ပျက်စီးခဲ့သည့် ဝန်ကြီးရုံးများပြန်လည်ဆောက်ရာတွင် ငလျင်နှင့်ဆောက်လုပ်ရေးပညာရှင်များ၏အကြံဥာဏ်များရယူမည်

မန္တလေးငလျင်ကြီးဒဏ်ကြောင့် ပျက်စီးမှုများဖြစ်ပေါ်ခဲ့သည့် နေပြည်တော်ရှိ ပြည်ထောင်စုဝန်ကြီးရုံးများအား နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဧပြီ ၁၈ ရက်နံနက်ပိုင်းနှင့် ညနေပိုင်းတို့က ကြည့်ရှုစစ်ဆေးခဲ့သည်။

နစက ဥက္ကဋ္ဌမှ ပြည်ထောင်စုတရားလွှတ်တော်ချုပ်ရုံး၊ အလုပ်သမားဝန်ကြီးဌာနရုံး၊ ဥပဒေရေးရာဝန်ကြီးဌာနရှိ မြေကာနံရံပြိုကျပျက်စီးခဲ့မှု၊ စီမံကိန်းနှင့်ဘဏ္ဍာရေးဝန်ကြီးဌာနရုံး၊ ပြည်ထောင်စုရာထူးဝန်အဖွဲ့ရုံး၊ နိုင်ငံခြားရေးဝန်ကြီးဌာနရုံး၊ အလုပ်သမားဝန်ကြီးဌာန၊ လူမှုဖူလုံရေးအဖွဲ့ရုံးချုပ်နှင့် ဝန်ထမ်းများအားယာယီနေထိုင်နိုင်ရေးစီစဉ်ဆောင်ရွက်ပေးထားမှုတို့ကို ကြည့်ရှုခဲ့သည်။

ထို့နောက် နစက ဥက္ကဋ္ဌမှ ရုံးအဆောက်အဦများအတွင်းရှိအရေးကြီးသည့် စာရွက်စာတမ်းများ၊ စက်ပစ္စည်းကိရိယာများနှင့် ရွှေ့ပြောင်း၍ရနိုင်သည့် ပစ္စည်းများကို အမြန်ဆုံးရွှေ့ပြောင်းရန်၊ ပျက်စီးထိခိုက်မှုများဖြစ်ပေါ်ခဲ့သည့် ရုံးဌာနအဆောက်အဦများအား ပြန်လည်တည်ဆောက်ရေးလုပ်ငန်းများဆောင်ရွက်ရာတွင်ရေရှည်ခိုင်ခံ့မှုရှိစေရန်နှင့် ငလျင်ဒဏ်ခံနိုင်သည့်အဆောက်အဦများဖြစ်စေရေးအတွက် ငလျင်ပညာရှင်များ၊ ဆောက်လုပ်ရေးပညာရှင်များ၏ အကြံဉာဏ်များရယူတည်ဆောက်ရန် မှာကြားသည်။

ထို့ပြင် အဆောက်အဦများအား တစ်လုံးတည်းကြီးမားစွာတည်ဆောက်ခြင်းထက် အကန့်လိုက်၊ အလုံးလိုက်ခွဲတည်ဆောက်ပါက ငလျင်ဒဏ်ကိုပိုမိုခံနိုင်မည်ဖြစ်ကာ ရေရှည်ခိုင်ခံ့စေရန် လိုအပ်သည့်ရေလိုင်း၊ မီးလိုင်းများကို စနစ်တကျထည့်သွင်းတွက်ချက်တည်ဆောက်ရမည်ဟု မှာကြားသည်။

ထို့အတူ ဝန်ထမ်းမိသားစုများအတွက် ယာယီနေထိုင်မည့်နေရာများဆောက်လုပ်ရာတွင် စနစ်တကျတည်ဆောက်ပေးမည့်အကြောင်း နစက ဥက္ကဋ္ဌက ပြောကြားခဲ့သည်။