၂၀၂၄ ခုနှစ် နှစ်လယ်မြန်မာ့ကျောက်မျက်ရတနာပြပွဲနဝမနေ့တွင် MSME လုပ်ငန်းရှင်များကို အားပေးမြှင့်တင်ရန်ရည်ရွယ်၍ ပြည်တွင်းရတနာကုန်သည်များသာ ဝယ်ယူခွင့်ရှိသည့် အုပ်စု(စီ)မှ ကျောက်စိမ်းအတွဲ အမှတ် (၃၃၁၀) မှ (၄၀၅၉) အထိ အတွဲပေါင်း (၇၅၀) အတွက် ပြည်တွင်းရတနာကုန်သည်များက ပြပွဲ ဈေးနှုန်းတင်သွင်းလွှာများ တင်သွင်းခဲ့ကြရာ ကျောက်စိမ်းအတွဲပေါင်း (၆၉၄) တွဲ ရောင်းချခဲ့ရကြောင်း ကြေညာခဲ့သည်။
ထို့ပြင် အုပ်စု(စီ)မှ ကျောက်စိမ်းအတွဲအမှတ် (၄၀၆၀) မှ (၄၈၀၀) အထိ ပြည်တွင်းရတနာကုန်သည်များ ဈေးနှုန်းလွှာတင်သွင်းခဲ့သည့် ကျောက်စိမ်းအတွဲပေါင်း (၇၄၁) တွဲကိုလည်း ကြေညာပေးသွားမည်ဖြစ်ကြောင်းသိရသည်။
၂၀၂၄ ခုနှစ် နှစ်လယ်မြန်မာ့ကျောက်မျက်ရတနာ ပြပွဲတွင် နိုဝင်ဘာ (၂၆) ရက်အထိ ပုလဲအတွဲပေါင်း (၂၀၈) တွဲ၊ ကျောက်မျက်အတွဲပေါင်း (၆၂) တွဲ၊ အုပ်စု (အေနှင့်ဘီ) မှ ကျောက် စိမ်းအတွဲ (၁၈၂၃) တွဲကို ပြည်တွင်း၊ ပြည်ပရတနာကုန်သည်များအား ရောင်းချပေးနိုင်ခဲ့သည့်အပြင် ပြည်တွင်းရတနာကုန်သည်များသာ ဝယ်ယူခွင့်ရှိပြီး ကျပ်ငွေဖြင့်သာ ပေးချေဝယ်ယူရမည့် အုပ်စု(စီ)မှ ကျောက်စိမ်းအတွဲပေါင်း (၁၄ ၂၉) တွဲ တို့ကို ရောင်းချပေးနိုင်ခဲ့ပြီးဖြစ်ကြောင်း သိရသည်။