ကချင်ပြည်နယ်၊ ဖားကန့်မြို့နယ်အတွင်း ယခုလ နိုဝင်ဘာ တတိယအပတ်မှစတင်၍ စက်သုံးဆီပြတ်လပ်မှုများနှင့်ကြုံတွေ့နေရသဖြင့် ပွင့်လင်းရာသီ ကျောက်စိမ်းတူးဖော်ရေးလုပ်ငန်းခွင်များ အခက်အခဲဖြစ်လာနေကြောင်း ဒေသခံသတင်းရင်းမြစ်တစ်ဦးထံက သိရသည်။
ဓာတ်ဆီ၊ ဒီဇယ်ဆီ ပြတ်လပ်မှုကြောင့် ဖားကန့်မှော်ဒေသများဖြစ်သည့် လုံးခင်း၊ ဖားကန့်၊ ဆိုင်းတောင် တို့တွင် စက်သုံးဆီဆိုင်များအားလုံးပိတ်ထားကြပြီး လက်ရှိတွင် ဖားကန့်မြို့အဝင်ရှိ စက်သုံးဆီဆိုင် (၂)ဆိုင်နှင့် တစ်နိုင်တစ်ပိုင်ဆိုင်ငယ်များသာ ရောင်းချပေးနေကြောင်း သိရသည်။
“ပွင့်လင်းရာသီချိန် ကျောက်စိမ်းတူးဖော်ရေးလုပ်ငန်းတွေ၊အရောင်းအဝယ်တွေ လုပ်ကြရတာ။ မှော်ဒေသ စီးပွားရေး လုပ်ဆောင်ကြရမယ့် ကာလမှာ အခုလို စက်သုံးဆီသယ်ယူ ၊ တင်သွင်း၊ ရောင်းချခွင့်မရကြတာကြောင့် ကုန်သည်၊ ပွဲစားကအစ ခေါင်းရွက်ဗျက်ထိုးဈေးသည်အထိ အခက်အခဲ ကိုယ်စီကြုံကြရတော့မှာ”ဟု ၎င်းက ဆိုသည်။
လက်ရှိတွင် နိုဝင်ဘာလ (၂၃)ရက်အထိ ဓါတ်ဆီတစ်ဂါလံ (၄၄,ဝဝဝ)ကျပ်၊ ဒီဇယ်တစ်ပေပါ ကျပ်(၂၃) သိန်းကျော်ပေး၍ ဝယ်ယူနေရကြောင်း သိရသည်။
အလားတူ မန္တလေး-ဖားကန့် ကုန်စည်စီးဆင်းမှုများလည်း အခက်အခဲဖြစ်ပေါ်ကာ ဒေသတွင်းကုန် ဈေးနှုန်းများမြင့်တက်လျက်ရှိကြောင်း သိရသည်။
ထို့အတူ ဖားကန့်-မန္တလေး ခရီးသွားလာမှုခရီးစရိတ်မှာလည်း နှစ်ဆကျော် မြင့်တက်လာနေကာ ဖားကန့်မှ မိုင် (၈၀) ကျော် အကွာရှိ မိုးညှင်းမြို့သို့ လူတစ်ဦးလျှင် ကားခ ကျပ်နှစ်သိန်းပေးရပြီး မိုင် (၃၀၀) ကျော်ကွာသည့် မန္တလေးမြို့သို့ ကျပ်လေးသိန်းအထိ ပေးရကြောင်းသိရသည်။
ဖားကန့် မှော်ဒေသသည် အကြီးစားကျောက်စိမ်းတူးဖော်မှုလုပ်ကွက်များကြောင့် စက်သုံးဆီသုံးစွဲမှုမြင့်မားသည့် ဒေသတစ်ခုဖြစ်ပြီး နှစ်စဉ် ထိုဒေသမှ ဒေါ်လာဘီလီယံများစွာ တန်ကြေးရှိသည့် ကျောက်စိမ်းများကို တူးဖော်ရရှိနေခြင်းဖြစ်သည်။
ဓာတ်ပုံ-CJ