ငလျင်ဒဏ်ကြောင့် ထိခိုက်ပျက်စီးခဲ့ရမှုများကို ပြန်လည်ထူထောင်ရာတွင် အပိုင်း (၃)ပိုင်းခွဲခြား၍ ဆောင်ရွက်ရန် ယနေ့ မတ်လ(၃၀)ရက်နံနက်ပိုင်းက ပြုလုပ်သည့် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ အမြန်ဆုံးဆောင်ရွက်သွားနိုင်ရေး အထူးအစည်းအဝေးအတွင်း နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားသည်။
ထိုသို့ လုပ်ဆောင်ရာတွင် ပြိုကျပျက်စီးသွားသော အဆောက်အဦများနှင့် အပျက်အစီးများအားရှင်းလင်းဖယ်ထုတ်ခြင်း အပိုင်း၊ ပြိုကျပျက်စီးနေဆဲ အဆောက်အဦများအားဘေး အန္တရာယ်မဖြစ်စေရေး စနစ်တကျရှင်းလင်း ဖယ်ရှားခြင်းအပိုင်း၊ ပြန်လည်တည်ဆောက်ခြင်းအပိုင်းဟူ၍ အပိုင်း(၃) ပိုင်းခွဲ၍ ဆောင်ရွက်သွားရန်မှာကြားသည်။
ကူညီကယ်ဆယ်ရေးလုပ်ငန်းများ ဆောင်ရွက်ရာတွင် လိုအပ်သည့် တန်ချိန်များစွာကို မတင်နိုင်သည့် ကရိန်းကားများကိုလည်း ငလျင်ဘေးဒဏ်သင့်ဒေသများသို့ အမြန်ဆုံးစေလွှတ်ဆောင်ရွက်သွားစေရန် ထည့်သွင်းပြောကြားသည်။
လမ်းတံတားများ၊ နိုင်ငံပိုင် အဆောက်အဦးများ ပြန်လည်တည်ဆောက်ရေးနှင့် ပြန်လည်ထူထောင်ရေးလုပ်ငန်းများကို အင်တိုက်အားတိုက်ဆက်လက်ဆောင်ရွက်သွားရန်နှင့် ပုဂ္ဂလိတည်ဆောက်ရေးလုပ်ငန်းများကိုလည်း ထောက်ပံ့ပေးရန်လိုအပ်ကြောင်းကိုလည်း ထည့်သွင်းပြောကြားသည်။
ထို့ပြင် အဆောက်အဦအာမခံလုပ်ငန်းများတွင် အာမခံထားရှိမှုများကိုလည်း စနစ်တကျစိစစ်၍ အာမခံငွေကြေးများရရှိရေးအတွက်လည်း ဆောင်ရွက်ပေးသွားရန် မှာကြားသည်။
ရှေးဟောင်းယဉ်ကျေးမှုအမွေအနှစ် အဆောက်အဦများ ထိခိုက်ပျက်စီးခဲ့ရမှုများကို ပြန် လည်ပြုပြင်တည်ဆောက်ခြင်းများ ဆောင်ရွက်ရာတွင် ရှေးမူလက်ရာမပျက်ဆောင်ရွက်သွားရန်လည်း မှာကြားခဲ့သည်။