စစ်ကိုင်းတိုင်း၊ ပုလဲမြို့နယ်အတွင်း ဖြစ်ပွားခဲ့သော တိုက်ပွဲများကြောင့် ဒေသခံစစ်ရှောင်ပြည်သူ (၁၀၀၀၀) ကျော် စစ်ဘေးရှောင်နေကြရပြီး လက်ရှိတွင် အရေးပေါ်ကျန်းမာရေးစောင့်ရှောက်မှုများ လိုအပ်နေသည်ဟု ဒေသတွင်း သတင်းရင်းမြစ်များထံက သိရသည်။
အဆိုပါ စစ်ရှောင်ပြည်သူများမှာ ရာသီတုတ်ကွေးအပါအဝင် သွေးအားနည်းခြင်း၊ ခေါင်းကိုက်၊ နာစေးချောင်းဆိုးများ ဖြစ်ပွားနေပြီး၊ သက်ကြီးပိုင်းများမှာ သွေးတိုး၊ဆီးချိုနှင့် အခြားသောနာတာရှည်ရောဂါဝေဒနာသည်များ ပါဝင်ကြောင်း ဆိုသည်။
” အဓိက က ရာသီတုတ်ကွေးပေါ့။ ရာသီဥတု အပြောင်းအလဲမှာဖြစ်တာပေါ့။ အဲဒီကမှ ချောင်းဆိုးတာတွေ ရင်ကြပ်တာတွေ ဖြစ်ကြတယ်။ ဆေးဝါးတွေက ပြတ်လပ်နေတဲ့အပြင် ဈေးနှုန်းတွေ မြင့်တက်နေတော့ ထိရောက်အောင်မကုသနိုင်သလိုဖြစ်နေတယ်။ ပြောချင်တာက အမြစ်မပြတ်တာပေါ့။ ကျန်တဲ့စားသောက်ရေးတွေကတော့ လောလောဆယ် အဆင်ပြေနေပါတယ်။ လိုအပ်နေတာက ကျန်းမာရေးစောင့်ရှောက်ခံရမယ့်အခြေအနေပေါ့”ဟု စစ်ရှောင်အရေးဆောင်ရွက်ပေးနေသည့် သတင်းရင်းမြစ်တစ်ဦးက ရှင်းပြသည်။
ယခုလ နိုဝင်ဘာ (၁၁) ရက်မှ (၁၄) ရက်အထိ ပုလဲမြို့တွင်းတိုက်ပွဲများ ဖြစ်ပွားခဲ့သည့်အပြင် လေကြောင်းပစ်ခတ်မှုများကြောင့် ပုလဲမြို့ပေါ်ရှိ အိမ်ထောင်စု (၆၂၄) စု၊ အလယ်ဘုံရွာရှိ အိမ်ထောင်စု (၁၆၂) စု၊ အေးကုန်းရွာ အိမ်ထောင်စု (၁၂၆) စု၊ သာယာကုန်းရွာ အိမ်ထောင်စု (၆၄) စု၊ချောင်းကန်ရွာ အိမ်ထောင်စု (၂၅၈) စု၊ ကံကြီးရွာ အိမ်ထောင်စု (၁၀၂) စု၊ ညောင်ကန်ရွာ အိမ်ထောင်စု (၇၆)စု၊ ညောင်ကုန်းရွာအိမ်ထောင်စု (၂၈၄)စု၊ မန်ကျီးခွရွာအိမ်ထောင်စု (၉၆) စု၊ ဇောင်ချမ်းကုန်းရွာအိမ် ထောင်စု (၁၀၈) စု၊ မြကုန်းရွာအိမ်ထော င်စု (၁၂၄) စု၊ ရိုးရွာ အိမ်ထောင်စု (၉၆) စု တို့ စစ်ရှောင်နေကြရခြင်းဖြစ်ကြောင်း စစ်ကိုင်းပြည်သူဖေးမကူ ကွန်ရက်အဖွဲ့၏ ထုတ်ပြန်ချက်အရသိရသည်။