ယနေ့ခေတ်တွင် စစ်လက်နက်နည်းပညာများ၊ စစ်နည်းဗျူဟာများသည် အဆက်မပြတ်တိုး တက်လျက်ရှိ၍ “လေ့လာ၊ လေ့ကျင့်၊ လိုက်နာ” ဟူသည့်မူဝါဒအတိုင်း စဉ်ဆက်မပြတ်ပြောင်းလဲတိုးတက်နေသည့် စစ်အတတ်ပညာများကို အမြဲမပြတ်လေ့လာနေရမည်ပြီး သင်ယူထားရှိပြီးဖြစ်သည့် စစ်မှုရေးရာနည်းနာများနှင့် အတတ်ပညာများကို ပိုမိုကျွမ်းကျင်အောင် အမြဲလေ့ကျင့်နေရမည်ဖြစ်ကြောင်း နစကဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။
ယနေ့ ဇန်နဝါရီ ၂၂ ရက်နံနက်ပိုင်းက နေပြည်တော်တိုင်းစစ်ဌာနချုပ်၊ တောင်ညိုတပ်နယ်ရှိ နယ်မြေခံလေ့ကျင့်ရေးသင်တန်းကျောင်း ၌ သင်တန်းသားများကို သင်ကြားလေ့ကျင့်ပေးနေမှုအား ၎င်းမှ ကြည့်ရှုစစ်ဆေးစဥ် မှာကြားခဲ့ခြင်းဖြစ်သည်။
ထို့ပြင် ချမှတ်ထားရှိသည့်စည်းမျဉ်းစည်းကမ်းများအတိုင်း အမြဲလိုက်နာကျင့်သုံးနေရမည်ဖြစ်ပြီး စစ်သားကောင်း တစ်ယောက်ပီသစွာ နေထိုင်ကျင့်ကြံမည်ဆိုပါက တာဝန်များကို ပျော်ရွှင်စွာဖြင့် ထမ်းဆောင်နိုင်မည်ကြောင်းကိုလည်း ပြောသည်။
” ဒီနေ့ခေတ်ဟာ နည်းပညာခေတ်ဖြစ်လို့ နည်းပညာကိုအသုံးပြုပြီး အင်တာနက်စာမျက်နှာတွေနဲ့ စာအုပ်စာပေတွေကနေ မိမိတို့ဘဝတိုးတက်ရေးအတွက်လိုအပ်တဲ့ အချက်အလက်တွေနဲ့ ဗဟုသုတတွေကို ရှာဖွေလေ့လာဆောင်ရွက်မယ်ဆိုရင် တစ်ဦးချင်းရဲ့စွမ်းရည်တွေလည်း တိုးတက်လာမှာဖြစ်ပါတယ်”ဟု ဗိုလ်ချုပ်မှူးကြီးမင်းအောင်လှိုင်က မှာကြားသည်။
ထို့ပြင် တပ်မတော်အနေဖြင့် တပ်မတော်သားများ၏ပညာရည်မြင့်မားရန် ပညာရေးသင်တန်းကျောင်းများဖွင့်လှစ်၍ မြှင့်တင်ပေးလျက်ရှိပြီး တပ်မတော်သား မိသားစုဝင် သား၊သမီးများ၏ ပညာရေးကိုလည်း အမြဲမပြတ်အားပေးလျက်ရှိကာ ထူးချွန်စွာအောင်မြင်သူများကို ဂုဏ်ပြုချီးမြှင့်ပေးလျက်ရှိသည်ဟု ပြောသည်။
အလားတူ ဗိုလ်ချုပ်မှူးကြီး မင်းအောင်လှိုင်က သင်တန်းကျောင်းတာဝန်ရှိသူများကိုလည်း ခေတ်နှင့် အညီပြောင်းလဲတိုးတက်လာသည့် သင်ခန်းစာများကို စဉ်ဆက်မပြတ် သုတေသနပြု သင်ကြားရန်၊ ကြံ့ခိုင်ရေးတွင် အရည်အချင်းပြည့်ဝပြီး လက်တွေ့နယ်ပယ်တွင် ကာကွယ်ရေးနှင့်လုံခြုံရေးတာဝန်များကို ပိုင်နိုင်စွာထမ်းဆောင်နိုင်ရေး စနစ်တကျလေ့ကျင့်မွေးထုတ်ပေးရန်နှင့် စစ်သည်တစ်ဦးချင်း ရသင့်ရထိုက်သည့် အခွင့်အရေးများကို မှန်မှန်ကန်ကန်ဖြင့် ဖြည့်ဆည်းပေးရန်တို့ကိုလည်း မှာကြားခဲ့သည်။