (၅)နာရီအထိ အယုတ် အလတ် အမြတ်မရွေး သတ္တဝါအပေါင်းတို့အား ကျွေးမွေးဧည့်ခံမည် ဖြစ်သည်။
ကျေးဇူးတော်ရှင် ပါမောက္ခချုပ်ဆရာတော် ဘုရားကြီး ဒေါက်တာနန္ဒမာလာဘိဝံသ၏ စတုဒိသာကျွေးမွေးမည့် အစီအစဉ်အား ရာသက်ပန် ကုမ္ပဏီ စတုဒိသာအဖွဲ့မှ တာဝန်ယူ သွားမည်ဖြစ်ကြောင်း သိရသည်။